‘അവളുടെ കണ്ണുകൾ ഐശ്വര്യ റായിയുടേത് പോലെയാണ്, ഒരുപാട് കഷ്ടപ്പെട്ടാണ് സിനിമയിലേക്ക് വന്നത്’

പ്രിയദർശൻ സംവിധാനം ചെയ്യുന്ന 'ഭൂത് ബംഗ്ലാ' (Bhooth Bangla) എന്ന ചിത്രത്തിൽ അക്ഷയ് കുമാറും വാമിഖ ഗബ്ബിയുമാണ് പ്രധാന വേഷങ്ങളിൽ അഭിനയിക്കുന്നത്. അടുത്തിടെ ശുഭങ്കർ മിശ്രയുമായി നടത്തിയ സംഭാഷണത്തിൽ, ഐശ്വര്യ റായിയോടും കത്രീന കൈഫിനോടും വാമിഖയെ ഉപമിക്കുന്നതിനെതിരെ അക്ഷയ് കുമാർ പ്രതികരിച്ചിരുന്നു.

സിനിമയിൽ വാമിഖയുടേത് തനതായ യാത്രയാണെന്ന് അക്ഷയ് കുമാർ ചൂണ്ടിക്കാട്ടി. സോഷ്യൽ മീഡിയയിൽ പലരും അക്ഷയ്-വാമിഖ ജോഡിയെ അക്ഷയ്-കത്രീന കൂട്ടുകെട്ടിനോട് ഉപമിക്കുമ്പോൾ, വാമിഖയുടെ കണ്ണുകളിലെ സാമ്യം കാരണം ഐശ്വര്യ റായിയോടും പലരും താരതമ്യം ചെയ്യുന്നുണ്ട്. ഇതിനെക്കുറിച്ച് അക്ഷയ് പറഞ്ഞത് ഇങ്ങനെ: "അവളുടെ (വാമിഖയുടെ) കണ്ണുകൾ ഐശ്വര്യ റായിയുടേത് പോലെയാണ്, പക്ഷേ അവൾക്ക് സ്വന്തമായൊരു വ്യക്തിത്വമുണ്ട്. അവൾ അവളുടേതായ രീതിയിലാണ് കാര്യങ്ങൾ ചെയ്യുന്നത്. ഒരുപാട് കഷ്ടപ്പെട്ടാണ് അവൾ സിനിമാ രംഗത്തേക്ക് വന്നത്. പഞ്ചാബി സിനിമകളിൽ പ്രവർത്തിച്ചു, ഇപ്പോൾ ഹിന്ദി, തെലുങ്ക്, തമിഴ് സിനിമകളിലും അവൾ സജീവമാണ്."

തന്നെ, ‘ഐശ്വര്യയുടെ മകൾ’ എന്ന് വിളിക്കുന്നതിനോട് വാമിഖയും നേരത്തെ തമാശരൂപേണ പ്രതികരിച്ചിരുന്നു.

ഭൂത് ബംഗ്ലാ

14 വർഷത്തിന് ശേഷം അക്ഷയ് കുമാറും പ്രിയദർശനും ഒന്നിക്കുന്ന ഹൊറർ-കോമഡി ചിത്രമാണ് 'ഭൂത് ബംഗ്ലാ'. രാജ്പാൽ യാദവ്, പരേഷ് റാവൽ, ജിഷു സെൻഗുപ്ത, തബു എന്നിവരും ഇതിൽ പ്രധാന വേഷങ്ങളിൽ എത്തുന്നു. സമ്മിശ്ര പ്രതികരണങ്ങളാണ് ലഭിച്ചതെങ്കിലും ചിത്രം ഇതുവരെ ഏകദേശം 35 കോടി രൂപ കളക്ഷൻ നേടി.

ലണ്ടനിൽ താമസിക്കുന്ന അർജുനും (അക്ഷയ് കുമാർ) സഹോദരിയും അവരുടെ മുത്തച്ഛനിൽ നിന്ന് വലിയൊരു കൊട്ടാരവും സമ്പത്തും അവകാശമായി സ്വീകരിക്കുന്നു. സഹോദരിയുടെ വിവാഹത്തിനായി അർജുൻ ഇന്ത്യയിലെ മംഗൽപൂരിലെത്തുന്നു. എന്നാൽ 'വധുസൂർ' എന്ന ദുരൂഹ ശക്തി വധുവിനെ തട്ടിക്കൊണ്ടുപോകുന്നതിനാൽ ഗ്രാമത്തിൽ വിവാഹങ്ങൾ പൂർത്തിയാകില്ലെന്ന ഒരു വിശ്വാസമുണ്ട്. ഇതിനെത്തുടർന്നുണ്ടാകുന്ന സംഭവങ്ങളാണ് സിനിമയുടെ ഇതിവൃത്തം.

അഹമ്മദ് ഖാൻ സംവിധാനം ചെയ്യുന്ന 'വെൽക്കം ടു ദി ജംഗിൾ' ആണ് അക്ഷയ് കുമാറിന്റെ അടുത്ത ചിത്രം. സുനിൽ ഷെട്ടി, ദിഷ പട്ടാണി, രവീണ ടണ്ടൻ, സഞ്ജയ് ദത്ത് തുടങ്ങി വലിയൊരു താരനിര തന്നെ ഇതിലുണ്ട്. ജൂൺ 6-ന് ചിത്രം തിയേറ്ററുകളിൽ എത്തും.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi