മുടികൊഴിച്ചിൽ സാധാരണമാണോ; എപ്പോൾ ഗൗരവമായി കാണണം?

രാവിലെ ഉണരുമ്പോൾ തലയിണയിലോ, കുളികഴിഞ്ഞു മുടി ചീകുമ്പോഴോ കുറച്ചു മുടി കൊഴിഞ്ഞുവീഴുന്നത് തികച്ചും സാധാരണമാണ്. എന്നാൽ, പെട്ടെന്ന് ഒരു ദിവസം മുതൽ അമിതമായി മുടി കൊഴിയാൻ തുടങ്ങിയാൽ അത് കേവലം കാലാവസ്ഥാ വ്യതിയാനം കൊണ്ടാണോ അതോ മറ്റ് എന്തെങ്കിലും ആരോഗ്യപ്രശ്നങ്ങളുടെ ലക്ഷണമാണോ എന്ന് പലരും ആശങ്കപ്പെടാറുണ്ട്. ദിവസേനയുള്ള സ്വാഭാവിക മുടികൊഴിച്ചിലും അടിയന്തര ശ്രദ്ധ അർഹിക്കുന്ന ഗുരുതരമായ മുടികൊഴിച്ചിലും തമ്മിലുള്ള വ്യത്യാസം തിരിച്ചറിയേണ്ടത് ആരോഗ്യകരമായ മുടിസംരക്ഷണത്തിന് അത്യാവശ്യമാണ്.

എത്രത്തോളം മുടികൊഴിച്ചിൽ സാധാരണമാണ്?

അമേരിക്കൻ അക്കാദമി ഓഫ് ഡെർമറ്റോളജിയുടെ കണക്കനുസരിച്ച് ഒരു വ്യക്തിക്ക് ദിവസം 50 മുതൽ 100 മുടിനാരുകൾ വരെ കൊഴിയുന്നത് സ്വാഭാവികമാണ്. നമ്മുടെ മുടിയുടെ സ്വാഭാവിക വളർച്ചാചക്രത്തിന്റെ ഭാഗമായാണ് പഴയ മുടിനാരുകൾ കൊഴിഞ്ഞുപോകുന്നതും പകരം പുതിയവ വളരുന്നതും. അതിനാൽ മൊത്തത്തിലുള്ള മുടിയുടെ സാന്ദ്രതയിൽ വലിയ മാറ്റമൊന്നും സംഭവിക്കാറില്ല. എന്നാൽ മുടിയുടെ നീളം, കഴുകുന്ന ആവൃത്തി, ഉപയോഗിക്കുന്ന ചീപ്പ് അല്ലെങ്കിൽ ചീകുന്ന രീതി എന്നിവ അനുസരിച്ച് ഒരു സമയം കൊഴിഞ്ഞുവീഴുന്ന മുടിയുടെ അളവിൽ വ്യത്യാസം കാണാം.

കാലാവസ്ഥാ വ്യതിയാനം
കാലാവസ്ഥയിൽ മാറ്റങ്ങൾ ഉണ്ടാകുമ്പോൾ താൽക്കാലികമായി മുടികൊഴിച്ചിൽ കൂടുന്നത് പലരിലും കണ്ടുവരുന്ന ഒന്നാണ്. എന്നാൽ അമിതമായ മുടികൊഴിച്ചിലിന് കാരണം കാലാവസ്ഥ മാത്രമാണെന്ന് കരുതി, നിസ്സാരമായി തള്ളിക്കളയുന്നത് തെറ്റാണ്. മാസങ്ങളോളം അമിതമായി മുടി കൊഴിയുന്നുണ്ടെങ്കിൽ അതിന് പിന്നിൽ മറ്റ് ആരോഗ്യകാരണങ്ങൾ ഉണ്ടാകാൻ സാധ്യതയേറെയാണ്.

അവഗണിക്കരുതാത്ത ലക്ഷണങ്ങൾ
മുടികൊഴിച്ചിൽ വെറുമൊരു താൽക്കാലിക പ്രശ്നമല്ലെന്ന് വ്യക്തമാക്കുന്ന ചില കൃത്യമായ ലക്ഷണങ്ങളുണ്ട്. മുടിയുടെ വകച്ചിലിന് വീതി കൂടിവരുന്നതും, തലയോട്ടി വ്യക്തമായി പുറത്തുകാണുന്ന രീതിയിൽ മുടിയുടെ സാന്ദ്രത കുറയുന്നതും, നെറ്റിയുടെ ഭാഗത്തെ മുടി നേർത്തുപോകുന്നതും ഇതിൽ ഉൾപ്പെടുന്നു. കൂടാതെ തലയോട്ടിയിലെ ചില ഭാഗങ്ങളിൽ മാത്രം വട്ടത്തിൽ മുടി കൊഴിഞ്ഞുപോകുന്ന അവസ്ഥയോ, വല്ലാത്ത ചൊറിച്ചിൽ, ചുവപ്പുനിറം, തൊലി അടർന്നുപോകൽ തുടങ്ങിയ അസ്വസ്ഥതകളോ അനുഭവപ്പെടുകയാണെങ്കിൽ കൃത്യമായ വൈദ്യപരിശോധന ആവശ്യപ്പെടുന്ന ഘട്ടമാണ്.

എന്താണ് ടെലോജൻ എഫ്ലൂവിയം?
അമിതമായ മാനസികസമ്മർദ്ദം, കഠിനമായ പനി, വേഗത്തിലുള്ള ശരീരഭാരം കുറയ്ക്കൽ, ശസ്ത്രക്രിയകൾ അല്ലെങ്കിൽ പ്രസവാനന്തരമുണ്ടാകുന്ന ഹോർമോൺ വ്യതിയാനങ്ങൾ എന്നിവ മുടിയിഴകളെ പെട്ടെന്ന് വിശ്രമാവസ്ഥയിലേക്ക് നയിച്ചേക്കാം. 'ടെലോജൻ എഫ്ലൂവിയം' എന്നറിയപ്പെടുന്ന ഈ അവസ്ഥയിൽ, ഇത്തരം ശാരീരികമോ മാനസികമോ ആയ ആഘാതങ്ങൾ ഉണ്ടായി രണ്ട് മുതൽ നാല് മാസങ്ങൾക്ക് ശേഷമായിരിക്കും പെട്ടെന്ന് അമിതമായ മുടികൊഴിച്ചിൽ അനുഭവപ്പെടുന്നത്.

സംരക്ഷണം
പെട്ടെന്നുണ്ടാകുന്ന മുടികൊഴിച്ചിലിന് സ്വയംചികിത്സകൾ പരീക്ഷിക്കുന്നതിന് പകരം ഒരു ഡെർമറ്റോളജിസ്റ്റിന്റെ സേവനം തേടുന്നതാണ് ബുദ്ധി. ശരീരത്തിൽ ഇരുമ്പിന്റെ കുറവോ തൈറോയ്ഡ് തകരാറുകളോ ഉണ്ടോയെന്ന് രക്തപരിശോധനയിലൂടെ കണ്ടെത്തിയ ശേഷമായിരിക്കും ഡോക്ടർമാർ കൃത്യമായ ചികിത്സ നിർദ്ദേശിക്കുക.

ദൈനംദിന ജീവിതത്തിൽ പ്രോട്ടീനും അയണും അടങ്ങിയ പോഷകാഹാരം കഴിക്കുന്നതും മുടി വലിച്ച് മുറുക്കി കെട്ടുന്നത് ഒഴിവാക്കുന്നതും പ്രധാനമാണ്. കൂടാതെ, കഴുകിയ ശേഷം ഈർപ്പമുള്ള മുടി തോർത്ത് ഉപയോഗിച്ച് ശക്തിയായി തിരുമ്മാതെ മൃദുവായി ഒപ്പിയെടുക്കുന്നതും അമിതമായ ഹീറ്റ് സ്റ്റൈലിങ് ഉപകരണങ്ങൾ ഒഴിവാക്കുന്നതും മുടിവേരുകളുടെ ബലം നിലനിർത്താനും പൊട്ടിപ്പോകുന്നത് തടയാനും സഹായിക്കും.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi