‘മികച്ച ക്വാളിറ്റിയിൽ സിനിമ എത്തും;’ മമ്മൂട്ടിയും മോഹൻലാലും ഒന്നിക്കുന്ന ചിത്രം മെയ് ഒന്നിന്

സൂപ്പർതാരങ്ങളായ മമ്മൂട്ടിയും മോഹൻലാലും ഒന്നിക്കുന്ന ആക്ഷൻ സ്പൈ ത്രില്ലർ 'പേട്രിയറ്റ്' (Patriot)-ന്റെ പുതിയ റിലീസ് തീയതി പുറത്തുവിട്ടിരിക്കുകയാണ്. ഏപ്രിൽ 23-നായിരുന്നു ചിത്രത്തിന്റെ റിലീസ് നിശ്ചയിച്ചിരുന്നത്. എന്നാൽ റിലീസ് മാറ്റിവെച്ചത് ആരാധകരെ നിരാശരാക്കിയിരുന്നു. ചിത്രം 2026 മെയ് 1-ന് തിയേറ്ററുകളിലെത്തുമെന്ന് അണിയറപ്രവർത്തകർ ഇപ്പോൾ സ്ഥിരീകരിച്ചിട്ടുണ്ട്. മമ്മൂട്ടിയും എക്‌സിലൂടെ (X) ഈ വിവരം പങ്കുവെച്ചു. സിനിമ, ലോകമെമ്പാടുമുള്ള തിയേറ്ററുകളിൽ എത്തുന്നു എന്നറിയിച്ചുകൊണ്ട്, "പേട്രിയറ്റ് 2026 മെയ് 1 മുതൽ ലോകമെമ്പാടുമുള്ള തിയേറ്ററുകളിൽ" എന്ന് അദ്ദേഹം കുറിച്ചു.

നേരത്തെ, ചിത്രത്തിന്റെ റിലീസ് വൈകുന്നതിന്റെ കാരണം വിശദീകരിച്ചുകൊണ്ട് അണിയറപ്രവർത്തകർ പ്രസ്താവന ഇറക്കിയിരുന്നു. ഏറ്റവും മികച്ച ഗുണമേന്മയോടെ (Quality) ചിത്രം പ്രേക്ഷകരിലേക്ക് എത്തിക്കാനാണ് ശ്രമിക്കുന്നതെന്ന് അവർ വ്യക്തമാക്കി. "ഏറ്റവും മികച്ച ക്വാളിറ്റിയിൽ പേട്രിയറ്റ് നിങ്ങളിലേക്ക് എത്തിക്കാൻ ഞങ്ങൾ കഠിനമായി പരിശ്രമിക്കുകയാണ്. എന്നാൽ അപ്രതീക്ഷിതമായ ചില സാഹചര്യങ്ങൾ കാരണം, ഏപ്രിൽ 23-ന് നിശ്ചയിച്ചിരുന്ന റിലീസ് ഏതാനും ദിവസത്തേക്ക് മാറ്റിവെക്കേണ്ടി വന്നു," എന്നായിരുന്നു പ്രസ്താവന.

കഴിഞ്ഞ വർഷം ഒക്ടോബർ 2-നാണ് 'പേട്രിയറ്റ്'-ന്റെ ടീസർ പുറത്തിറങ്ങിയത്. വിശ്വാസത്തിലൂടെ ജനങ്ങളെ നിയന്ത്രിക്കുന്ന നേതാക്കളെക്കുറിച്ചുള്ള നിഗൂഢമായ വോയിസ് ഓവറോടെയാണ് ടീസർ ആരംഭിക്കുന്നത്. ഒരു രഹസ്യ ദൗത്യത്തിലേർപ്പെട്ടിരിക്കുന്ന കഥാപാത്രമായാണ് മമ്മൂട്ടി ടീസറിൽ പ്രത്യക്ഷപ്പെടുന്നത്. മോഹൻലാൽ ഒരു പട്ടാളക്കാരനായും, ഫഹദ് ഫാസിൽ ആകാംക്ഷ വർധിപ്പിക്കുന്ന മറ്റൊരു വേഷത്തിലും എത്തുന്നു. കടുത്ത പോരാട്ടങ്ങളുടെയും അധികാര വടംവലികളുടെയും കഥയാകും ചിത്രം പറയുന്നതെന്ന് ടീസർ സൂചിപ്പിക്കുന്നു.

മഹേഷ് നാരായണനാണ് ചിത്രത്തിന്റെ രചനയും സംവിധാനവും നിർവ്വഹിച്ചിരിക്കുന്നത്. മമ്മൂട്ടി, മോഹൻലാൽ എന്നിവർക്ക് പുറമെ ഫഹദ് ഫാസിൽ, നയൻതാര, രാജീവ് മേനോൻ, രേവതി, ഗ്രേസ് ആന്റണി, സരിൻ ഷിഹാബ്, ശ്രീപാർവ്വതി, ഗീതി സംഗീത, ജിനു ജോസഫ്, ഡാനിഷ് ഹുസൈൻ, ഷഹീൻ സിദ്ദിഖ്, സനൽ അമൻ, പ്രകാശ് ബെലവാടി എന്നിവരും പ്രധാന വേഷങ്ങളിൽ എത്തുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi