അവർക്കങ്ങനെ ഒരു ആഗ്രഹമുണ്ടെങ്കിൽ അത് രണ്ട് കുടുംബങ്ങളെയും സന്തോഷിപ്പിക്കുന്നതല്ലേ?-ലിസിയന്ന് പറഞ്ഞു

താരങ്ങളായ കല്യാണി പ്രിയദർശനും പ്രണവ് മോഹൻലാലും തമ്മിൽ പ്രണയത്തിലാണെന്ന തരത്തിലുള്ള അഭ്യൂഹങ്ങൾ തുടങ്ങിയിട്ട് കാലം കുറേയായി. ഇപ്പോഴിതാ വീണ്ടും സോഷ്യൽ മീഡിയയിൽ വീണ്ടും ഇക്കാര്യം ചർച്ചയാകുന്നുണ്ട്. ഇരുവരുടെയും കുടുംബങ്ങളുമായി അടുത്ത ബന്ധമുള്ളവർ വർഷങ്ങളായി ഇത് നിഷേധിക്കുന്നുണ്ടെങ്കിലും പ്രചരണങ്ങൾ അവസാനിച്ചിട്ടില്ല. എന്നാൽ ഇപ്പോൾ, കല്യാണിയുടെ അമ്മ ലിസി തന്നെ ഈ കാര്യത്തിൽ വ്യക്തത വരുത്തിയിരിക്കുകയാണ്. തന്റെ പുതിയ പോസ്റ്റിന് താഴെ ഒരു ആരാധകന് മറുപടി നൽകിക്കൊണ്ടാണ് അവർ പ്രതികരിച്ചത്.

2022-ൽ പുറത്തിറങ്ങിയ ഹൃദയം എന്ന സിനിമയിൽ ഇരുവരും ദമ്പതികളായി അഭിനയിച്ചതോടെയാണ് ഈ ഗോസിപ്പുകൾക്ക് വീണ്ടും ജീവൻ വെച്ചത്. ഇവരുടെ ഓൺ-സ്ക്രീൻ കെമിസ്ട്രിയും ഇരു കുടുംബങ്ങളും തമ്മിലുള്ള ബന്ധവുമാണ് ഇവർ പ്രണയത്തിലാണെന്നും ഉടൻ വിവാഹിതരാകുമെന്നുമുള്ള പ്രചരണങ്ങൾക്ക് ആക്കം കൂട്ടിയത്.

വിഷു ആശംസകൾ നേർന്നുകൊണ്ട് ലിസി പങ്കുവെച്ച സോഷ്യൽ മീഡിയ പോസ്റ്റിന് താഴെയാണ് പുതിയ സംഭവവികാസങ്ങൾ ഉണ്ടായത്. കല്യാണിയുടെയും പ്രണവിന്റെയും വിവാഹം ഉടൻ ഉണ്ടാകുമെന്ന പ്രതീക്ഷ പങ്കുവെച്ച ഒരു കമന്റിന്, "ഇത് തെറ്റായ വാർത്തയാണ്" എന്ന് ലിസി കൃത്യമായി മറുപടി നൽകി. ഇതോടെ പുതിയ വിവാദങ്ങൾക്ക് താൽക്കാലിക വിരാമമായി.

ഈ ചർച്ചകൾക്കിടയിൽ സംവിധായകൻ ആലപ്പി അഷ്റഫ് മുൻപ് നടത്തിയ വെളിപ്പെടുത്തലുകളും ഇപ്പോൾ ശ്രദ്ധ നേടുന്നുണ്ട്. മനോരമ ന്യൂസ് റിപ്പോർട്ട് ചെയ്തതനുസരിച്ച്, ഇതേക്കുറിച്ച് ലിസിയോട് നേരിട്ട് ചോദിച്ച കാര്യം അദ്ദേഹം മുൻപ് പങ്കുവെച്ചിരുന്നു. "കല്യാണിയും പ്രണവും വിവാഹിതരാകുമോ എന്നറിയാൻ പലർക്കും കൗതുകമുണ്ട്. പലരും അത് ആഗ്രഹിക്കുന്നുണ്ടാകാം. ഞാൻ ഇതിനെക്കുറിച്ച് നേരിട്ട് ലിസിയോട് ചോദിച്ചു. അന്ന് ലിസി പറഞ്ഞത് ഇങ്ങനെയാണ്: 'അഷ്റഫ് ഇക്കാ, അവർക്ക് അങ്ങനെ ഒരു ആഗ്രഹമുണ്ടെങ്കിൽ അത് രണ്ട് കുടുംബങ്ങളെയും സന്തോഷിപ്പിക്കുന്ന കാര്യമല്ലേ? എന്നാൽ അവർക്കിടയിൽ അത്തരമൊരു ബന്ധമില്ല. കുട്ടിക്കാലം മുതൽ അവർ സഹോദരങ്ങളെപ്പോലെയാണ് വളർന്നത്. കുട്ടികൾക്കിടയിൽ പ്രണവ് (അപ്പു) ഒരു ഹീറോയെപ്പോലെയായിരുന്നു. കല്യാണി ഇതുവരെ ആരുമായും പ്രണയത്തിലായിട്ടില്ല, എനിക്ക് ആ ഉറപ്പുണ്ട്'."

പത്ത് വർഷത്തോളമായി ലിസിയും മുൻ ഭർത്താവ് പ്രിയദർശനും വേർപിരിഞ്ഞിട്ട്. എന്നാൽ അടുത്തിടെയാണ് വീണ്ടും ലിസിയുമായി ഒരുമിച്ച് താമസിക്കാൻ തീരുമാനിച്ച വിവരം അദ്ദേഹം വെളിപ്പെടുത്തിത്. തങ്ങൾ ഇപ്പോൾ ഒരുമിച്ചാണ് താമസിക്കുന്നതെന്നും എന്നാൽ വീണ്ടും ഒരു വിവാഹത്തിന് തൽക്കാലം പദ്ധതിയില്ലെന്നും പ്രിയദർശൻ ‘മിഡ്-ഡേ’യോട് വ്യക്തമാക്കി.

കല്യാണി പ്രിയദർശൻ നായികയാകുന്ന 'ലോക ചാപ്റ്റർ 2' എന്ന ചിത്രത്തിന്റെ ചിത്രീകരണം 2026 സെപ്റ്റംബറിൽ ആരംഭിക്കുമെന്നാണ് പ്രതീക്ഷിക്കുന്നത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi