‘ഒരു നടിയോടൊപ്പം പ്രൊമോഷൻ ചെയ്യണമെന്ന് പറഞ്ഞപ്പോൾ, ലാറ ദത്തയെപ്പോലൊരു നടിയെയാണ് ഞാൻ പ്രതീക്ഷിച്ചത്’

2014-ലാണ് നടി സമീറ റെഡ്ഡി സംരംഭകനായ അക്ഷയ് വർധെയെ വിവാഹം കഴിച്ചത്. ഹാൻസ്, നൈറ എന്നീ രണ്ട് മക്കളോടൊപ്പം ഗോവയിലാണ് ഇവർ ഇപ്പോൾ താമസിക്കുന്നത്. സിനിമയിൽ നിന്ന് വിട്ടുനിൽക്കുന്ന സമീറ, സോഷ്യൽ മീഡിയയിൽ വളരെ ആക്ടീവാണ്. ബോഡി പോസിറ്റിവിറ്റിയെക്കുറിച്ചും മാനസികാരോഗ്യത്തെക്കുറിച്ചും അവർ ഏറെ സംസാരിക്കാറുമുണ്ട്. ഇപ്പോഴിതാ ഭർത്താവ് അക്ഷയ്യെ കണ്ടതും പ്രണയത്തിലായതുമൊക്കെ പങ്കുവെയ്ക്കുകയാണ് താരം

സമീറയുടെ 'തേസ്' എന്ന സിനിമയുടെ ബൈക്ക് പ്രൊമോഷനിടെയാണ് ഇരുവരും ആദ്യമായി കണ്ടുമുട്ടുന്നത്. ഒരു നടിയുമായി ചേർന്ന് പ്രൊമോഷൻ ചെയ്യണമെന്ന് തന്റെ കമ്പനി പറഞ്ഞപ്പോൾ ലാറ ദത്തയെപ്പോലെയുള്ള ഒരാളെയായിരിക്കും കാണാൻ പോകുന്നതെന്നാണ് അക്ഷയ് കരുതിയത്. പകരം സമീറയെത്തിയപ്പോൾ അക്ഷയ് അവരെ ശ്രദ്ധിച്ചതേയില്ല. തന്റെ ബൈക്കിന്റെ കാര്യത്തിലേക്ക് അദ്ദേഹം ശ്രദ്ധ തിരിച്ചു. എന്നാൽ, അക്ഷയ്‌യെ കണ്ട നിമിഷം തന്നെ സമീറയ്ക്ക് ഇഷ്ടം തോന്നി. ഒരു കൗമാരക്കാരിയെപ്പോലെ അക്ഷയ്‌യെ ആകർഷിക്കാൻ താൻ ശ്രമിച്ചുവെന്ന് സമീറ തമാശയായി പറയുന്നു.

തുടർന്ന്, ബോളിവുഡിലെ തന്റെ സുഹൃത്തുക്കൾക്ക് ബൈക്കുകൾ ആവശ്യമുണ്ടെന്ന് പറഞ്ഞ് സമീറ തന്നെയാണ് അക്ഷയ്‌ക്ക് ഫോൺ നമ്പർ നൽകിയത്. അവിടെ നിന്നാണ് അവരുടെ പ്രണയം ആരംഭിക്കുന്നത്.

മൂന്ന് വർഷത്തെ പ്രണയത്തിന് ശേഷം, 2013-ൽ തന്റെ ജന്മദിനത്തിന് തൊട്ടുമുൻപ് അക്ഷയ് ഒന്നും പ്ലാൻ ചെയ്യാത്തതിൽ സമീറ ദേഷ്യത്തിലായിരുന്നു. "എനിക്ക് 36 വയസ്സായി, ഇയാൾക്ക് ഗൗരവമായ ഉദ്ദേശ്യമൊന്നുമില്ലെങ്കിൽ ഞാൻ ഈ ബന്ധം അവസാനിപ്പിക്കും എന്ന് പോലും ഞാൻ കരുതി," സമീറ പറയുന്നു. എന്നാൽ സമീറയെ ഞെട്ടിച്ചുകൊണ്ട് കുടുംബാംഗങ്ങളോടൊപ്പം എത്തിയ അക്ഷയ്, ഒരു ബലൂണിൽ കെട്ടിയ മോതിരവുമായി വന്ന് വിവാഹാഭ്യർത്ഥന നടത്തി. ആ നിമിഷം ദേഷ്യം മാറി താൻ കരഞ്ഞുപോയെന്നും സമീറ ഓർക്കുന്നു.

ഇന്ന് സോഷ്യൽ മീഡിയയിൽ ഏറെ ആരാധകരുള്ള ഒരു കുടുംബമാണ് സമീറയുടേത്. മക്കളോടൊപ്പമുള്ള രസകരമായ നിമിഷങ്ങളും കുടുംബവിശേഷങ്ങളും സമീറ നിരന്തരം ഇൻസ്റ്റഗ്രാമിലൂടെ പങ്കുവെക്കാറുണ്ട്. സമീറ റെഡ്ഡിയുടെ ഇൻസ്റ്റഗ്രാമിലെ ഏറെ ആരാധകരുള്ള വീഡിയോ സീരീസാണ് 'Messy Mama.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi