എന്തുകൊണ്ടാണ് സൂര്യയ്‌ക്ക് വില്ലനായി നസ്ലിനെ തിരഞ്ഞെടുത്തത്; കാരണം വെളിപ്പെടുത്തി സംവിധായകൻ

തമിഴ് – മലയാളി പ്രേക്ഷകർ ഒരുപോലെ ‌കാത്തിരിക്കുന്ന ചിത്രമാണ് സൂര്യ നായകനാകുന്ന 'സീൻ' (Scene). 'രോമാഞ്ചം', 'ആവേശം' എന്നീ ഹിറ്റ് ചിത്രങ്ങൾക്ക് ശേഷം ജിത്തു മാധവൻ സംവിധാനം ചെയ്യുന്ന ഈ ചിത്രം നവംബർ 6-ന് തിയേറ്ററുകളിലെത്തുകയാണ്. ജിത്തു മാധവന്റെ തമിഴ് അരങ്ങേറ്റത്തോടൊപ്പം തന്നെ സിനിമാപ്രേമികളെ ഒന്നടങ്കം അമ്പരപ്പിക്കുന്നത് ചിത്രത്തിലെ വില്ലന്റെ കാസ്റ്റിങ്ങാണ്. മലയാളികളുടെ പ്രിയ യുവതാരം, നസ്ലിനാണ് സൂര്യയുടെ പ്രധാന പ്രതിനായകനായി ചിത്രത്തിൽ വേഷമിടുന്നത്.

2019-ൽ 'തണ്ണീർമത്തൻ ദിനങ്ങൾ' എന്ന ചിത്രത്തിലൂടെ അഭിനയരംഗത്തെത്തിയ നസ്ലിൻ, വളരെ ചുരുങ്ങിയ സമയം കൊണ്ട് പ്രേക്ഷകരുടെ പ്രിയങ്കരനായി മാറിയ നടനാണ്. ഗിരീഷ് എ.ഡി. സംവിധാനം ചെയ്ത 'പ്രേമലു'വിന്റെ വൻ വിജയം നസ്ലിനെ ദക്ഷിണേന്ത്യയൊട്ടാകെ ആരാധകരുള്ള താരമാക്കി. നിഷ്കളങ്കമായ ചിരിയും മികച്ച കോമഡി ടൈമിങ്ങും കൊണ്ട് പ്രേക്ഷകരെ കയ്യിലെടുത്ത നസ്ലിന്റെ തമിഴ് അരങ്ങേറ്റം പക്ഷേ, കേവലം ഒരു ചോക്ലേറ്റ് നായക വേഷത്തിലല്ല എന്നത് ഏവരെയും അത്ഭുതപ്പെടുത്തുന്നു.

സൂര്യയെപ്പോലൊരു സൂപ്പർതാരത്തിന്റെ ചിത്രത്തിൽ, വളരെ ചെറിയ പ്രായമുള്ള ഒരു യുവതാരം ശക്തനായ വില്ലനായി എത്തുന്നത് തമിഴ് സിനിമയിൽ അപൂർവ്വമായ കാഴ്ചയാണ്. നസ്ലിനൊപ്പം ഒരു സിനിമ ചെയ്യണമെന്ന് തനിക്ക് പണ്ടേ ആഗ്രഹമുണ്ടായിരുന്നു എന്ന് ജിത്തു മാധവൻ വ്യക്തമാക്കുന്നു. അവന്റെ മുൻകാല ചിത്രങ്ങളെല്ലാം കണ്ടിട്ടുണ്ടെന്നും, എന്നാൽ പ്രേക്ഷകർ ഇതുവരെ കണ്ട അതേ രീതിയിൽ നസ്ലിനെ വീണ്ടും അവതരിപ്പിക്കാൻ താല്പര്യമില്ലായിരുന്നു എന്നും ജിത്തു പറയുന്നു. 'സീൻ' എന്ന ചിത്രത്തിലെ ഈ കഥാപാത്രം അവനിൽ നിന്ന് വേറിട്ട എന്തോ ഒന്ന് ആവശ്യപ്പെടുന്നുണ്ടെന്ന് തോന്നിയെന്നും, സംസാരിച്ചപ്പോൾ നസ്ലിനും ആ ആശയത്തോട് വലിയ സന്തോഷമായിരുന്നു എന്നും സംവിധായകൻ കൂട്ടിച്ചേർക്കുന്നു.

കഥാപാത്രത്തിന് അങ്ങനെയൊരു പ്രായവും സ്വഭാവവുമാണ് ആവശ്യമായിരുന്നതെന്നും, പ്രായം മാത്രം നോക്കിയുള്ള തീരുമാനമായിരുന്നില്ല ഇതെന്നും ജിത്തു വെളിപ്പെടുത്തി. നസ്ലിൻ അസാമാന്യ കഴിവും ബുദ്ധിയുമുള്ള ഒരു കലാകാരനാണെന്നും അവന്റെ അഭിനയശേഷിയുടെ ഒരു ചെറിയ ഭാഗം മാത്രമേ നമ്മൾ ഇതുവരെ കണ്ടിട്ടുള്ളൂ എന്നും പറഞ്ഞു. ഭാവിയിൽ പ്രേക്ഷകർ ഇതുവരെ കാണാത്ത തലത്തിലുള്ള മികച്ച പ്രകടനങ്ങൾ അവനിൽ നിന്ന് കാണാമെന്നും, അവന്റെ കഴിവ് കേരളത്തിനും ദക്ഷിണേന്ത്യയ്ക്കും അപ്പുറത്തേക്ക് വളരുമെന്നും ജിത്തു ഉറച്ചു വിശ്വസിക്കുന്നു.

സൂര്യയും ജ്യോതികയും ചേർന്ന് 2D എന്റർടൈൻമെന്റ്സിന്റെ ബാനറിൽ നിർമ്മിക്കുന്ന ഈ ചിത്രത്തിന് സംഗീതം പകരുന്നത് സുഷിൻ ശ്യാം ആണ്. ജിത്തു മാധവന്റെയും നസ്ലിന്റെയും തമിഴ് അരങ്ങേറ്റത്തിന് പുറമെ, 12 വർഷങ്ങൾക്ക് ശേഷമുള്ള നസ്രിയ നസീമിന്റെ തമിഴിലേക്കുള്ള തിരിച്ചുവരവ് കൂടിയാണ് 'സീൻ'. 

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi