‘11 കിലോ തൂക്കം കൂടി, ജീവിതം മാറിമറിയാൻ പോകുന്നു!’ സന്തോഷവും ആശങ്കകളും പങ്കുവെച്ച് സാമന്ത

തെന്നിന്ത്യയുടെ പ്രിയനടി സാമന്ത റൂത്ത് പ്രഭു തന്റെ ജീവിതത്തിലെ ഏറ്റവും മനോഹരമായ ഘട്ടത്തിലൂടെയാണ് കടന്നുപോകുന്നത്. അമ്മയാകാനൊരുങ്ങുന്നതിന്റെ സന്തോഷങ്ങളും ഈ കാലയളവിലെ ചെറിയ ആശങ്കകളും ആരാധകരുമായി പങ്കുവെച്ചിരിക്കുകയാണ് താരം. ഇൻസ്റ്റഗ്രാമിൽ നടത്തിയ 'ആസ്ക് മി എനിതിങ്' (AMA) സെഷനിലൂടെയാണ് പുതിയ അമ്മമാരോടും ഗർഭിണികളായ സ്ത്രീകളോടും സാമന്ത തന്റെ വിശേഷങ്ങൾ മനസ്സ് തുറന്ന് സംസാരിച്ചത്.

ഗർഭകാലത്ത് സ്ത്രീകളിൽ അനുഭവപ്പെടുന്ന ഏറ്റവും സാധാരണമായ മാറ്റങ്ങളിലൊന്നാണ് ശരീരഭാരം കൂടുന്നത്. തനിക്കും ഭാരം കൂടുന്നുണ്ടെന്ന് ഒരു ആരാധിക പങ്കുവെച്ചപ്പോൾ, "എനിക്കും അത് മനസ്സിലാകും, ഇതിനകം 11 കിലോ തൂക്കം കൂടിയിട്ടുണ്ട്" എന്നായിരുന്നു സാമന്തയുടെ തുറന്നുപറച്ചിൽ.

കുഞ്ഞിനായി വേണ്ട എല്ലാ സാധനങ്ങളും ഇതിനകം വാങ്ങിയിട്ടുണ്ടെന്നും എന്നാൽ അതെല്ലാം കാണുമ്പോൾ ചെറിയൊരു ഭയം തോന്നുണ്ടെന്നും താരം കൂട്ടിച്ചേർത്തു. "കഴിയുന്നത്ര നന്നായി ഉറങ്ങിക്കോളൂ, നിങ്ങളുടെ ജീവിതം ഇനി തിരികെ വരാത്തവിധം മാറാൻ പോകുകയാണ്" എന്നൊരു ഉപദേശത്തിന്, "ആ മാറ്റങ്ങളെ വിനയത്തോടെ സ്വീകരിക്കാൻ തയ്യാറായിരിക്കുന്നു" എന്നാണ് സാമന്ത പ്രതികരിച്ചത്.

കുഞ്ഞിന് എന്ത് പേരിടും എന്ന ചോദ്യത്തിന്, "വിചാരിച്ചതിലും ബുദ്ധിമുട്ടുള്ള പണിയാണിത്, പേരു കണ്ടുപിടിക്കാൻ നിങ്ങളുടെ സഹായം വേണം" എന്നായിരുന്നു മറുപടി. ഒരു ഗൈഡ് ബുക്കോ മാന്യുവലോ ഇല്ലാതെ ചെയ്യേണ്ട ഒരേയൊരു ജോലി മാതൃത്വമാണെന്ന് മറ്റൊരാൾ കുറിച്ചപ്പോൾ, "മനോഹരം, മാന്ത്രികം, ജീവിതം മാറ്റിയെഴുതുന്നത്... എങ്കിലും ഒരു മാന്യുവൽ ഉണ്ടായിരുന്നെങ്കിൽ നന്നായിരുന്നു" എന്ന് സാമന്ത ചിരിയോടെ മറുപടി നൽകി.

ഗർഭകാലത്ത് അനുഭവപ്പെടുന്ന വിചിത്രമായ സ്വപ്നങ്ങളെക്കുറിച്ചും താരം സംസാരിക്കുകയുണ്ടായി. പ്രസവവുമായി ബന്ധപ്പെട്ട വ്യക്തമായ സ്വപ്നങ്ങൾ താൻ ഇപ്പോഴും കാണാറുണ്ടെന്ന് ഒരു സ്ത്രീ പറഞ്ഞപ്പോൾ, "ശരിക്കും എന്താണ് ഇത്തരം വിചിത്രമായ സ്വപ്നങ്ങൾക്ക് കാരണം?" എന്ന് സാമന്ത ആശ്ചര്യത്തോടെ ചോദിച്ചു.

ഈ കാലയളവ് മാനസികമായി തളർത്തുമെന്നാണ് കരുതിയതെന്നും എന്നാൽ ഈ അനുഭവം തനിക്ക് വലിയ ആത്മവിശ്വാസവും കരുത്തുമാണ് നൽകിയതെന്നും സാമന്ത കൂട്ടിച്ചേർത്തു. റിപ്പോർട്ടുകൾ പ്രകാരം, ഡിസംബറിൽ സാമന്തയും രാജ് നിഡിമോരുവും തങ്ങളുടെ പുതിയ അതിഥിയെ സ്വാഗതം ചെയ്യും. പ്രിയ നടിയുടെ പുതിയ വിശേഷങ്ങൾ വലിയ സ്നേഹത്തോടെയാണ് സോഷ്യൽ മീഡിയ ഏറ്റെടുത്തിരിക്കുന്നത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi