‘നീ ഒരമ്മയാണ്, നിനക്ക് തടിയുണ്ട്, മുടി നരച്ചിരിക്കുന്നു... നിന്നെ ആരും സ്വീകരിക്കില്ല’

സിനിമാ ലോകത്തെ സൗന്ദര്യ സങ്കൽപ്പങ്ങളെക്കുറിച്ചും മാതൃത്വത്തെക്കുറിച്ചും എപ്പോഴും സംസാരിക്കുന്ന നടിയാണ് സമീറ റെഡ്ഡി. മാറുന്ന പാരന്റിങ് രീതികൾ, പ്രസവാനന്തരം താൻ അനുഭവിച്ച സമ്മർദ്ദങ്ങൾ, സിനിമാ മേഖലയിലെ സൗന്ദര്യ മാനദണ്ഡങ്ങൾ എന്നിവയെക്കുറിച്ച് താരം അടുത്തിടെ സംസാരിക്കുകയുണ്ടായി. സിനിമയിൽ നിന്ന് വിട്ടുനിന്നതിന് ശേഷം താൻ എങ്ങനെയാണ് ആത്മവിശ്വാസം വീണ്ടെടുത്തതെന്നും സമീറ പങ്കുവെച്ചു.

മുൻതലമുറയെ അപേക്ഷിച്ച് ഇന്നത്തെ പാരന്റിങ് രീതികളിൽ വലിയ മാറ്റം വന്നിട്ടുണ്ടെന്ന് സമീറ പറഞ്ഞു. പഠനത്തിന് മാത്രം മുൻഗണന നൽകുന്നതിന് പകരം സാമൂഹിക വിഷയങ്ങളിൽ കൃത്യമായ നിലപാടുള്ളവരായി കുട്ടികളെ വളർത്താനാണ് ഇന്നത്തെ അച്ഛനമ്മമാർ ശ്രമിക്കുന്നത്. "നമ്മുടെ മാതാപിതാക്കൾക്ക് അറിയാത്തതോ അല്ലെങ്കിൽ ഒരു പ്രശ്നമായി തോന്നാത്തതോ ആയ കാര്യങ്ങൾ ഇന്ന് നമുക്ക് പ്രധാനമാണ്. ലിംഗസമത്വം, ബുള്ളിയിങ് (Bullying), ട്രോളിംഗ് എന്നിവയെക്കുറിച്ച് സംസാരിക്കുമ്പോൾ നമ്മൾ കൂടുതൽ ബോധവാന്മാരാണ്," സമീറ മിഡ്-ഡേയോട് പറഞ്ഞു.

സിനിമയിൽ നിന്ന് വിട്ടുനിന്നതിൽ എപ്പോഴെങ്കിലും ഖേദം തോന്നിയിട്ടുണ്ടോ എന്ന ചോദ്യത്തിന്, "ചിലപ്പോൾ ഞാൻ എന്നോട് തന്നെ അത് ചോദിക്കാറുണ്ട്, പക്ഷേ സംഭവിച്ചത് സംഭവിച്ചു," എന്നായിരുന്നു താരത്തിന്റെ മറുപടി.

"പ്രസവശേഷം ശരീരഭാരം കൂടിയപ്പോൾ എനിക്ക് വലിയ ഒറ്റപ്പെടൽ അനുഭവപ്പെട്ടു. ആത്മവിശ്വാസം പൂർണ്ണമായും തകർന്നു. എന്നാൽ രണ്ടാമത്തെ മകൾ നൈറ ജനിച്ചപ്പോൾ, ഇത്തരമൊരു അവസ്ഥയിലൂടെ ഇനി കടന്നുപോകില്ലെന്ന് ഞാൻ തീരുമാനിച്ചു. സമാനമായ അവസ്ഥയിലൂടെ കടന്നുപോകുന്നവർക്ക് ഒരു താങ്ങാവണമെന്ന് ഞാൻ ആഗ്രഹിച്ചു," അവർ വ്യക്തമാക്കി.

തുടക്കത്തിൽ ട്രോളുകൾ തന്നെ വേദനിപ്പിച്ചിരുന്നുവെന്നും, എന്നാൽ ഇപ്പോൾ അതിനെയെല്ലാം അതിജീവിക്കാൻ പഠിച്ചുവെന്നും സമീറ പറഞ്ഞു. "അഞ്ച് വർഷത്തിന് ശേഷം ഇന്ന് ഞാൻ ഇത്തരം കാര്യങ്ങളിൽ നിഷ്പക്ഷയാണ്. ട്രോളുകൾ എന്നെ ബാധിക്കില്ല. എന്റെ സോഷ്യൽ മീഡിയ പേജുകളിൽ ഇപ്പോൾ അത്തരം കാര്യങ്ങൾ കുറവാണ്, കാരണം അവിടെയുള്ള സ്ത്രീകൾ പരസ്പരം പിന്തുണയ്ക്കുന്നവരാണ്," അവർ കൂട്ടിച്ചേർത്തു.

തന്റെ കരിയറിന്റെ തുടക്കത്തിൽ നേരിട്ട വിവേചനങ്ങളെക്കുറിച്ചും സമീറ തുറന്നുപറഞ്ഞു. സിനിമാ വ്യവസായത്തിൽ വെളുത്ത നിറത്തോടും മെലിഞ്ഞ ശരീരത്തോടുമുള്ള അഭിനിവേശം, തന്നെ അസ്വസ്ഥയാക്കിയിരുന്നതായി അവർ വെളിപ്പെടുത്തി.

"ഒരു നടിയെന്ന നിലയിൽ കൂടുതൽ വെളുക്കണമെന്ന് എനിക്ക് എപ്പോഴും തോന്നിയിരുന്നു. എനിക്ക് മേക്കപ്പ് ഇടുമ്പോൾ പോലും കൂടുതൽ വെളുപ്പിക്കാനാണ് അവർ ശ്രമിച്ചിരുന്നത്. ഞാൻ ഉയരമുള്ള പെൺകുട്ടിയായതുകൊണ്ട് 'വളരെ വലുതാണ്' എന്ന തോന്നലും എന്നിൽ ഉണ്ടാക്കിയിരുന്നു. എന്റെ കഴിവിലോ അഭിനയത്തിലോ ശ്രദ്ധിക്കുന്നതിന് പകരം വർഷങ്ങളോളം എന്റെ ശരീരത്തെക്കുറിച്ചായിരുന്നു ചർച്ചകൾ. എന്തിനാണ് ഞാൻ അന്ന് അതിനൊക്കെ സമ്മതിച്ചതെന്ന് ഇന്ന് ആലോചിക്കുമ്പോൾ അത്ഭുതം തോന്നുന്നു."

സോഷ്യൽ മീഡിയയിലൂടെ വീണ്ടും സജീവമായപ്പോൾ തന്റെ സ്വാഭാവികമായ ലുക്കിനെ (Natural look) ആളുകൾ വിമർശിച്ചിരുന്നതായി താരം പറഞ്ഞു. "നീ ഒരു അമ്മയാണ്, നിനക്ക് തടിയുണ്ട്, മുടി നരച്ചിരിക്കുന്നു... നിന്നെ ആരും സ്വീകരിക്കില്ല എന്നൊക്കെ പലരും പറഞ്ഞു. എന്നാൽ അതൊരു വെല്ലുവിളിയായിട്ടല്ല ഞാൻ കണ്ടത്. 'എന്റേതായ ഒരു ഇടം ഞാൻ നിർമ്മിക്കും, നിങ്ങൾക്ക് ഇഷ്ടമുണ്ടെങ്കിൽ നിൽക്കാം, ഇല്ലെങ്കിൽ പോകാം' എന്നതായിരുന്നു എന്റെ നിലപാട്," സമീറ പറഞ്ഞു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi