കോഫി കുടിച്ചാൽ ഉത്കണ്ഠ കൂടുമോ? ഒരുദിവസം എത്ര കാപ്പി കുടിക്കാം?

രാവിലെ ഒരു കപ്പ് കാപ്പിയില്ലാതെ ദിവസം തുടങ്ങാൻ കഴിയില്ലെന്ന് പറയുന്നവരുണ്ട്. ശരീരത്തിന് ഊർജവും മനസ്സിന് ഉണർവും നൽകുമെന്നതാണ് കോഫിയുടെ ഗുണം. എന്നാൽ കാപ്പി ചിലരിൽ അശാന്തി, വിറയൽ, ഹൃദയമിടിപ്പ് കൂടൽ തുടങ്ങിയ ലക്ഷണങ്ങൾക്കും കാരണമാകാറുണ്ട്. പലപ്പോഴും ഇവ ഉത്കണ്ഠയുടെ (Anxiety) ലക്ഷണങ്ങളുമായി സാമ്യമുള്ളതുമാണ്. അനസ്തീഷ്യോളജിസ്റ്റും ഇന്റർവെൻഷണൽ പെയിൻ മെഡിസിൻ വിദഗ്ധനുമായ ഡോ. കുനാൽ സൂദ് പറയുന്നത്, നമ്മളെ ഉണർത്തുന്ന അതേ പ്രക്രിയ തന്നെയാണ് ചിലരിൽ ഉത്കണ്ഠ പോലുള്ള അനുഭവങ്ങൾ ഉണ്ടാക്കുന്നതെന്നാണ്.

കാപ്പി എന്തുകൊണ്ട് ഉത്കണ്ഠയുണ്ടാക്കുന്നു?
ഉറക്കം വരാനും ശരീരം വിശ്രമാവസ്ഥയിലാകാനും സഹായിക്കുന്ന ഒരു രാസപദാർഥമാണ് അഡിനോസിൻ (Adenosine). കഫീൻ ഈ അഡിനോസിന്റെ പ്രവർത്തനത്തെ തടയുന്നു. ഇതുകാരണം ക്ഷീണം കുറയുകയും കൂടുതൽ ഉണർവും ജാഗ്രതയും അനുഭവപ്പെടുകയും ചെയ്യുന്നു. എന്നാൽ അതോടൊപ്പം തന്നെ നാഡീവ്യവസ്ഥ കൂടുതൽ സജീവമാകാനും സാധ്യതയുണ്ട്. ഇതിന്റെ ഫലമായി ഹൃദയമിടിപ്പ് വർധിക്കുക, കൈകൾ വിറയ്ക്കുക, അമിതമായി വിയർക്കുക, അസ്വസ്ഥത അനുഭവപ്പെടുക, 'എന്തോ കുഴപ്പമുണ്ട്' എന്ന തോന്നൽ ഉണ്ടാകുക തുടങ്ങിയ ലക്ഷണങ്ങൾ പ്രകടമാകാം. ഇവ പലപ്പോഴും ഉത്കണ്ഠയുടെ ലക്ഷണങ്ങളായി തെറ്റിദ്ധരിക്കപ്പെടാറുണ്ട്. എന്നാൽ ഈ അസ്വസ്ഥതകൾ എല്ലാവരിലും ഉണ്ടാകണമെന്നില്ല. കഫീന്റെ സ്വാധീനം ഓരോരുത്തരിലും വ്യത്യസ്തമാണ്. ഒരാൾക്ക് ദിവസത്തിൽ മൂന്നോ നാലോ കപ്പ് കാപ്പി പ്രശ്‌നമില്ലാതെ കുടിക്കാൻ കഴിയുമ്പോൾ, മറ്റൊരാൾക്ക് ഒരു കപ്പ് പോലും അസ്വസ്ഥത സൃഷ്ടിച്ചേക്കാം.

കഫീനോടുള്ള ശരീരത്തിന്റെ പ്രതികരണത്തെ സ്വാധീനിക്കുന്ന ചില ഘടകങ്ങൾ:
ജനിതക ഘടകങ്ങൾ
ഉറക്കക്കുറവ്
ഉയർന്ന സമ്മർദം
ചില മരുന്നുകളുടെ ഉപയോഗം
പാനിക് ഡിസോർഡർ പോലുള്ള മാനസികാരോഗ്യ പ്രശ്‌നങ്ങൾ
വെറും വയറ്റിൽ കാപ്പി കുടിക്കുന്നത്
പ്രത്യേകിച്ച് ഉറക്കം കുറവുള്ള ദിവസങ്ങളിൽ കഫീന്റെ സ്വാധീനം കൂടുതൽ ശക്തമായി അനുഭവപ്പെടാൻ സാധ്യതയുണ്ടെന്ന് വിദഗ്ധർ പറയുന്നു.
ദിവസത്തിൽ എത്ര കാപ്പി കുടിക്കാം?
ആരോഗ്യവാന്മാരായ മിക്ക മുതിർന്നവർക്കും ദിവസത്തിൽ 400 മില്ലിഗ്രാം വരെ കഫീൻ സുരക്ഷിതമായ അളവായാണ് കണക്കാക്കുന്നത്. ഇത് ഏകദേശം മൂന്നോ നാലോ കപ്പ് കാപ്പിക്ക് തുല്യമാണ്. എന്നാൽ ഇത് എല്ലാവർക്കും ബാധകമായ ഒരു മാനദണ്ഡമല്ല. ചിലർക്ക് ഇതിലും കുറഞ്ഞ അളവിൽ തന്നെ അസ്വസ്ഥത അനുഭവപ്പെടാം. അതിനാൽ സ്വന്തം ശരീരത്തിന്റെ പ്രതികരണം മനസ്സിലാക്കി കഫീൻ ഉപയോഗം ക്രമീകരിക്കുന്നതാണ് നല്ലത്.

ശ്രദ്ധിക്കേണ്ട കാര്യങ്ങൾ…
വെറുംവയറ്റിൽ കാപ്പി കുടിക്കാതിരിക്കുക.
ദിവസേന കുടിക്കുന്ന കാപ്പിയുടെ അളവ് ക്രമേണ കുറയ്ക്കുക.
ആവശ്യത്തിന് വെള്ളം കുടിച്ച് ശരീരത്തിൽ ജലാംശം നിലനിർത്തുക.
മതിയായ ഉറക്കം ഉറപ്പാക്കുക.
കാപ്പി എല്ലാവർക്കും ദോഷകരമല്ല. എന്നാൽ ശരീരത്തിന്റെ സഹിഷ്ണുതയെക്കാൾ കൂടുതൽ കഫീൻ ഉപയോഗിക്കുന്നത് ഉത്കണ്ഠ, അസ്വസ്ഥത, ഹൃദയമിടിപ്പ് വർധിക്കൽ തുടങ്ങിയ പ്രശ്‌നങ്ങൾക്ക് കാരണമാകാം. കാപ്പി കുടിച്ചതിന് ശേഷം ഇത്തരം ലക്ഷണങ്ങൾ പതിവായി അനുഭവപ്പെടുന്നുണ്ടെങ്കിൽ, കഫീന്റെ അളവ് കുറയ്ക്കുകയോ ആരോഗ്യവിദഗ്ധന്റെ ഉപദേശം തേടുകയോ ചെയ്യുന്നത് നല്ലതാണ്.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi