ജോലിക്കിടെ ബ്രേക്ക് എടുക്കുന്നത് മടിയല്ല; എന്താണ് മൈക്രോ-റെസ്റ്റ്?

തിരക്കുകളൊന്നുമില്ലാത്ത ഒരു വാരാന്ത്യം… ഇങ്ങനെയൊക്കെയാണ് സാധാരണ നമ്മുടെ മനസ്സിലേക്ക് വരുന്നത്. എന്നാൽ ദിവസം മുഴുവൻ ചെയ്യുന്ന ജോലികൾക്കിടയിൽ ശരീരത്തിനും മനസ്സിനും ചെറിയ ഇടവേളകൾ നൽകുന്ന ശീലമാണ് 'മൈക്രോ-റെസ്റ്റ്'.

പേരുപോലെ തന്നെ വളരെ ചെറിയ വിശ്രമമാണിത്. ഏതാനും സെക്കൻഡുകൾ മുതൽ പരമാവധി ഏതാനും മിനിറ്റുകൾ വരെ നീളുന്ന ഈ ഇടവേളകൾ ക്ഷീണം അമിതമാകുന്നതിന് മുമ്പ് ശരീരത്തിനും തലച്ചോറിനും ഒരു ചെറിയ വീണ്ടെടുപ്പ് സമയം നൽകുന്നു.

2022-ൽ പ്രസിദ്ധീകരിച്ച 22 പഠനങ്ങളിൽ നിന്നുള്ള 2,335 പേരുടെ വിവരങ്ങൾ ഉൾപ്പെടുത്തിയ വിശകലനത്തിൽ, ഇത്തരം ചെറിയ ഇടവേളകൾ ക്ഷീണം കുറയ്ക്കുന്നതിലും ഉന്മേഷം വർധിപ്പിക്കുന്നതിലും ചെറിയെങ്കിലും ശ്രദ്ധേയമായ ഗുണങ്ങൾ കണ്ടെത്തിയിരുന്നു.

എന്താണ് മൈക്രോ-റെസ്റ്റ്?
ഒരു ജോലിയിൽനിന്ന് മറ്റൊരു ജോലിയിലേക്ക് മാറുന്നതല്ല മൈക്രോ-റെസ്റ്റ്. ചെയ്തുകൊണ്ടിരിക്കുന്ന കാര്യങ്ങളിൽനിന്ന് കുറച്ചുസമയത്തേക്ക് പൂർണമായി വിട്ടുനിൽക്കുകയാണ് ഇതിന്റെ പ്രധാന ആശയം.

30 സെക്കൻഡ് മുതൽ ഏതാനും മിനിറ്റുകൾ വരെ നീളുന്ന, മനഃപൂർവം എടുക്കുന്ന ഇടവേളയാണ് മൈക്രോ-റെസ്റ്റ്. ആ സമയത്ത് മറ്റൊരു ജോലിയിലേക്ക് മാറാതെ പൂർണമായി ശരീരവും മനസ്സും വിട്ടുനിൽ‌ക്കണമെന്നാണ് വിദഗ്ധർ പറയുന്നത്. 

കണ്ണുകളടച്ച് അൽപനേരം ഇരിക്കുക, തോളുകൾ അയച്ചുവയ്ക്കുക, പതുക്കെ ശ്വസിക്കുക, ജനാലയിലൂടെ പുറത്തേക്ക് നോക്കുക, ശരീരം നന്നായി സ്ട്രെച്ച് ചെയ്യുക, കുറച്ചുസമയം നടക്കുക...ഇവയെല്ലാം മൈക്രോ-റെസ്റ്റിന്റെ ഭാഗമാക്കാം.

അതേസമയം, കമ്പ്യൂട്ടറിനുമുന്നിൽനിന്ന് മാറിയിരുന്ന് പിന്നീട് ഫോണിൽ ഇൻസ്റ്റഗ്രാം തുറക്കുന്നത് വിശ്രമമല്ല. ആ സമയത്ത് വീണ്ടും തലച്ചോറിന് പുതിയ വിവരങ്ങൾ ശ്രദ്ധിക്കുകയും പ്രോസസ് ചെയ്യുകയും വേണ്ടിവരും. അതുകൊണ്ട് ടാസ്‌ക് മാറ്റുന്നതും മൈക്രോ-റെസ്റ്റും ഒന്നല്ല. 

ചെറിയ ഇടവേള, വലിയ മാറ്റം
തുടർച്ചയായ ശ്രദ്ധ, ദീർഘനേരത്തെ സ്‌ക്രീൻ ഉപയോഗം, ഒരേ ഇരിപ്പിലുള്ള ജോലി എന്നിവ ശരീരത്തിനും മനസ്സിനും വ്യത്യസ്ത തരത്തിലുള്ള ക്ഷീണമുണ്ടാക്കാം. ഇടയ്‌ക്കൊന്ന് നിർത്തുന്നത് ഇതേ രീതിയിലുള്ള തുടർച്ചയായ സമ്മർദത്തിൽനിന്ന് പുറത്തുകടക്കാൻ സഹായിക്കും.

ഇരിപ്പിന്റെ രീതി മാറ്റുകയോ കുറച്ചുസമയം നടക്കുകയോ ചെയ്യുന്നത് പേശികളിലെ വലിവ് കുറയ്ക്കാൻ സഹായിച്ചേക്കാം. പതുക്കെയുള്ള ശ്വാസോച്ഛ്വാസം സമ്മർദമുള്ള സമയങ്ങളിൽ ശരീരത്തെ ശാന്തമാക്കാനും സഹായിക്കും.

എത്ര നേരം?
30 സെക്കൻഡ് മുതൽ അഞ്ച് മിനിറ്റ് വരെ, ഏകദേശം 60-90 മിനിറ്റിലൊരിക്കൽ ചെറിയ ഇടവേള എടുക്കാമെന്നാണ് വിദഗ്ധരുടെ നിർദേശം. എന്നാൽ എല്ലാവർക്കും ഒരുപോലെ ബാധകമായ കൃത്യമായ ഇടവേള ശാസ്ത്രീയമായി നിർണയിച്ചിട്ടില്ല. അതുകൊണ്ട് ശരീരം നൽകുന്ന സൂചനകൾ ശ്രദ്ധിക്കുന്നതാണ് പ്രധാനം.

• ഒരേ വാചകം വീണ്ടും വീണ്ടും വായിക്കേണ്ടിവരുന്നുണ്ടോ?
• ചെറിയ കാര്യങ്ങൾക്കുപോലും ദേഷ്യം വരുകയോ അസ്വസ്ഥത തോന്നുകയോ ചെയ്യുന്നുണ്ടോ?
• തോളുകൾ വലിഞ്ഞിരിക്കുന്നതായി തോന്നുന്നുണ്ടോ?
• കണ്ണുകൾക്ക് അസ്വസ്ഥതയുണ്ടോ?
• 'ഇനി തല പ്രവർത്തിക്കുന്നില്ല' എന്ന തോന്നലുണ്ടോ?

ഇത്തരം സൂചനകൾ ലഭിക്കുമ്പോൾ കുറച്ചുസമയം നിർത്തിവയ്ക്കുന്നത് സഹായകരമായേക്കാം. പ്രത്യേകിച്ച് ദിവസം മുഴുവൻ സ്‌ക്രീനിന് മുന്നിൽ ചെലവഴിക്കുന്നവർക്ക് ഇടയ്‌ക്കൊന്ന് എഴുന്നേറ്റ് മാറിനിൽക്കുന്നത് പ്രയോജനപ്പെടാം.

മൈക്രോ-റെസ്റ്റ് ഉറക്കത്തിനും വീണ്ടെടുപ്പിനും
പകൽ സമയത്തെ ക്ഷീണം അമിതമായി അടിഞ്ഞുകൂടുന്നത് തടയാൻ മൈക്രോ-റെസ്റ്റ് സഹായിച്ചേക്കാം. എന്നാൽ നല്ല ഉറക്കത്തിന് പകരമല്ല ഇത്. ക്ഷീണം പൂർണമായി പിടികൂടുന്നതിന് മുമ്പ് തലച്ചോറിനും ശരീരത്തിനും വീണ്ടെടുക്കാനുള്ള അവസരം നൽകുകയാണ് സ്ഥിരമായ മൈക്രോ-റെസ്റ്റുകൾ ചെയ്യുന്നത്.

അതേസമയം, മൈക്രോ-റെസ്റ്റ് നേരിട്ട് ഉറക്കത്തിന്റെ ഗുണനിലവാരം മെച്ചപ്പെടുത്തുമെന്ന് തെളിയിക്കുന്ന ശക്തമായ തെളിവുകൾ നിലവിൽ പരിമിതമാണ്. അതിനാൽ ഇതിനെ ഉറക്കത്തിനുള്ള പരിഹാരമായി കാണേണ്ടതില്ല.

ദിവസാവസാനം തീർത്തും തളർന്നശേഷം മാത്രം വിശ്രമിക്കുന്നതിന് പകരം, ദിവസത്തിനിടയിലും ശരീരത്തിന് ചെറിയ വീണ്ടെടുപ്പ് സമയം നൽകുക എന്നതാണ് മൈക്രോ-റെസ്റ്റിന്റെ പ്രായോഗിക ഗുണം. അഞ്ച് മിനിറ്റ് വിശ്രമിച്ച ശേഷം ഉന്മേഷം തോന്നുന്നുണ്ടെങ്കിൽ ആ ഇടവേള ആവശ്യമായ ഗുണം നൽകിയെന്ന് കരുതാം.

എന്നാൽ വിശ്രമിച്ചിട്ടും ക്ഷീണം മാറുന്നില്ലെങ്കിൽ, ശ്രദ്ധ കേന്ദ്രീകരിക്കാൻ ബുദ്ധിമുട്ടുണ്ടെങ്കിൽ, തലകറക്കം, വേദന, ഉറക്കത്തിലെ തടസ്സങ്ങൾ എന്നിവ തുടരുകയാണെങ്കിൽ ഏതാനും മിനിറ്റുകളുടെ ഇടവേള മാത്രം മതിയാകില്ല. അത്തരം സാഹചര്യങ്ങളിൽ കൂടുതൽ വിശ്രമവും ആവശ്യമായാൽ ആരോഗ്യവിദഗ്ധന്റെ നിർദേശവും തേടണം.

വിശ്രമം എന്നത് ജോലി തീർന്നശേഷം മാത്രം ലഭിക്കേണ്ട ഒന്നല്ല. ക്ഷീണം വരുന്നതിന് മുമ്പ് ശരീരത്തിനും മനസ്സിനും നൽകുന്ന ചെറിയ ഇടവേളകളും സ്വയം പരിചരണത്തിന്റെ ഭാഗമാണ്. അതാണ് മൈക്രോ-റെസ്റ്റ്.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi