ഹൃദ്രോഗങ്ങൾ കൂടുന്നു, വർഷംതോറും 1.79 കോടി മരണം; മുന്നറിയിപ്പ് ലക്ഷണങ്ങൾ തിരിച്ചറിയാം

നെഞ്ചുവേദനയോ മറ്റ് അസ്വസ്ഥതകളോ ഇല്ലാത്തതുകൊണ്ട് ഹൃദയം സുരക്ഷിതമാണെന്നാണ് ഭൂരിഭാഗം ആളുകളുടെയും വിശ്വാസം. എന്നാൽ ഹൃദയാഘാതവും പക്ഷാഘാതവും ഉൾപ്പെടെയുള്ള ഹൃദയ-രക്തക്കുഴൽ രോഗങ്ങൾ പലപ്പോഴും വ്യക്തമായ ലക്ഷണങ്ങളില്ലാതെയാണ് ഗുരുതരമാകുന്നത്.
ലോകത്ത് ഏറ്റവും കൂടുതൽ മരണങ്ങൾക്ക് കാരണമാകുന്ന രോഗവിഭാഗമാണ് ഹൃദയ-രക്തക്കുഴൽ രോഗങ്ങൾ (Cardiovascular Diseases - CVDs).

ലോകാരോഗ്യ സംഘടനയുടെ (WHO) കണക്കുകൾ പ്രകാരം, വർഷംതോറും ഏകദേശം 1.79 കോടി ആളുകളാണ് ഇത്തരം രോഗങ്ങൾ കാരണം മരിക്കുന്നത്. ഇതിൽ മൂന്നിലൊന്ന് മരണങ്ങളും 70 വയസ്സിന് താഴെയുള്ളവരിലാണ് സംഭവിക്കുന്നത്. ഹൃദയാഘാതവും പക്ഷാഘാതവുമാണ് ഈ മരണങ്ങളിൽ വലിയൊരു പങ്കിനും കാരണമെന്നാണ് വിദഗ്ധർ പറയുന്നത്. രോഗസാധ്യത തിരിച്ചറിയാനും അപകടം കുറയ്ക്കാനും ശ്രദ്ധിക്കേണ്ട കാര്യങ്ങൾ എന്തൊക്കെയാണെന്ന് നോക്കാം. 

രക്തക്കുഴലുകളിൽ കാലക്രമേണ ഉണ്ടാകുന്ന തകരാറുകൾ പലപ്പോഴും തുടക്കത്തിൽ പ്രകടമായ ലക്ഷണങ്ങൾ ഉണ്ടാക്കണമെന്നില്ല. രോഗം ഗുരുതരമാകുമ്പോൾ മാത്രമായിരിക്കും ചിലരിൽ ലക്ഷണങ്ങൾ പ്രത്യക്ഷപ്പെടുക. ചിലർക്ക് ഹൃദയാഘാതമോ പക്ഷാഘാതമോ ഉണ്ടാകുന്നതുവരെ രോഗമുള്ള കാര്യം തിരിച്ചറിയാൻ കഴിയാറില്ല. അതുകൊണ്ടുതന്നെ അപകടസാധ്യതകൾ നേരത്തേ മനസ്സിലാക്കുകയും മുന്നറിയിപ്പ് ലക്ഷണങ്ങൾ തിരിച്ചറിയുകയും ചെയ്യുന്നത് ഏറെ പ്രധാനമാണ്.

ഹൃദയ-രക്തക്കുഴൽ രോഗങ്ങളെ അറിയാം
ഹൃദയത്തെയും രക്തക്കുഴലുകളെയും ബാധിക്കുന്ന വിവിധ രോഗങ്ങളെയാണ് ഹൃദയ-രക്തക്കുഴൽ രോഗങ്ങൾ എന്നു പറയുന്നത്. പ്രധാനമായും ഇവയിൽ ഉൾപ്പെടുന്നവ:
കൊറോണറി ഹൃദ്രോഗം: ഹൃദയപേശികളിലേക്ക് രക്തം എത്തിക്കുന്ന രക്തക്കുഴലുകളെ ബാധിക്കുന്ന രോഗം. രക്തക്കുഴലുകൾ ചുരുങ്ങുകയോ തടസ്സപ്പെടുകയോ ചെയ്യുന്നത് ഹൃദയാഘാതത്തിന് കാരണമാകാം.
സെറിബ്രോവാസ്‌കുലാർ രോഗം: തലച്ചോറിലേക്ക് രക്തം എത്തിക്കുന്ന രക്തക്കുഴലുകളെ ബാധിക്കുന്ന രോഗങ്ങൾ. രക്തപ്രവാഹം തടസ്സപ്പെടുകയോ രക്തക്കുഴൽ പൊട്ടുകയോ ചെയ്യുന്നത് പക്ഷാഘാതത്തിന് ഇടയാക്കാം.
റുമാറ്റിക് ഹൃദ്രോഗം: റുമാറ്റിക് പനി മൂലം ഹൃദയപേശികൾക്കും ഹൃദയവാൽവുകൾക്കും ഉണ്ടാകുന്ന തകരാറാണിത്. ക്ഷീണം, ശ്വാസംമുട്ടൽ, ക്രമരഹിതമായ ഹൃദയമിടിപ്പ് തുടങ്ങിയ ലക്ഷണങ്ങൾ പ്രത്യക്ഷപ്പെടാം.

ഹൃദ്രോഗസാധ്യത വർധിപ്പിക്കുന്ന ഘടകങ്ങൾ
ജീവിതശൈലിയിലെ ചില ശീലങ്ങളും പരിസ്ഥിതിയിലെ ചില ഘടകങ്ങളും ഹൃദയ-രക്തക്കുഴൽ രോഗസാധ്യത വർധിപ്പിക്കുന്നു. പുകയിലയുടെ ഉപയോഗം, വ്യായാമമില്ലായ്മ, ഉപ്പ് അമിതമായി അടങ്ങിയ ഭക്ഷണം, അമിതമായ മദ്യപാനം, വായുമലിനീകരണം എന്നിവ പ്രധാന അപകടഘടകങ്ങളാണ്.

ഇവയുടെ സ്വാധീനത്താൽ രക്തസമ്മർദം ഉയരുക, രക്തത്തിലെ പഞ്ചസാരയുടെ അളവ് വർധിക്കുക, കൊളസ്ട്രോൾ ഉൾപ്പെടെയുള്ള രക്തത്തിലെ കൊഴുപ്പുകളുടെ അളവ് കൂടുക, അമിതവണ്ണം എന്നിവ ഉണ്ടാകാം. ഈ മാറ്റങ്ങൾ ദീർഘകാലം നിയന്ത്രിക്കാതെ തുടരുന്നത് ഹൃദ്രോഗസാധ്യത വർധിപ്പിക്കും. അതുകൊണ്ടുതന്നെ രോഗം ഗുരുതരമാകുന്നതുവരെ കാത്തിരിക്കാതെ കൃത്യമായ ഇടവേളകളിൽ ആരോഗ്യപരിശോധന നടത്തേണ്ടത് പ്രധാനമാണ്. രക്തസമ്മർദം, രക്തത്തിലെ പഞ്ചസാര, കൊളസ്ട്രോൾ, ശരീരഭാരം എന്നിവ നിരീക്ഷിക്കുന്നതിലൂടെ പല അപകടഘടകങ്ങളും നേരത്തേ കണ്ടെത്താനാകും.

ഹൃദയാഘാതത്തിന്റെ മുന്നറിയിപ്പ് ലക്ഷണങ്ങൾ
ഹൃദയത്തിലേക്കുള്ള രക്തപ്രവാഹം തടസ്സപ്പെടുമ്പോഴാണ് സാധാരണയായി ഹൃദയാഘാതം ഉണ്ടാകുന്നത്. അതിന്റെ പ്രധാന ലക്ഷണങ്ങൾ ഇവയാണ്:

• നെഞ്ചിന്റെ മധ്യഭാഗത്ത് വേദനയോ സമ്മർദമോ അസ്വസ്ഥതയോ അനുഭവപ്പെടുക.
• വേദന കൈകളിലേക്കോ തോളിലേക്കോ കൈമുട്ടുകളിലേക്കോ താടിയിലേക്കോ മുതുകിലേക്കോ പടരുക.
• ശ്വാസംമുട്ടൽ അനുഭവപ്പെടുക.
• ഓക്കാനം, ഛർദി എന്നിവ ഉണ്ടാകുക.

സ്ത്രീകളിൽ നെഞ്ചുവേദനയ്ക്കു പുറമേയുള്ള ലക്ഷണങ്ങളും പ്രകടമാകാം. ശ്വാസംമുട്ടൽ, ഓക്കാനം, ഛർദി, മുതുകിലോ താടിയിലോ മാത്രം അനുഭവപ്പെടുന്ന വേദന തുടങ്ങിയവയും ഹൃദയാഘാതത്തിന്റെ സൂചനകളാകാം. അതിനാൽ നെഞ്ചുവേദന ഇല്ലെന്ന കാരണത്താൽ ഹൃദയാഘാതസാധ്യത തള്ളിക്കളയരുത്.

പക്ഷാഘാതത്തിന്റെ ലക്ഷണങ്ങൾ തിരിച്ചറിയാം
തലച്ചോറിലേക്കുള്ള രക്തപ്രവാഹം തടസ്സപ്പെടുകയോ രക്തക്കുഴൽ പൊട്ടുകയോ ചെയ്യുമ്പോഴാണ് പക്ഷാഘാതം ഉണ്ടാകുന്നത്. താഴെപ്പറയുന്ന ലക്ഷണങ്ങൾ പെട്ടെന്ന് പ്രത്യക്ഷപ്പെട്ടാൽ അതീവ ജാഗ്രത വേണം.

• മുഖത്തിനോ കൈക്കോ കാലിനോ പെട്ടെന്ന് തളർച്ചയോ മരവിപ്പോ അനുഭവപ്പെടുക. സാധാരണയായി ശരീരത്തിന്റെ ഒരു വശത്തായിരിക്കും ഇത്.
• സംസാരിക്കാൻ ബുദ്ധിമുട്ട് അനുഭവപ്പെടുക, വാക്കുകൾ വ്യക്തമാകാതിരിക്കുക.
• പെട്ടെന്ന് ആശയക്കുഴപ്പം ഉണ്ടാകുക.
• കാഴ്ചയ്ക്ക് മങ്ങലുണ്ടാകുകയോ കാഴ്ച നഷ്ടപ്പെടുകയോ ചെയ്യുക.
• നടക്കാൻ ബുദ്ധിമുട്ട്, ശരീരത്തിന്റെ സന്തുലിതാവസ്ഥ നഷ്ടപ്പെടൽ, തലകറക്കം എന്നിവ ഉണ്ടാകുക.
• വ്യക്തമായ കാരണമില്ലാതെ പെട്ടെന്ന് കഠിനമായ തലവേദന അനുഭവപ്പെടുക.
• ബോധം നഷ്ടപ്പെടുക.

ഈ ലക്ഷണങ്ങളിൽ ഏതെങ്കിലും പെട്ടെന്ന് അനുഭവപ്പെട്ടാൽ ഉടൻ അടിയന്തര വൈദ്യസഹായം തേടണം. ലക്ഷണങ്ങൾ തനിയെ മാറുമെന്ന് കരുതി കാത്തിരിക്കരുത്. ഓരോ നിമിഷവും പ്രധാനമായതിനാൽ ചികിത്സ വൈകിക്കരുത്.

ഹൃദയത്തെ സംരക്ഷിക്കാൻ എന്തുചെയ്യാം?
ഹൃദയ-രക്തക്കുഴൽ രോഗങ്ങളുടെ അപകടസാധ്യത കുറയ്ക്കാൻ ജീവിതശൈലിയിൽ ചില മാറ്റങ്ങൾ വരുത്തേണ്ടതുണ്ട്. ആരോഗ്യകരമായ ശീലങ്ങൾ വ്യക്തിഗത തലത്തിൽ പിന്തുടരുന്നതിനൊപ്പം എല്ലാവർക്കും ആരോഗ്യകരമായ ഭക്ഷണവും ചികിത്സയും ലഭ്യമാക്കുന്ന സംവിധാനങ്ങളും പ്രധാനമാണെന്ന് ലോകാരോഗ്യ സംഘടന ചൂണ്ടിക്കാട്ടുന്നു.
പുകയില ഒഴിവാക്കുക: പുകവലിയും മറ്റ് പുകയില ഉൽപന്നങ്ങളുടെ ഉപയോഗവും ഹൃദയത്തിന്റെയും രക്തക്കുഴലുകളുടെയും ആരോഗ്യത്തെ ബാധിക്കുന്നു.
ഉപ്പിന്റെ അളവ് കുറയ്ക്കുക: ഭക്ഷണത്തിൽ ഉപ്പ് അമിതമാകുന്നത് രക്തസമ്മർദം ഉയരാൻ കാരണമാകാം. സംസ്‌കരിച്ച ഭക്ഷണങ്ങളിലെയും പാക്കറ്റ് ഭക്ഷണങ്ങളിലെയും ഉപ്പിന്റെ അളവും ശ്രദ്ധിക്കുക.
പഴങ്ങളും പച്ചക്കറികളും ധാരാളം കഴിക്കുക: സമീകൃതാഹാരത്തിന്റെ ഭാഗമായി പഴങ്ങൾ, പച്ചക്കറികൾ, നാരുകൾ അടങ്ങിയ ഭക്ഷണങ്ങൾ എന്നിവ ഉൾപ്പെടുത്തുക.
ദിവസവും വ്യായാമം ചെയ്യുക: പ്രായത്തിനും ആരോഗ്യസ്ഥിതിക്കും അനുയോജ്യമായ ശാരീരിക പ്രവർത്തനങ്ങൾ പതിവാക്കുക.
മദ്യപാനം ഒഴിവാക്കുകയോ നിയന്ത്രിക്കുകയോ ചെയ്യുക: മദ്യത്തിന്റെ ദോഷകരമായ ഉപയോഗം ഒഴിവാക്കുന്നത് ആരോഗ്യത്തിന് ഗുണകരമാണ്.
ആരോഗ്യപരിശോധനകൾ കൃത്യമായി നടത്തുക: രക്തസമ്മർദം, രക്തത്തിലെ പഞ്ചസാര, കൊളസ്ട്രോൾ, ശരീരഭാരം എന്നിവ പരിശോധിക്കുകയും ആവശ്യമായ ചികിത്സ തേടുകയും ചെയ്യുക.

ഹൃദയ-രക്തക്കുഴൽ രോഗങ്ങൾ മൂലമുള്ള മരണങ്ങൾ കുറയ്ക്കാൻ നേരത്തെയുള്ള രോഗനിർണയം, അപകടഘടകങ്ങളുടെ തുടർച്ചയായ നിരീക്ഷണം, ആവശ്യമായ മരുന്നുകളുടെയും ചികിത്സയുടെയും ലഭ്യത എന്നിവ നിർണായകമാണ്. രോഗലക്ഷണങ്ങൾ പ്രത്യക്ഷപ്പെടുന്നതുവരെ കാത്തിരിക്കാതെ ഹൃദയാരോഗ്യത്തിന് മുൻഗണന നൽകുകയാണ് പ്രധാനം.
(കടപ്പാട്: ഹിന്ദുസ്ഥാൻ ടൈംസ്)

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi