തമിഴ്‌നാട് മുഖ്യമന്ത്രിയും താരവുമായ സി.ജോസഫ് വിജയ്‌യുടെ മകൻ ജേസൺ സഞ്ജയ്‌യുടെ ആദ്യ സംവിധാന ചിത്രം 'സിഗ്മ' റിലീസിനൊരുങ്ങുകയാണ്. സിനിമാപ്രേക്ഷകർ ഏറെ നാളായി കാത്തിരിക്കുന്ന ചിത്രത്തിന്റെ പ്രചാരണവുമായി ബന്ധപ്പെട്ട തിരക്കിലാണ് ജേസൺ ഇപ്പോൾ. സിനിമയെക്കുറിച്ചുള്ള വിശേഷങ്ങൾക്കൊപ്പം, ഇതുവരെ പൊതുവേദികളിൽ അധികം സംസാരിച്ചിട്ടില്ലാത്ത തന്റെ കുടുംബബന്ധങ്ങളെക്കുറിച്ചും ജേസൺ തുറന്നു പറയുകയാണ്. ഒരു അഭിമുഖത്തിനിടെയാണ് അമ്മ സംഗീതയും അച്ഛൻ വിജയ്‌യുമായുള്ള ബന്ധത്തെക്കുറിച്ച് ജേസൺ മനസ്സ് തുറന്നത്.

തന്റെ ജീവിതത്തിലെ ഏറ്റവും വലിയ പിന്തുണ അമ്മയാണെന്നാണ് ജേസൺ പറയുന്നത്. എപ്പോഴും തന്നെക്കുറിച്ചും സഹോദരിയെക്കുറിച്ചുമാണ് അമ്മയുടെ ചിന്ത എന്നും അദ്ദേഹം പറഞ്ഞു. “എന്റെ ജീവിതത്തിലെ ഏറ്റവും വലിയ താങ്ങും കരുത്തും അമ്മയാണ്. 24 മണിക്കൂറും അമ്മ എന്നെയും എന്റെ സഹോദരിയെയും കുറിച്ച് ചിന്തിക്കും. ഒരു ദിവസം ഞാൻ വിളിക്കാൻ മറന്നാൽ പോലും എന്താണ് സംഭവിച്ചതെന്നും എങ്ങനെയുണ്ടെന്നും ചോദിച്ച് അമ്മ തന്നെ വിളിക്കും,” ജേസൺ പറഞ്ഞു.

Also Read

placeholder

ചെമ്പരത്തിപ്പൂവും റോസും തെച്ചിപ്പൂവും ജമന്തിയും കൊണ്ടൊരു കറി

placeholder

ബന്ധത്തിലെ മാനസിക സമ്മർദം; കണ്ണിന് ശസ്ത്രക്രിയ വേണ്ടിവന്നെന്ന് അനുപമ പരമേശ്വരൻ

placeholder

ഗോവിന്ദ തന്റെ 'കാമുകി'യെ വീണ്ടും വിവാഹം കഴിക്കാനൊരുങ്ങുന്നുവെന്ന് ഭാര്യ സുനിത

എന്നാൽ അച്ഛനും അമ്മയുമായുള്ള ബന്ധത്തിൽ ചില കാര്യങ്ങൾ തുറന്നുപറയാൻ തനിക്ക് മടിയുണ്ടെന്നും ജേസൺ വെളിപ്പെടുത്തി. “എല്ലാ കാര്യങ്ങളും അച്ഛനോടും അമ്മയോടും പങ്കുവെക്കാൻ എനിക്ക് അൽപം മടിയുണ്ട്. അതിനുള്ള സ്‌പേസ് അവർ എനിക്ക് നൽകിയിട്ടില്ലെന്ന് തോന്നാറുണ്ട്. എന്നാൽ സഹോദരിയോട് എനിക്ക് എല്ലാം തുറന്നു പറയാൻ കഴിയും,” ജേസൺ പറഞ്ഞു.

വിജയ്‌യുടെ മകനെന്ന നിലയിൽ എന്നും മാധ്യമശ്രദ്ധയിൽ നിന്നിരുന്നെങ്കിലും തന്റെ വ്യക്തിജീവിതം പൊതുജനങ്ങളിൽ നിന്ന് അകറ്റിനിർത്താനാണ് ജേസൺ ഇതുവരെ ശ്രമിച്ചത്. അതുകൊണ്ടുതന്നെ കുടുംബത്തെക്കുറിച്ചുള്ള താരപുത്രന്റെ ഈ തുറന്നുപറച്ചിൽ ആരാധകർക്കിടയിൽ ശ്രദ്ധ നേടുകയാണ്. അതേസമയം, തന്റെ സിനിമകളിലും സ്വാഭാവികത നിലനിർത്താനാണ് ആഗ്രഹമെന്നും സ്വന്തം വ്യക്തിത്വത്തിന്റെ ഭാഗങ്ങൾ കഥ ആവശ്യപ്പെടുന്നിടത്ത് സിനിമയിലേക്ക് കൊണ്ടുവരുമെന്നും ജേസൺ വ്യക്തമാക്കി.

ജേസൺ സഞ്ജയ്‌യുടെ സംവിധാന അരങ്ങേറ്റ ചിത്രമായ 'സിഗ്മ' ഒക്ടോബർ 2-ന് തിയേറ്ററുകളിലെത്തും. സന്ദീപ് കിഷനാണ് ചിത്രത്തിലെ നായകൻ. സമ്പത്ത്, രാജു സുന്ദരം എന്നിവരും പ്രധാന വേഷങ്ങളിലെത്തുന്ന ചിത്രത്തിന്റെ സംഗീതം ഒരുക്കിയിരിക്കുന്നത് തമൻ ആണ്. ആദ്യ സിനിമയുടെ റിലീസിനായി ഒരുങ്ങുന്നതിനിടെ ജേസൺ ഇപ്പോൾ സജീവമായി പ്രമോഷൻ പരിപാടികളിലും മാധ്യമ അഭിമുഖങ്ങളിലും പങ്കെടുക്കുന്നുണ്ട്. വിജയ്‌യുടെ മകൻ എന്ന തിരിച്ചറിയലിൽ നിന്ന് മാറി സംവിധായകനെന്ന നിലയിൽ സ്വന്തം വഴി തുറക്കാനുള്ള ജേസൺ സഞ്ജയ്‌യുടെ ആദ്യ ചുവടായാണ് 'സിഗ്മ' വിലയിരുത്തപ്പെടുന്നത്.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi