എളുപ്പത്തിൽ വരയ്ക്കാം, വൃത്തിയാക്കാനുമെളുപ്പം; ദീപാവലി രംഗോലി കിറ്റുകൾ മുതൽ മാറ്റ് വരെ

ദീപാവലി അടുത്തെത്തി, രംഗോലി വരയ്ക്കാനുള്ള ഒരുക്കങ്ങൾ തുടങ്ങിയോ? രംഗോലി വരയ്ക്കാനറിയാത്തവർ ഇനി വിഷമിക്കേണ്ട. രംഗോലി സ്‌റ്റെൻസിലുകൾ മുതൽ റെഡിമെയ്ഡ് രംഗോലി മാറ്റുകളും അലങ്കാര കിറ്റുകളും വരെ വിപണിയിലെത്തിക്കഴിഞ്ഞു. 

രംഗോലി സ്‌റ്റെൻസിലുകൾ: കൈകൊണ്ട് രംഗോലി വരയ്ക്കാൻ പ്രയാസമുള്ളവർക്ക് ഈ സ്റ്റെൻസിലുകൾ ഉപയോഗിക്കാം. സ്‌റ്റെൻസിൽ നിലത്തുവെച്ച് അതിലെ വിടവുകളിലൂടെ രംഗോലി പൊടി നിറച്ചാൽ മനോഹരമായ ഡിസൈൻ എളുപ്പത്തിലൊരുക്കാം. പൂക്കളുടെ രൂപങ്ങൾ, മണ്ഡാല ഡിസൈനുകൾ, ജ്യാമിതീയ രൂപങ്ങൾ, ബോർഡറുകൾ എന്നിവയുൾപ്പെടെ പലതരത്തിലുള്ള സ്റ്റെൻസിലുകൾ ലഭ്യമാണ്. വലിയ സ്റ്റെൻസിലുകൾ പ്രധാന ഡിസൈനുകൾ ഒരുക്കാനും ചെറിയവ ആവർത്തിച്ചുള്ള രൂപങ്ങൾ സൃഷ്ടിക്കാനും സഹായിക്കും.

വാങ്ങുമ്പോൾ ശ്രദ്ധിക്കേണ്ടത്: 
വീണ്ടും ഉപയോഗിക്കാവുന്ന പ്ലാസ്റ്റിക് സ്റ്റെൻസിലുകൾ വാങ്ങുക
പൂക്കളുടെ ഡിസൈനുകളുള്ള സ്റ്റെൻസിൽ സെറ്റുകൾ നോക്കാം
വിവിധ വലുപ്പത്തിലുള്ള സ്റ്റെൻസിൽ കിറ്റുകൾ വാങ്ങാം
രംഗോലി പൊടി നിറയ്ക്കാനുള്ള ഉപകരണങ്ങൾ ഉൾപ്പെട്ട സെറ്റുകൾ തിരഞ്ഞെടുക്കുക

റെഡിമെയ്ഡ് രംഗോലി മാറ്റുകൾ തിരഞ്ഞെടുക്കാം: പൊടി ഉപയോഗിച്ച് രംഗോലി ഒരുക്കുമ്പോഴുള്ള ബുദ്ധിമുട്ടുകളും വൃത്തിയാക്കാനുള്ള പ്രയാസങ്ങളും ഒഴിവാക്കണമെങ്കിൽ റെഡിമെയ്ഡ് രംഗോലി മാറ്റുകൾ തിരഞ്ഞെടുക്കാം. പൂക്കളുടെ രൂപങ്ങൾ, പരമ്പരാഗത ഡിസൈനുകൾ, മണ്ഡാല പാറ്റേണുകൾ തുടങ്ങി വിവിധ മാതൃകകളിൽ ഇവ ലഭ്യമാണ്. മാറ്റ് വിരിച്ച് അതിനുചുറ്റും വിളക്കുകളോ പൂക്കളോ വയ്ക്കുന്നത് കൂടുതൽ ഭംഗി നൽകും.

വാങ്ങുന്നതിനുമുൻപ് മാറ്റിന്റെ വലുപ്പം, മെറ്റീരിയൽ, വൃത്തിയാക്കാനുള്ള സൗകര്യം എന്നിവ പരിശോധിക്കാം. നിലത്ത് തെന്നിമാറാത്ത മാറ്റുകൾ തിരഞ്ഞെടുക്കുന്നതും പ്രധാനമാണ്. വീണ്ടും ഉപയോഗിക്കുന്ന മാറ്റുകളായാൽ നല്ലത്. 

രംഗോലി കിറ്റ്: സ്വയം രംഗോലി ഒരുക്കാൻ ആഗ്രഹമുള്ളവരാണ്, എന്നാൽ ആവശ്യമായ സാധനങ്ങൾ എന്തൊക്കെ വേണമെന്ന് അറിയില്ലെങ്കിൽ ഒരു രംഗോലി കിറ്റ് വാങ്ങാം. പല നിറങ്ങളിലുള്ള രംഗോലി പൊടി, സ്റ്റെൻസിലുകൾ, പൊടി നിറയ്ക്കാനുള്ള കോണുകൾ, മറ്റ് ഉപകരണങ്ങൾ എന്നിവ ഉൾപ്പെടെ കിറ്റുകളിലുണ്ടാകും.

രംഗോലി കോണുകൾ: രംഗോലിയിൽ നേർത്ത വരകളും കൃത്യമായ ബോർഡറുകളും ഒരുക്കാൻ കോണുകളും പ്രത്യേക ഉപകരണങ്ങളും വാങ്ങാം. ചെറിയ വിടവുകളിലൂടെ പൊടി നിറയ്ക്കാൻ സ്‌ക്വീസ് ബോട്ടിലുകൾ പോലുള്ള ഉപകരണങ്ങളും ഉപയോഗിക്കാം. വലിയ ഭാഗങ്ങളിൽ നിറം പരത്താൻ ചെറിയ സ്പൂണുകളും അരിപ്പകളും പ്രയോജനപ്പെടും. ഉപകരണങ്ങൾ തിരഞ്ഞെടുക്കുമ്പോൾ വൃത്തിയാക്കാൻ എളുപ്പമാണോ, വീണ്ടും നിറയ്ക്കാൻ കഴിയുമോ, ഉപയോഗിക്കുന്ന പൊടിക്ക് അനുയോജ്യമാണോ തുടങ്ങിയ കാര്യങ്ങൾ ശ്രദ്ധിക്കണം.

രംഗോലി ഒരുക്കിക്കഴിഞ്ഞാൽ ചുറ്റിലും വിളക്കുകൾ തെളിയിക്കാം. എൽഇഡി ലൈറ്റുകളും തിരഞ്ഞെടുക്കാം. വീടിന്റെ പൂമുഖത്തോട് ചേർന്ന് പൂക്കൾകൊണ്ടുള്ള തോരണങ്ങളും അലങ്കാരങ്ങളും കൂടിയായാൽ ദീപാവലി ആഘോഷം കെങ്കേമമാക്കാം. 
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi