മകളുടെ അപൂർവരോഗത്തെക്കുറിച്ച് തുറന്നുപറഞ്ഞ് വരുൺ ധവാൻ; 'ശരിയായി നടക്കാനോ ഓടാനോ കഴിഞ്ഞില്ല'

ബോളിവുഡ് നടൻ വരുൺ ധവാൻ 2021-ലാണ് തന്റെ ദീർഘനാളായുള്ള പ്രണയിനിയും ഫാഷൻ ഡിസൈനറുമായ നതാഷ ദലാലിനെ വിവാഹം കഴിക്കുന്നത്. ബോംബെ സ്‌കോട്ടിഷ് സ്‌കൂളിൽ പഠിക്കുമ്പോൾ, ആറാം ക്ലാസിൽവെച്ചാണ് വരുണും നതാഷയും ആദ്യമായി കണ്ടുമുട്ടുന്നത്. ആ ബാല്യകാലസൗഹൃദമാണ് പ്രണയത്തിലും പിന്നീട് വിവാഹത്തിലുമെത്തിയത്.

ജൂൺ 2024-ലാണ് ഇരുവർക്കും ഒരു മകൾ ജനിച്ചത്. ലാറ എന്നാണ് കുഞ്ഞിന് പേരിട്ടത്. ഇപ്പോൾ കുഞ്ഞിന്റെ അസുഖത്തെക്കുറിച്ച് തുറന്നുപറയുകയാണ് വരുൺ. 'Be A Man, Yaar!' എന്ന ചാറ്റ്‌ഷോയിൽ സംസാരിക്കുകയായിരുന്നു താരം. തന്റെ മകൾക്ക് ഡിഡിഎച്ച് (ഡെവലപ്മെന്റൽ ഡിസ്പ്ലാസിയ ഓഫ് ദി ഹിപ്) ഉണ്ടെന്ന് കണ്ടെത്തിയതായും അതുമൂലം അവൾക്ക് ശരിയായി നടക്കാനോ ഓടാനോ കഴിഞ്ഞില്ലെന്നും വരുൺ വെളിപ്പെടുത്തി. കുഞ്ഞ് ഒരു ശസ്ത്രക്രിയയ്ക്ക് വിധേയയായെന്നും ഇപ്പോൾ സുഖം പ്രാപിച്ചുവരികയാണെന്നും അദ്ദേഹം പറഞ്ഞു.

കുഞ്ഞിന് ഒന്നര വയസ്സുള്ളപ്പോഴാണ് അവൾക്ക് ഡിഡിഎച്ച് ഉണ്ടെന്ന് കണ്ടെത്തിയതെന്നും വരുൺ വെളിപ്പെടുത്തി. ''എന്റെ മകൾക്ക് ഡിഡിഎച്ച് ഉണ്ടെന്ന് കണ്ടെത്തി, അതിൽ ഇടുപ്പ്, സോക്കറ്റിൽ (hip socket) നിന്ന് പുറത്തേക്ക് വഴുതി വീഴുന്നു. ഒരു കാൽ മറ്റേതിനേക്കാൾ നീളം കുറയുന്നു. ഇത് നടക്കുമ്പോൾ ചെറിയ മുടന്തിന് കാരണമാകുന്നു. അങ്ങനെ വരുമ്പോൾ നിങ്ങൾക്ക് ശരിയായി നടക്കാനോ ഓടാനോ കഴിയില്ല''.

പാശ്ചാത്യ രാജ്യങ്ങളിൽ, ജനനം മുതൽ തന്നെ ഈ അവസ്ഥയ്ക്ക് നല്ല ചികിത്സ ലഭിക്കുമെന്നും വരുൺ പറയുന്നു. ''ഇന്ത്യയിൽ, ആ രീതിയിലുള്ള ചികിത്സ എല്ലായിടത്തും ലഭ്യമല്ല. എന്നാൽ ഇത് കൈകാര്യം ചെയ്യുന്ന നിരവധി മികച്ച ഡോക്ടർമാരും ഇവിടെയുണ്ട്. ഒരു നടപടിക്രമത്തിലൂടെ അവർക്ക് ഇടുപ്പ് തിരികെ വയ്ക്കാൻ കഴിയും. അവൾക്ക് ഒരു സ്‌പൈക്ക കാസ്റ്റ് ഇടേണ്ടിവന്നു. അതായത് അവൾക്ക് 2.5 മാസം കാസ്റ്റ് ഉപയോഗിച്ച് കഴിയേണ്ടിവന്നു. അത് വളരെ ബുദ്ധിമുട്ടായിരുന്നു. ഇപ്പോൾ കാസ്റ്റ് മാറ്റിക്കഴിഞ്ഞു. അതിനെക്കുറിച്ച് ഒരു പുസ്തകം എഴുതാൻ ഞാൻ ആഗ്രഹിക്കുന്നു''. (സ്‌പൈക്ക കാസ്റ്റ് എന്നത് പ്രധാനമായും കുഞ്ഞുങ്ങളിൽ ഹിപ് ഡെവലപ്മെന്റൽ ഡിസ്പ്ലാസിയ (ഡിഡിഎച്ച്) പോലുള്ള അവസ്ഥകൾ ചികിത്സിക്കുന്നതിന് ഉപയോഗിക്കുന്ന ഒരു ഓർത്തോപീഡിക് കാസ്റ്റാണ്).

കുട്ടികളുടെ ചലനങ്ങൾ മാതാപിതാക്കൾ ശ്രദ്ധാപൂർവ്വം ശ്രദ്ധിക്കണമെന്നും കുട്ടിയുടെ വളർച്ചയുടെ ആദ്യ വർഷങ്ങളിൽ എന്തെങ്കിലും അസാധാരണത്വം സംശയിക്കുന്നുവെങ്കിൽ ഒരു ശിശുരോഗവിദഗ്ദ്ധനെ സമീപിക്കണമെന്നും അദ്ദേഹം അഭ്യർത്ഥിച്ചു. ആരാധകരോട് തന്നെ സഹതാപത്തോടെ നോക്കരുതെന്നും വരുൺ അഭ്യർത്ഥിച്ചു, ഇന്ത്യയിൽ അധികമാർക്കും ഈ അവസ്ഥയെക്കുറിച്ച് അറിയാത്തതിനാലാണ് താൻ ഇത് പങ്കുവെച്ചതെന്നും അദ്ദേഹം കൂട്ടിച്ചേർത്തു.

കുഞ്ഞിന്റെ ഹിപ് ജോയിന്റ് രൂപപ്പെടുന്ന രീതിയെ ബാധിക്കുന്ന ഒരു അവസ്ഥയാണ് ഡെവലപ്മെന്റൽ ഡിസ്പ്ലാസിയ ഓഫ് ദി ഹിപ് (ഡിഡിഎച്ച്). ചിലപ്പോൾ, ഇത് ജനനത്തിനു മുമ്പ് ആരംഭിക്കുന്നു, മറ്റ് സന്ദർഭങ്ങളിൽ ഇത് ജനനത്തിനുശേഷം കുട്ടി വളരുന്നതിനനുസരിച്ച് വികസിക്കുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi