തെലുങ്ക് ആക്ഷൻ ചിത്രം 'മാ ഇന്റി ബംഗാരം' (Maa Inti Bangaaram) ബോക്സ് ഓഫീസിൽ തരംഗം സൃഷ്ടിച്ചതിന് പിന്നാലെ ആരാധകർക്ക് മറ്റൊരു വമ്പൻ സർപ്രൈസ് നൽകി നടി സമാന്ത റൂത്ത് പ്രഭു. സംവിധായകൻ രാജ് നിദിമൊരുവുമായുള്ള വിവാഹശേഷം തന്റെ ആദ്യ കുഞ്ഞിനായുള്ള കാത്തിരിപ്പിലാണ് താരം. ഇതിനായി ഉടൻ തന്നെ പ്രസവകാല അവധിയിലേക്ക് (Maternity Break) കടക്കുമെന്ന വാർത്തകൾക്കിടയിലാണ് തമിഴ് സിനിമാ ലോകത്തേക്ക് സമാന്ത വീണ്ടും തിരിച്ചെത്തുന്നു എന്ന സൂചനകൾ പുറത്തുവരുന്നത്.

സർപ്രൈസ് പ്രഖ്യാപനം

പ്രമുഖ ഒടിടി പ്ലാറ്റ്‌ഫോമായ സോണി ലിവ് (Sony LIV) ആണ് സമാന്തയുമായി ഒന്നിക്കുന്ന പുതിയ പ്രോജക്റ്റിനെക്കുറിച്ചുള്ള സൂചനകൾ സോഷ്യൽ മീഡിയയിലൂടെ പങ്കുവെച്ചത്. തമിഴിലായിരുന്നു ഈ പോസ്റ്റ്: "എല്ലാവർക്കും നമസ്കാരം! ഞങ്ങൾ വളരെ സവിശേഷമായ ഒന്നിനായി തയ്യാറെടുക്കുകയാണ്. ഇതിന്റെ കൂടുതൽ വിവരങ്ങൾ നിങ്ങളുമായി പങ്കുവെക്കാൻ ഞങ്ങൾക്ക് ഇനി കാത്തിരിക്കാനാവില്ല. ഉടൻ വരുന്നു!!!" ഈ പോസ്റ്റ് ഇൻസ്റ്റഗ്രാം സ്റ്റോറിയായി റീ-ഷെയർ ചെയ്തുകൊണ്ട് സമാന്ത കുറിച്ചത് "Looking forward" (ഏറെ പ്രതീക്ഷയോടെ കാത്തിരിക്കുന്നു) എന്നാണ്.

സമാന്ത ഇനി നീണ്ട നാളത്തേക്ക് സിനിമയിൽ നിന്ന് മാറിനിൽക്കുമെന്ന് കരുതിയ ആരാധകർക്ക് ഈ പ്രഖ്യാപനം വലിയ ആവേശമാണ് നൽകിയിരിക്കുന്നത്. "വീണ്ടും തമിഴിലേക്ക് സ്വാഗതം സമാന്ത" എന്നതുൾപ്പെടെയുള്ള കമന്റുകളുമായി തമിഴ് സിനിമാ പ്രേമികൾ ഈ വാർത്തയെ ഏറ്റെടുത്തു കഴിഞ്ഞു. ഇതൊരു സിനിമയാണോ അതോ വെബ് സീരീസാണോ എന്ന് വ്യക്തമല്ലെങ്കിലും, മുൻപ് താരം അവതരിപ്പിച്ച 'സാം ജാം' (Sam Jam) പോലുള്ള ഒരു ടോക്ക് ഷോ ആകാനും സാധ്യതയുണ്ടെന്ന് ടോളിവുഡിൽ സംസാരമുണ്ട്.

2010-ൽ ഗൗതം വാസുദേവ് മേനോൻ സംവിധാനം ചെയ്ത 'യേ മായ ചേസാവേ' (വിണ്ണൈത്താണ്ടി വരുവായായുടെ തെലുങ്ക് പതിപ്പ്) എന്ന ചിത്രത്തിലൂടെയാണ് സമാന്ത കരിയർ ആരംഭിക്കുന്നത്. പിന്നീട് തെലുങ്കിലും തമിഴിലും ഒരുപോലെ തിളങ്ങിയ താരം 2022-ൽ പുറത്തിറങ്ങിയ 'കാത്തുവാക്കുള്ള രണ്ട് കാതൽ' എന്ന ചിത്രത്തിലാണ് അവസാനമായി തമിഴിൽ അഭിനയിച്ചത്. വിജയ് സേതുപതിയും നയൻതാരയും പ്രധാന വേഷങ്ങളിലെത്തിയ ചിത്രമായിരുന്നു ഇത്. അടുത്തിടെ ചെന്നൈയിൽ വെച്ച് നടന്ന 'മാ ഇന്റി ബംഗാരം' സിനിമയുടെ പ്രമോഷനിടെ കൂടുതൽ തമിഴ് സിനിമകൾ ചെയ്യാൻ കഴിയാത്തതിൽ തനിക്ക് ഇപ്പോഴും ഖേദമുണ്ടെന്ന് സമാന്ത തുറന്നു പറഞ്ഞിരുന്നു.

മാതൃത്വത്തിലേക്ക് സാമന്ത

2025 ഡിസംബറിലായിരുന്നു 'ദി ഫാമിലി മാൻ' സംവിധായകൻ രാജ് നിദിമൊരുവുമായി സമാന്തയുടെ വിവാഹം. അടുത്തിടെ ചിത്രത്തിന്റെ വിജയ ആഘോഷങ്ങൾക്കിടയിലാണ് താൻ ഗർഭിണിയാണെന്ന വാർത്ത സമാന്ത ഔദ്യോഗികമായി സ്ഥിരീകരിച്ചത്. "എന്റെ ഇപ്പോഴത്തെ അവസ്ഥ അനുസരിച്ച് 'മാ ഇന്റി ബംഗാരം' സിനിമയ്ക്ക് ശേഷം എനിക്ക് ചെറിയൊരു ഇടവേള എടുക്കേണ്ടി വരും. പ്രസവകാല അവധിക്ക് ശേഷം ഞാൻ ആരാധകർക്കായി ശക്തമായ തിരിച്ചുവരവ് നടത്തും," എന്ന് മാധ്യമങ്ങളോട് സംസാരിക്കവെ താരം വ്യക്തമാക്കിയിരുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi