‘ബാഹുബലിയ്ക്കായി ഒരു കുതിരയെ വാങ്ങി വീട്ടിൽ വളർത്താൻ അദ്ദേഹം എന്നോട് ആവശ്യപ്പെട്ടു’

ഇന്ത്യൻ സിനിമാചരിത്രത്തെ തിരുത്തിക്കുറിച്ച എസ്.എസ്. രാജമൗലിയുടെ ദൃശ്യവിസ്മയം 'ബാഹുബലി: ദി ബിഗിനിങ്' റിലീസ് ചെയ്തിട്ട് 11 വർഷങ്ങൾ തികയുന്നു. ബോക്സ് ഓഫീസിലെ റെക്കോർഡുകൾ തകർക്കുക മാത്രമല്ല, ഇന്ത്യൻ സിനിമയുടെ ആഗോള മുഖം തന്നെ മാറ്റിയെഴുതുകയായിരുന്നു ബാഹുബലി. കഥപറച്ചിലിലും ആക്ഷനിലും വിഷ്വൽ എഫക്ട്സിലും പുതിയ മാനദണ്ഡങ്ങൾ സൃഷ്ടിച്ച ഈ സിനിമ, പ്രഭാസ്, റാണ ദാഗുബാട്ടി, അനുഷ്ക ഷെട്ടി എന്നിവരെ പാൻ-ഇന്ത്യൻ സൂപ്പർതാരങ്ങളാക്കി മാറ്റി. രണ്ട് ഭാഗങ്ങളിലുമായി 2400 കോടി രൂപയാണ് ബോക്സ് ഓഫീസിൽ നിന്ന് വാരിക്കൂട്ടിയത്!

അമരേന്ദ്ര ബാഹുബലിയായും മഹേന്ദ്ര ബാഹുബലിയായും പ്രഭാസ് സ്ക്രീനിൽ നിറഞ്ഞാടിയപ്പോൾ അതിന് പിന്നിൽ വർഷങ്ങളുടെ കഠിനാധ്വാനമുണ്ടായിരുന്നു. കുതിരസവാരി പഠിക്കാൻ രാജമൗലി തന്നെ നിർബന്ധിച്ചതിനെക്കുറിച്ച് പ്രഭാസ് മുൻപ് പങ്കുവെച്ച ഒരു രസകരമായ അനുഭവം ഇപ്പോൾ വീണ്ടും ശ്രദ്ധേയമാവുകയാണ്.

"ചില ദിവസങ്ങളിൽ കുതിരസവാരി ക്ലാസ് മുടക്കാൻ വേണ്ടി ഞാൻ കാലാവസ്ഥയെ കുറ്റം പറയുമായിരുന്നു. എന്നാൽ രാജമൗലി ഇത് വളരെ ഗൗരവമായി എടുക്കാൻ ആവശ്യപ്പെടുകയും, ഒരു കുതിരയെ വാങ്ങി വീട്ടിൽ വളർത്താൻ എന്നോട് പറയുകയും ചെയ്തു! 'വീട്ടിൽ കുതിരയെ വളർത്താനോ? നിങ്ങൾ തമാശ പറയുകയാണോ?' എന്ന് ഞാൻ ചോദിച്ചു. എന്റെ ഗസ്റ്റ് ഹൗസിൽ കുറച്ച് താറാവുകൾ ഉണ്ടായിരുന്നു. എന്നാൽ അതല്ല, കുതിരയാണ് യഥാർത്ഥ മാസ് എന്ന് പറഞ്ഞ രാജമൗലി ദിവസവും കുതിരസവാരി ചെയ്യാൻ നിർബന്ധിച്ചു. 'നിങ്ങളുടെ സിനിമയ്ക്ക് വേണ്ടി എനിക്കിപ്പോൾ കുതിരയെയും വളർത്തേണ്ടി വരും!' എന്നാണ് ഞാൻ അന്ന് മറുപടി നൽകിയത്," പ്രഭാസ് ചിരിയോടെ ഓർത്തെടുത്തു.

വാൾപ്പയറ്റ്, റോക്ക് ക്ലൈമ്പിങ്‌, കുതിരസവാരി തുടങ്ങി എല്ലാ മേഖലകളിലും പ്രഭാസ് പൂർണ്ണത കൈവരിക്കണമെന്ന് രാജമൗലിക്ക് നിർബന്ധമുണ്ടായിരുന്നു. ആ വിട്ടുവീഴ്ചയില്ലാത്ത കാഴ്ചപ്പാടാണ് സിനിമയിലെ ഓരോ ഫ്രെയിമിലും പ്രതിഫലിച്ചത്.

ബാഹുബലി 3 
ബാഹുബലിക്ക് മൂന്നാം ഭാഗം ഉണ്ടാകുമോ എന്ന ചർച്ചകൾക്ക് വീണ്ടും ജീവൻ വെയ്ക്കുകയാണ്. 'ബാഹുബലി: ദി ടോർച്ച്ബെയറർ' എന്ന ഡോക്യുമെന്ററിയിൽ നിന്നുള്ള ഒരു വീഡിയോ ക്ലിപ്പ് സോഷ്യൽ മീഡിയയിൽ വൈറലായതാണ് ഇതിന് കാരണം. പ്രഭാസ്, റാണ, അനുഷ്ക എന്നിവർ ചിത്രത്തിന്റെ മൂന്നാം ഭാഗത്തെക്കുറിച്ച് സൂചന നൽകുന്നതാണ് വീഡിയോ.

ബാഹുബലി: ദി ബിഗിനിങ് (2015), പ്രഭാസ് ഇരട്ട വേഷത്തിലെത്തിയ ചിത്രത്തിൽ റാണ, അനുഷ്ക, തമന്ന, രമ്യാ കൃഷ്ണൻ, സത്യരാജ്, നാസർ എന്നിവർ പ്രധാനവേഷങ്ങളിലെത്തി. അതുവരെ റിലീസ് ചെയ്തതിൽ വെച്ച് ഏറ്റവും കൂടുതൽ കളക്ഷൻ നേടിയ തെലുങ്ക് ചിത്രമായി ഇത് മാറി.

ബാഹുബലി: ദി കൺക്ലൂഷൻ (2017), ആദ്യ ഭാഗത്തെക്കാൾ വലിയ തരംഗമാണ് രണ്ടാം ഭാഗം സൃഷ്ടിച്ചത്. ലോകമെമ്പാടുമുള്ള ബോക്സ് ഓഫീസിൽ നിന്ന് മാത്രം ഏകദേശം 1,788 കോടി രൂപ നേടിയ ഈ ചിത്രം, ഇന്ത്യൻ സിനിമാ ചരിത്രത്തിലെ ഏറ്റവും വലിയ വിജയങ്ങളിലൊന്നായി.

കൈനിറയെ ചിത്രങ്ങളുമായി തിരക്കിലാണ് പ്രഭാസ്. 'ഫൗജി', 'സ്പിരിറ്റ്' (Spirit), 'കൽക്കി 2898 AD പാർട്ട് 2', 'സലാർ പാർട്ട് 2: ശൗര്യാംഗ പർവ്വം' എന്നിവയാണ് പ്രഭാസിന്റെ അണിയറയിൽ ഒരുങ്ങുന്ന പ്രൊജക്ടുകൾ.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi