തമിഴ് സിനിമാ സംവിധായകനും നടി നയൻതാരയുടെ ഭർത്താവുമാണ് വിഘ്‌നേഷ് ശിവൻ. നയൻതാരയുമായുള്ള പരസ്യമായ തർക്കത്തിന് പിന്നാലെ, നടൻ ധനുഷുമായുള്ള സൗഹൃദം നഷ്ടപ്പെട്ടതിൽ തനിക്ക് വലിയ വിഷമമുണ്ടെന്ന് വെളിപ്പെടുത്തുകയാണ് വിഘ്‌നേഷ്. തന്റെ പുതിയ ചിത്രമായ 'ലവ് ഇൻഷുറൻസ് കൊമ്പനി'യുടെ (Love Insurance Kompany) റിലീസുമായി ബന്ധപ്പെട്ട് നൽകിയ അഭിമുഖത്തിലാണ് വിഘ്‌നേഷ് മനസ്സുതുറന്നത്. ധനുഷിനെ ഇപ്പോഴും തന്റെ ജീവിതത്തിലെ പ്രധാന വ്യക്തിയായാണ് കാണുന്നതെന്നും അദ്ദേഹം പറഞ്ഞു.

അഭിമുഖത്തിനിടെ ധനുഷുമായുള്ള ബന്ധത്തെക്കുറിച്ച് വിഘ്‌നേഷ് പറഞ്ഞത് ഇങ്ങനെയാണ്: "എനിക്ക് ധനുഷ് സാറിനെ ഒരുപാട് ഇഷ്ടമാണ്. ജൂലൈ 28-നാണ് അദ്ദേഹത്തിന്റെ ജന്മദിനം... അതേ ദിവസം തന്നെയാണ് എന്റെ അച്ഛൻ മരിച്ചതും. അദ്ദേഹത്തിൽ എനിക്കൊരു പിതൃതുല്യമായ സാന്നിധ്യം അനുഭവപ്പെടാറുണ്ട്. ആ ബന്ധം നഷ്ടപ്പെട്ടതാണ് എന്റെ ഏറ്റവും വലിയ നഷ്ടം. അതിൽ എനിക്ക് നാണക്കേടും തോന്നുന്നുണ്ട്. എവിടെയോ എപ്പോഴോ എന്തോ തെറ്റ് സംഭവിച്ചിട്ടുണ്ട്. ഇന്ന് ഞാൻ നയിക്കുന്ന ഈ ജീവിതത്തിൽ, ധനുഷ് സർ വളരെ പ്രധാനപ്പെട്ട ഒരാളാണ്."

Also Read

placeholder

‘ഞാൻ അത് നിരസിക്കുന്നു, പുഞ്ചിരിക്കുന്നു, സമാധാനം നിലനിർത്തുന്നു’

placeholder

'ഇരട്ടയെ' കണ്ട് ഞെട്ടി നീതു കപൂർ, സീതയും ഗീതയുമെന്ന് പ്രേക്ഷകർ

placeholder

‘ഐശ്വര്യയുമായുള്ള ദാമ്പത്യത്തിന് പിന്നിൽ കടുത്ത ഈഗോ; വിവാഹിതരായപ്പോൾ അമ്മ അച്ഛനേക്കാൾ വലിയ താരം’

വി.ഐ.പി (VIP) സിനിമയുടെ ചിത്രീകരണ സമയത്ത് രണ്ടു വർഷത്തോളം താൻ ധനുഷിനൊപ്പമുണ്ടായിരുന്നുവെന്നും, അദ്ദേഹം ഭക്ഷണം കഴിച്ചതിന് ശേഷം മാത്രമേ താൻ കഴിക്കാറുള്ളായിരുന്നുവെന്നും വിഘ്‌നേഷ് ഓർത്തെടുത്തു. മനുഷ്യർക്കിടയിൽ പ്രശ്നങ്ങളുണ്ടാകുമ്പോൾ പലപ്പോഴും സാഹചര്യം മനസ്സിലാക്കാൻ സാധിക്കാറില്ലെന്നും അദ്ദേഹം കൂട്ടിച്ചേർത്തു.

തർക്കത്തിന്റെ പശ്ചാത്തലം

2024-ലാണ് നയൻതാരയും ധനുഷും തമ്മിലുള്ള പ്രശ്നങ്ങൾ പരസ്യമായത്. നയൻതാരയുടെയും വിഘ്‌നേഷിന്റെയും വിവാഹത്തോടനുബന്ധിച്ച് പുറത്തിറക്കിയ നെറ്റ്ഫ്ലിക്സ് ഡോക്യുമെന്ററിയുടെ ട്രെയിലറിൽ 'നാനും റൗഡി താൻ' എന്ന ചിത്രത്തിലെ മൂന്ന് സെക്കൻഡ് ദൈർഘ്യമുള്ള ക്ലിപ്പ് ഉപയോഗിച്ചിരുന്നു. ഇതിനെതിരെ ചിത്രത്തിന്റെ നിർമ്മാതാവായ ധനുഷ്, നിയമനടപടി സ്വീകരിച്ചിരുന്നു. ഇതിനെതിരെ നയൻതാര രൂക്ഷമായ ഭാഷയിൽ തുറന്ന കത്തെഴുതിയിരുന്നു.

വിഘ്‌നേഷും നയൻതാരയും പ്രണയത്തിലായത് 'നാനും റൗഡി താൻ' സിനിമയുടെ സെറ്റിൽ വെച്ചായിരുന്നു. പകർപ്പവകാശ നിയമങ്ങൾ തനിക്ക് മനസ്സിലാകുമെങ്കിലും, ധാർമ്മികമായ പോരാട്ടത്തിൽ ധനുഷ് തോറ്റുപോയെന്നാണ് നയൻതാര കത്തിൽ ആരോപിച്ചത്. ഇതിനോട് ധനുഷ് പരസ്യമായി പ്രതികരിച്ചില്ലെങ്കിലും ദമ്പതികൾക്കും നെറ്റ്ഫ്ലിക്സിനുമെതിരെ നിയമനടപടികളുമായി മുന്നോട്ട് പോയി.

വിഘ്‌നേഷ് ശിവൻ സംവിധാനം ചെയ്യുന്ന സയൻസ് ഫിക്ഷൻ റൊമാന്റിക് ചിത്രമായ 'ലവ് ഇൻഷുറൻസ് കൊമ്പനി' 2026 ഏപ്രിൽ 10-ന് ലോകമെമ്പാടും റിലീസ് ചെയ്യും. പ്രദീപ് രംഗനാഥനും കൃതി ഷെട്ടിയുമാണ് ചിത്രത്തിലെ പ്രധാന വേഷങ്ങൾ ചെയ്യുന്നത്. അനിരുദ്ധ് രവിചന്ദറാണ് സംഗീതം. 'പേട്രിയറ്റ്' (Patriot), 'ടോക്സിക്' (Toxic) എന്നിവയാണ് നയൻതാരയുടെ അടുത്ത ചിത്രങ്ങൾ. ധനുഷ് നായകനാകുന്ന പുതിയ ആക്ഷൻ ത്രില്ലർ ചിത്രം 'കാര' (Kara) ആണ്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi