കാരറ്റ് പച്ചയ്ക്ക് കഴിക്കുന്നതാണോ വേവിച്ച് കഴിക്കുന്നതാണോ നല്ലത്? വൈറ്റമിൻ എ മുഴുവനായി ലഭിക്കാൻ ഇതാണ് വഴി

നല്ല കാഴ്ചശക്തിക്കും തിളക്കമുള്ള ചർമ്മത്തിനും രോഗപ്രതിരോധശേഷിക്കും കാരറ്റ് വളരെ നല്ലതാണെന്ന് നമുക്കെല്ലാവർക്കും അറിയാം. എന്നാൽ കാരറ്റ് പച്ചയ്ക്ക് കടിച്ചുതിന്നുമ്പോൾ അതിലെ പോഷകങ്ങൾ മുഴുവനായി നമ്മുടെ ശരീരത്തിന് ലഭിക്കുന്നില്ലെന്നതാണ് വാസ്തവം. കാരറ്റ് ചെറുതായി വേവിച്ച്, അല്പം നല്ലെണ്ണയോ ഒലിവ് ഓയിലോ ചേർത്ത് കഴിക്കുന്നതാണ് വൈറ്റമിൻ എ പൂർണ്ണമായും ശരീരത്തിന് ലഭ്യമാക്കാൻ ഏറ്റവും അനുയോജ്യമായ രീതി.

കാരറ്റിൽ ധാരാളമായി അടങ്ങിയിരിക്കുന്ന ബീറ്റാ കരോട്ടിൻ (Beta-carotene) ആണ് ശരീരത്തിൽ എത്തി വൈറ്റമിൻ എ ആയി മാറുന്നത്. എന്നാൽ കാരറ്റിന്റെ കടുപ്പമേറിയ കോശഭിത്തികൾ കാരണം പച്ചയ്ക്ക് കഴിക്കുമ്പോൾ വെറും മൂന്ന് ശതമാനം ബീറ്റാ കരോട്ടിൻ മാത്രമേ ശരീരം ആഗിരണം ചെയ്യുന്നുള്ളൂ. ലഘുവായി ആവി കയറ്റുകയോ വേവിക്കുകയോ ചെയ്യുമ്പോൾ ഈ കോശഭിത്തികൾ മൃദുവാകുകയും, പോഷക ലഭ്യത 39 ശതമാനം വരെ ഉയരുകയും ചെയ്യുന്നു.

കൂടാതെ ബീറ്റാ കരോട്ടിൻ ഒരു 'ഫാറ്റ് സോള്യുബിൾ' വൈറ്റമിൻ ആയതിനാൽ കൊഴുപ്പിന്റെ സാന്നിധ്യത്തിൽ മാത്രമേ ഇത് കുടലിലേക്ക് ആഗിരണം ചെയ്യപ്പെടുകയുള്ളൂ. കാരറ്റിൽ അല്പം ഒലിവ് ഓയിലോ വെളിച്ചെണ്ണയോ ചേർക്കുന്നത് പോഷകങ്ങൾ ശരീരത്തിലേക്ക് എത്തുന്ന നിരക്ക് ആറ് മടങ്ങ് വരെ കൂട്ടുന്നു.

കാരറ്റ് വെള്ളത്തിലിട്ട് കുഴയുന്നതുവരെ വേവിക്കാതെ, അരിഞ്ഞ കാരറ്റ് ഒരു സ്പൂൺ എണ്ണയിൽ അഞ്ച് മിനിറ്റ് വഴറ്റി അല്പം കുരുമുളകുപൊടി വിതറി കഴിക്കുന്നതാണ് ഏറ്റവും ഉത്തമം. ഇനി സാലഡ് ആയി കഴിക്കാനാണ് ഇഷ്ടമെങ്കിൽ, അതിൽ ഒലിവ് ഓയിൽ ഡ്രസ്സിങ്ങോ അവക്കാഡോയോ ചേർക്കുന്നത് പോഷകങ്ങൾ നഷ്ടപ്പെടാതെ കഴിക്കാൻ സഹായിക്കും.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi