മമ്മൂക്ക ചോദിച്ചു, പടം ഹിറ്റായപ്പോൾ നമ്മളെയെല്ലാം മറന്നോ..? - 'കഥ പറയുമ്പോൾ' സിനിമയുടെ അറിയാക്കഥ

അച്ഛന്റെ പോക്കറ്റിൽ നിന്ന് മോഷ്ടിച്ച കാശുമായി നമ്മളെയും കൂട്ടി സിനിമ കാണാൻ പോയ കളിക്കൂട്ടുകാരനെ ഓർമയുണ്ടോ. നാം എന്നോ മറന്നുപോയ കാതിൽ ചുവന്ന കല്ലുവച്ച കടുക്കനിട്ട ആ സൗഹൃദത്തിന്റെ ഊഷ്മളതയിലേക്ക് വാതായനങ്ങൾ തുറന്നിട്ടാണ് കഥ പറയുമ്പോൾ എന്ന ചിത്രം ഹൃദയത്തിൽ ഇടം നേടിയത്. അതുകൊണ്ടു തന്നെ  ഓരോ തവണ കഥപറയുമ്പോൾ കണ്ട് കഴിയുമ്പോഴും കണ്ണിലെവിടെയോ ഒരുതുടം കണ്ണീർ നിറയും. ശ്രീനിവാസൻ- മമ്മൂട്ടി- മോഹനൻ കൂട്ടുകെട്ടിൽ പിറന്ന് മലയാള സിനിമയുടെ ബോക്‌സോഫീസിൽ എന്നൊന്നും ഓർമിക്കാവുന്ന വിജയമായി മാറി. ബാർബറാം ബാലന്റെയും സൂപ്പർ സ്റ്റാർ അശോക് രാജിന്റെയും സൗഹൃദത്തിന്റെ കഥ പറഞ്ഞ തന്റെ ആദ്യ ചിത്രമായ കഥ പറയുമ്പോളിന്റെ പിന്നാമ്പുറ കഥകൾ ഓർത്തെടുക്കുകയാണ് സംവിധായകൻ എം മോഹനൻ.

കഥ പറയും മുമ്പെ...

Also Read

രതീഷിന്റെ നന്‍മ കാരണം ഞാനാ അപകടത്തില്‍നിന്ന് രക്ഷപ്പെട്ടു: ലാലു അലക്‌സ്

അന്ന് എ.ആര്‍. റഹ്മാന്‍ വിളിച്ചില്ലായിരുന്നെങ്കില്‍ എന്റെ കരിയര്‍ അവിടെ അവസാനിച്ചേനെ: ഉണ്ണി മേനോൻ

കുളത്തില്‍ ചാടി ആത്മഹത്യ ചെയ്യുമെന്ന് ഗിരീഷ് പറഞ്ഞപ്പോള്‍ ഞാന്‍ പേടിച്ചു: എം.ജി.ശ്രീകുമാര്‍

ജിഷ്ണു, മുരളിയേട്ടൻ(ഭരത് മുരളി), ശ്രീനിയേട്ടൻ (ശ്രീനിവാസൻ) എന്നിവരെ കേന്ദ്രകഥാപാത്രങ്ങളാക്കിയുള്ള ഒരു ചിത്രമായിരുന്നു ഞാൻ ആദ്യം ചെയ്യാനുദ്ദേശിച്ചത് . ഞാൻ തന്നെയായിരുന്ന തിരക്കഥ. ലിവ ടവർ എംഡിയായ മുനീറും തിരുവനന്തപുരത്തുള്ള രാധാകൃഷ്ണനുമായിരുന്നു നിർമാതാക്കൾ. തിരക്കഥ ശ്രീനിയേട്ടനെ കാണിച്ചപ്പോൾ അദ്ദേഹം പറഞ്ഞു പുതിയൊരു സംവിധായകൻ എന്ന രീതിയിൽ സ്‌പെഷ്യലായൊരു സിനിമയായിരിക്കണം ചെയ്യേണ്ടത്, അത്തരമൊരു സ്‌പെഷ്യാലിറ്റി ഇതിലില്ലെന്ന്. അതോടെ ആ ശ്രമം ഉപേക്ഷിച്ചു.

പിന്നീടൊരു ദിവസം ശ്രീനിയേട്ടൻ ചെന്നൈയിൽ ഉള്ള സമയത്ത് അവിചാരിതമായി ഒരു അമ്വേചർ നാടകം കാണാനിടയായി.  നടി ഇന്ദ്രജയുടെ സുഹൃത്തുക്കൾ സംവിധാനം ചെയ്ത നാടകമായിരുന്നു അത്. നാടകം ശ്രീനിയേട്ടന് ഇഷ്ടമാകുകയും നാട്ടിലെത്തിയ ഉടൻ അതിന്റെ സംഗ്രഹം എന്നോട് പറയുകയും ചെയ്തു. അങ്ങനെ പുതിയൊരു സിനിമയുടെ ആലോചനയ്ക്ക് വിത്തിട്ടു. ആർ പി ഗംഗാധരൻ എന്നൊരു നിർമാതാവിനോട് സംഭവം പറഞ്ഞപ്പോൾ അദ്ദേഹത്തിന് ഇഷ്ടമായി. അതോടെ ഇന്ദ്രജ വഴി നാടകത്തിന്റെ അണിയറപ്രവർത്തകരെ കണ്ടെത്തി. ചെന്നൈയിൽ പോയി നാടകത്തിന്റെ മലയാളം റൈറ്റ്‌സ് വാങ്ങി. പിന്നീട് കോയമ്പത്തൂരിൽ പോയി ശ്രീനിയേട്ടന്റെ സുഹൃത്തായ വിജയകുമാർ കുനിശ്ശേരി എന്ന ഒരാളെ കണ്ട്  നാടകം മലയാളത്തിലേക്ക് വിവർത്തനം ചെയ്യിപ്പിച്ചു. ശ്രീനിയേട്ടൻ എഴുതുന്നതിന് മുന്നോടിയായി വിവർത്തനം ചെയ്ത കഥ വായിച്ച ശേഷം  ഞാനൊരു വൺലൈനുണ്ടാക്കി. പ്രോജക്ട് ഉദയനാണ് താരത്തിന് മുമ്പ് നമ്മൾ ചെയ്യണമെന്ന് വിചാരിച്ചെങ്കിലും നടന്നില്ല.  കുറച്ച് നാളുകൾക്ക് ശേഷം ചിതറിയവർ എന്ന സിനിമയുടെ ഷൊർണൂരിലെ സെറ്റിൽ പോയി ആദ്യപകുതിയുടെ വൺലൈൻ ശ്രീനിയേട്ടനെ കാണിച്ചു. അദ്ദേഹത്തിന് ഇഷ്ടമായി.

കുചേലനും കൃഷ്ണനും...

ആദ്യ സംസാരത്തിൽ ബാർബർ ബാലനൊന്നും കഥയിലില്ല. ഒരുമിച്ച് പഠിച്ച രണ്ടുപേർ. ഒരാൾ പ്രത്യേക സാഹചര്യത്തിൽ നാടുവിടേണ്ടി വരുന്നു. മറ്റെയാൾ വളർന്ന് സൂപ്പർ താരമാകുന്നു. എന്ന് വിചാരിച്ചാൽ കൃഷ്ണ- കുചേല സങ്കൽപ്പം. കാലങ്ങൾക്ക് ശേഷം കൃഷ്ണനെ കാണാൻ പോകുന്ന കുചേലൻ. അതായിരുന്നു ശ്രീനിയേട്ടൻ ഫോൺ കോളിൽ പറഞ്ഞ കഥ. 

അതുപോലെ മറ്റൊരനുഭവം പറയാം. ശ്രീനിയേട്ടന്റെ കൂടെ പഠിച്ച സുഹൃത്ത് തലശ്ശേരിയുണ്ട്. ഫോണിൽ ഇടയ്ക്ക് വിളിച്ച് സംസാരിക്കും. കോയമ്പത്തൂരിൽ ബനിയൻ കമ്പനിയുടെ ഉടമയാണ് അദ്ദേഹം. ഒരിക്കൽ ശ്രീനിയേട്ടൻ കോയമ്പത്തൂരിൽ പരിപാടിയ്ക്ക് പോയപ്പോൾ വേദിയ്ക്ക് പിറകിലേക്ക് ഇയാൾ വന്നു. പ്രായാധിക്യം മൂലം ആളാകെ മാറിയിട്ടുണ്ട്. പേര് പറഞ്ഞ് ശ്രീനിയേട്ടനെ പരിചയപ്പെട്ടു. ശ്രീനിയേട്ടന് ഉടൻ ഓർമ വന്നു വിശേഷങ്ങൾ ചോദിച്ചു. ' നമ്മൾ പരിചയക്കാരാണെന്ന് പറഞ്ഞിട്ട് മക്കളും ഭാര്യയുമൊന്നും വിശ്വസിക്കുന്നില്ല ഒന്ന് വീട് വരെ വരണം നമുക്ക് ഒരു ഫോട്ടെയൊക്കെ എടുത്തിട്ട് പോകാം' എന്ന് അയാൾ പറഞ്ഞു. ഇതുപോലെയുള്ള നിരവധി അനുഭവങ്ങൾ ശ്രീനിയേട്ടനുണ്ടായിട്ടുണ്ട്. അതുമായി സമാനമായൊരു സീൻ കഥയിലേക്ക് കൊണ്ടുവരാം എന്ന് തീരുമാനിച്ചു.

മമ്മൂക്കയില്ലെങ്കിൽ പടമില്ല...

 കഥയുടെ വൺലൈൻ റെഡിയായി. ഒരൊറ്റ കണ്ടീഷൻ ശ്രീനിയേട്ടൻ വച്ചു. ' സൂപ്പർസ്റ്റാർ അശോക് രാജിന്റെ റോൾ മമ്മൂട്ടി ചെയ്യണം.  അഞ്ചോ ആറോ സീനുകളോ മമ്മൂട്ടിയ്ക്ക് ഉണ്ടാവുകയുള്ളൂ. അതിഥി വേഷമായിരിക്കും. പ്രധാന കഥാപാത്രം നെടുമുടി വേണു ചേട്ടനെയെ മറ്റേവെച്ച് ചെയ്യിപ്പിക്കാം.' പ്രധാനകഥാപാത്രം വേണു ചേട്ടനെക്കാൾ ശ്രീനിയേട്ടൻ തന്നെ ചെയ്യുന്നതായിരിക്കും യോജിക്കുകയെന്ന് ഞാൻ പറഞ്ഞു. ' അത് പിന്നെ ആലോചിക്കാം , പക്ഷേ മമ്മൂട്ടി വരാതെ സിനിമ നിൽക്കില്ല.'  ശ്രീനിയേട്ടൻ തുടർന്നു. അതിഥി വേഷത്തിലൊക്കെ മെഗാസ്റ്റാറായ മമ്മൂക്ക വരുമോ എന്ന ടെൻഷനായി എനിക്കും. മമ്മൂക്കയില്ലെങ്കിൽ സിനിമ ചെയ്തിട്ടും കാര്യമില്ലെന്ന് എനിക്കും മനസിലായി. കാരണം അവസാനത്തെ ഇരുവരുടെയും കണ്ടുമുട്ടലിലാണ് സിനിമ നിൽക്കുന്നത്. അത് മമ്മൂക്കയല്ലാതെ മറ്റാര് ചെയ്താലും ശരിയാവില്ല. കഥ കേട്ടാൽ മമ്മൂക്ക സമ്മതിക്കുമെന്ന് മനസ് പറഞ്ഞു. എന്നാലും ചെറിയ ആശങ്ക അപ്പോഴുമുണ്ടായിരുന്നു.

ബാലൻ മാഷ് ബാർബറായി...

കുചേലൻ എന്നൊക്കെയായിരുന്നു ആദ്യം പേര് ആലോചിച്ചത്. പിന്നീട് ശ്രീനിയേട്ടൻ തന്നെയാണ് "കഥ പറയുമ്പോൾ' എന്ന പേര് സജസ്റ്റ് ചെയ്തത്. തിരക്കഥ പലവട്ടം മാറ്റിയെഴുതി. പ്രണയിച്ച് ഒളിച്ചോടിയ ബാലൻ ആരും എത്തിപ്പെടാത്ത മലയോര ഗ്രാമത്തിൽ എത്തിപ്പെടും എന്ന ചർച്ചയാണ് മേലുകാവ് പോലൊരു സ്ഥലത്തേക്ക് കഥ പശ്ചാത്തലം മാറ്റാൻ കാരണമായത്. കുറേ അലച്ചിലിനൊടുവിൽ പ്രൊഡക്ഷനിലെ ഡ്രൈവറായ ബിജുവാണ് അനുയോജ്യമായ മേലുകാവ് എന്ന സ്ഥലം കണ്ടെത്തിയത്. ഈരാറ്റുപേട്ടയ്ക്ക് അടുത്ത സ്ഥലമാണ് മേലുകാവ്. സ്ഥലത്തിന്റെ പേര് അതേപോലെ തന്നെ നൽകി. മേലുകാവ് എന്ന പേര് പാട്ടിലും ഉപയോഗിച്ചു. അത് ആ നാട്ടുകാർക്കും ഏറെ സന്തോഷം സമ്മാനിച്ചു. ആദ്യം ബാലൻ മാഷായിരുന്നു. എന്നാൽ മാഷായാൽ ദാരിദ്രവും കഷ്ടപ്പാടുകളും കാണിക്കാനാകില്ലെന്ന് ചർച്ച വന്നപ്പോൾ ബാർബറാക്കി മാറ്റി. അതുപോലെ സലീം കുമാറിന്റെ കവി കഥാപാത്രം നമ്മുടെ നാട്ടിലൊക്കെ കാണുന്ന ഒരാളാണ്. സ്വയം വലിയ സാഹിത്യകാരനാണെന്ന് പറഞ്ഞ് അധ്വാനിക്കാനൊന്നും തയ്യാറല്ലാത്ത ആര് വേണമെങ്കിലും നമ്മളെ ഇങ്ങോട്ട് വന്ന് കാണട്ടെ എന്ന് വിചാരിക്കുന്ന ഒരാൾ. അതുപോലെ ഇന്നസെന്റേട്ടൻ അവതരിപ്പിച്ച ഈപ്പച്ചൻ മുതലാളി എന്ന കഥാപാത്രത്തെ ഞാൻ പലയിടത്തും കണ്ടിട്ടുണ്ട്.

സത്യേട്ടന്റെ (സത്യൻ അന്തിക്കാട്) അസിസ്റ്റന്റായി ഞാൻ കുറെക്കാലം വർക്ക് ചെയ്തിരുന്നു. അതുപോലെ ശ്രീനിയേട്ടന്റെ അളിയനുമാണ്. ഈ രണ്ട് ലേബലും ഉള്ളത് കൊണ്ട് പലപ്പോഴും ചില കൊച്ചുമുതലാളിമാർ വന്ന് നമുക്ക് ഒരു സിനിമ ചെയ്താലേ എന്ന് ചോദിക്കും.  സംവിധാനം മോഹനൻ, ശ്രീനിയേട്ടൻ തിരക്കഥ, മമ്മൂക്കയോ മോഹൻലാലേ അഭിനയിക്കും എല്ലാം സെറ്റ് എന്നൊക്കെ പറഞ്ഞ് അവർ കൈതരും. കോൾ ഷീറ്റെന്ന് എന്തെന്നോ ഡേറ്റ് എടുക്കൽ എന്തെന്നോ തുടങ്ങി സിനിമയുടെ എബിസിഡി അറിയാത്ത കൈയിൽ അഞ്ചോ പത്തോ ലക്ഷം രൂപയുള്ള പാവങ്ങളാണ് എല്ലാം. വേഗം പ്രശസ്തനാകണമെന്ന് മോഹമാണ് അവർക്കെല്ലാം. അവരുടെ പ്രതിനിധിയാണ് ഈപ്പച്ചൻ മുതലാളി എന്ന കഥാപാത്രം.

ആദ്യ ദിനം മഴ...

പുതുമുഖ സംവിധാനകനായിട്ട് കൂടി ഒരു ടെൻഷനുമില്ലാതെ ഷൂട്ട് ചെയ്യാൻ എനിക്കായി. സുകുവേട്ടൻ (പി.സുകുമാർ ) ക്യാമറ ചെയ്തത് ഏറെ സഹായകമായി. എന്റെ ആദ്യ സിനിമ ആണെന്നറിയാവുന്നത് കൊണ്ട് തന്നെ തോളോട് തോൾ ചേർന്ന് നിന്ന് സഹായിച്ചു. ആദ്യ ദിനം ഉച്ചയ്ക്ക് ശേഷം മഴകാരണം ഷൂട്ട് നടന്നില്ല. 40 ദിവസമായിരുന്നു ഷൂട്ട് ഷെഡ്യൂൾ ചെയ്തത്. രണ്ടാം ദിവസവും ഉച്ചയ്ക്ക് ശേഷം മഴ പെയ്തു. ഷൂട്ട് നീണ്ടുപോകുമോ എന്ന് ഒരു ടെൻഷനായി. ദിവസം കൂടിയാലും മികച്ച രീതിയിൽ മാത്രമേ നമ്മൾ ഇത് പുറത്തിറക്കുകയുള്ളൂ എന്ന് ശ്രീനിയേട്ടൻ പറഞ്ഞു. പക്ഷേ പിന്നീടുള്ള ദിവസങ്ങളിൽ കാലാവസ്ഥ അനുകൂലമായി. ചാർട്ടിങ്ങ് അനുസരിച്ച് 38 ദിവസങ്ങൾ കൊണ്ട് ഷൂട്ട് തീർക്കാനായി. മരിച്ചുപോയ ഷഫീർ സേട്ടായിരുന്നു പ്രൊഡക്ഷൻ കൺട്രോളർ. 

സമയം അധികമായതിനാൽ ഒരു ക്യാമറ റൺ ഔട്ട് ആയി. മമ്മൂക്കയുടെ കുറച്ച് ഗംഭീര ഷോട്ടുകൾ നമുക്ക് നഷ്ടമായി. അശോക് രാജിന്റെ സീനുകൾ ഷൂട്ട് തീർന്ന ദിവസം ഞാൻ പോയി മമ്മൂക്കയോട് എല്ലാം ഓക്കെയാണെന്നും മമ്മൂക്കയുടെ ഭാഗങ്ങൾ തീർന്നെന്നും പറഞ്ഞു. നന്ദിയും പറഞ്ഞ് അദ്ദേഹത്തെ യാത്രയാക്കി. കുറച്ച് ദൂരം നടന്നപ്പോൾ അദ്ദേഹം എന്നെ ഒറ്റയ്ക്ക് കാറിനടുത്തേക്ക് വിളിപ്പിച്ചു. എന്തെങ്കിലും തെറ്റ് പറ്റിയോ എന്ന ടെൻഷനോടെയാണ് ഞാൻ അരികിലേക്ക് പോയത്. അദ്ദേഹം കൈയിൽ കൈവച്ച് പടം നന്നായിവരുമെന്നും ഹിറ്റായി മാറുമെന്ന് പറഞ്ഞു. 

കൈക്കൂലിയും കത്രികയും...

പടം ഫസ്റ്റ് കോപ്പി കണ്ടപ്പോൾ സംവിധായകൻ അൻവർ റഷീദ് സംഭവം നന്നായിട്ടുണ്ടെന്നും കോമഡിയും ഇമോഷണൽ രംഗങ്ങളും വർക്ക് ചെയ്യുന്നുണ്ടെന്നും വിജയിക്കുമെന്നും പറഞ്ഞു. അത് ഞങ്ങൾക്ക് ഏറെ സന്തോഷം നൽകി. കാരണം ആദ്യമായി പുറത്ത് നിന്നൊരാൾ കണ്ട് മികച്ച അഭിപ്രായം പറയുകയാണ്. അതുപോലെ സെൻസറിങ് സമയത്ത് കൈക്കൂലിയെ കുറിച്ചൊക്കെ പറയുന്ന ഭാഗത്ത് കത്രിക വീഴുമോ എന്നൊരു ഭയമുണ്ടായിരുന്നു. എന്നാൽ പടം കണ്ട് കഴിഞ്ഞപ്പോൾ എവിടെയും കത്രിക വെക്കുന്നില്ലെന്നും ഗംഭീരമായിട്ടുണ്ടെന്നും ബോർഡ് അംഗങ്ങൾ പറഞ്ഞു. സെൻസറിങ് ഓഫീസർ റൂമിലേക്ക് വിളിച്ച് അഭിനന്ദിക്കുകയും എല്ലാ ആശംസയും അറിയിച്ചു.

2007 ഡിസംബർ 14 നായിരുന്നു റിലീസ്. അന്നേ ദിവസം തലശേരിയിലായിരുന്നു ഞാൻ. ചിത്രവാണി ടാക്കീസിനു എതിർഭാഗത്ത് ആദ്യ ഷോ കഴിഞ്ഞതിന്റെ പ്രതികരണം അറിയാൻ പോയി നിന്നു. പകുതി ഓഡിയൻസ് മാത്രമേ ആദ്യ ഷോയ്ക്ക് അവിടെ ഉണ്ടായിരുന്നുള്ളു. ചിലർ ഇറങ്ങിവന്ന് കുഴപ്പമില്ലാത്ത പടമാണെന്ന് പറഞ്ഞു. മെല്ലെ ഞാൻ തിയേറ്ററിനുള്ളിലേക്ക് നീങ്ങി. അപ്പോൾ എന്റെ നല്ലൊരു സുഹൃത്ത് പടം കണ്ട് ഇറങ്ങിവരുന്നുണ്ടായിരുന്നു. മോഹനൻ മണ്ടോടി എന്ന പേരിലാണ് നാട്ടിലെല്ലാം ഞാൻ അറിയപ്പെടുന്നത്. അതിനാൽ കഥ പറയുമ്പോൾ ഞാനാണ് സംവിധാനം ചെയ്തതെന്ന് അവനൊന്നും അറിയില്ല. അവൻ നേരെ വന്നിട്ട് ചോദിച്ചു. 'എടാ പടം കണ്ടോ, ഗംഭീരമായിട്ടുണ്ട്. ശ്രീനിയേട്ടനും മമ്മൂക്കയുമെല്ലാം കണ്ണുനിറയിപ്പിച്ചു. പുതിയ സംവിധായകനാണെന്ന് തോന്നുന്നു. നിനക്കറിയുമോ ആളേ' എന്ന്. ഞാൻ തന്നെയാണ് സംവിധാനം ചെയ്തത് എന്ന് പറഞ്ഞപ്പോൾ അവൻ സന്തോഷം കൊണ്ട് കെട്ടിപ്പിടിച്ചു. 

എന്താടാ എന്നെ മറന്നോ...?

എല്ലായിടത്തും നിന്നും ഗംഭീര റിപ്പോർട്ടുകൾ വന്നു. പലരും വിളിച്ചു. പടം സൂപ്പർഹിറ്റായി മാറി. സന്തോഷം അറിയിക്കാനായി ഞാൻ മമ്മൂക്കയെ വിളിച്ചു. അദ്ദേഹം ചെന്നൈയിൽ ആയിരുന്നു ഫോണിൽ കിട്ടിയില്ല. ജോർജേട്ടന്റെ ഫോണിലേക്കും പലവട്ടം ശ്രമിച്ചിട്ടും കോൾ കിട്ടിയില്ല.

കഥ പറയുമ്പോൾ നിറഞ്ഞ സദസ്സിൽ 100 ദിനം പ്രദർശിപ്പിക്കുകയും  കൊച്ചിയിൽ വച്ച്  വൻവിജയാഘോഷം നടക്കുകയും ചെയ്തു. പിന്നീട് കുശേലൻ എന്ന പേരിൽ തമിഴിലും, ബില്ലു എന്ന പേരിൽ ഹിന്ദിയിലും പടം റീമേക്ക് ചെയ്യപ്പെട്ടു. രജനീകാന്തും ഷാരൂഖ് ഖാനുമൊക്കെയായിരുന്നു റീമേക്കുകളിൽ അഭിനയിച്ചത്. ജനപ്രീതിയും കലാമൂല്യവുമുള്ള ചിത്രത്തിനുള്ള 2017 ലെ സംസ്ഥാന പുരസ്‌കാരവും ചിത്രം സ്വന്തമാക്കി.