‘സംസാരിക്കുമ്പോൾ വിക്ക് ഉണ്ടായിരുന്നതുകൊണ്ട് കുട്ടിക്കാലത്ത് ഞാൻ ഒരുപാട് പരിഹസിക്കപ്പെട്ടു’

തെന്നിന്ത്യൻ സിനിമകളിലെ പരിചിത മുഖമായിരുന്നു നടി സമീറ റെഡ്ഡി. വിവാഹ ശേഷം സിനിമയിൽ നിന്ന് വിട്ടുനിന്ന സമീറയിപ്പോൾ, സോഷ്യൽ മീഡിയയിൽ self-acceptance ന്റെ ശബ്ദമായി മാറിയിരിക്കുകയാണ്. പ്രസവാനന്തരമുള്ള ശരീരഭാരം, മാനസിക വെല്ലുവിളികൾ, ഉത്കണ്ഠ (anxiety) എന്നിവയെക്കുറിച്ചെല്ലാം തുറന്നുപറഞ്ഞുകൊണ്ട് അവർ നിരവധി ആരാധകരുടെ പ്രശംസ പിടിച്ചുപറ്റിയിട്ടുണ്ട്. സമീറയുടെ കുട്ടിക്കാലത്ത് സംസാരവൈകല്യം (stammering) കാരണം താൻ നേരിട്ട പരിഹാസങ്ങളെക്കുറിച്ചും, ആത്മവിശ്വാസം വീണ്ടെടുക്കാൻ വർഷങ്ങൾ നീണ്ട തെറാപ്പി എടുത്തതിനെക്കുറിച്ചും വെളിപ്പെടുത്തുകയാണ് താരമിപ്പോൾ.

"ഞാൻ ഇത് നേരിട്ട് അനുഭവിച്ചതാണ്. വിക്ക് (stammer) ഉണ്ടായിരുന്നതുകൊണ്ട് കുട്ടിക്കാലത്ത് ഞാൻ ഒരുപാട് പരിഹസിക്കപ്പെട്ടിട്ടുണ്ട്. ആത്മവിശ്വാസം വളർത്തിയെടുക്കാൻ വർഷങ്ങൾ നീണ്ട തെറാപ്പി വേണ്ടിവന്നു. ഇന്നും സംസാരിക്കുമ്പോൾ എനിക്ക് വിക്ക് വരികയും, ആരെങ്കിലും അതിനോട് പ്രതികരിക്കുകയും ചെയ്താൽ അത് എന്നെ ബാധിക്കാറുണ്ട്. കുട്ടിക്കാലത്തെ ലേബലുകൾ നിങ്ങളെ അത്രത്തോളം ആഴത്തിൽ സ്വാധീനിക്കും," ഹിന്ദുസ്ഥാൻ ടൈംസിന് നൽകിയ അഭിമുഖത്തിൽ സമീറ പറയുന്നു.

കുട്ടികളെ 'മന്ദഗതിയിലുള്ളവർ' എന്നോ 'ബലഹീനർ' എന്നോ ആവർത്തിച്ചു വിളിക്കുന്നത് അവരിൽ സ്വയം സംശയം ഉണ്ടാക്കുമെന്നും, പഠനത്തിലോ സാമൂഹികമായ കാര്യങ്ങളിലോ റിസ്ക് എടുക്കാൻ അവർ ഭയപ്പെടുമെന്നും അവർ കൂട്ടിച്ചേർത്തു. ഇന്ത്യയിലുടനീളമുള്ള ഒരു കോടി കുട്ടികളിലേക്ക് സഹായമെത്തിക്കുന്ന 'പി ആന്റ് ജി ശിക്ഷ' (P&G Shiksha) പരിപാടിയിൽ പങ്കെടുക്കവെ അവർ വ്യക്തമാക്കി.

തന്റെ കുട്ടികളോട് താൻ എപ്പോഴും സംസാരിക്കാറുണ്ടെന്ന് സമീറ പറയുന്നു. ഒരു കാര്യത്തിലെ പോരായ്മ ഒരാളുടെ വ്യക്തിത്വത്തെ നിർവചിക്കുന്നില്ലെന്നും മറ്റുള്ളവരെ താഴ്ത്തിക്കെട്ടരുതെന്നും താൻ അവരെ പഠിപ്പിക്കുന്നുണ്ടെന്നും അവർ വ്യക്തമാക്കി.

സോഷ്യൽ മീഡിയയിൽ 'മെസ്സി മാമ' (Messy Mama) എന്ന പേരിൽ പ്രശസ്തയായ സമീറ രണ്ട് കുട്ടികളുടെ അമ്മയാണ്. ഒരു 'പെർഫെക്റ്റ് പാരന്റ്' ആയിരിക്കുക എന്ന മിഥ്യാധാരണയിൽ വിശ്വസിക്കാതെ കുട്ടികളെ ശ്രദ്ധിക്കുന്നതിലാണ് താൻ പ്രാധാന്യം നൽകുന്നതെന്ന് അവർ പറയുന്നു.

"ഇന്നത്തെ കാലത്ത് മാതാപിതാക്കളുടെ മേൽ വലിയ സമ്മർദ്ദമുണ്ട്. മറ്റുള്ളവരുടെ കുട്ടികൾ പിയാനോ പഠിക്കുന്നു, വയലിൻ പഠിക്കുന്നു എന്നൊക്കെ കേൾക്കുമ്പോൾ ഒരു മത്സരബുദ്ധി വരുന്നു. എന്നാൽ ഓരോ കുട്ടിയും വ്യത്യസ്തരാണെന്ന് നമ്മൾ മനസ്സിലാക്കണം. എന്റെ മകന് അനുയോജ്യമായത് മകൾക്ക് ചേരണമെന്നില്ല. സമൂഹത്തിന്റെ സമ്മർദ്ദത്തിന് വഴങ്ങാതെ കുട്ടികൾക്ക് ശരിയായത് എന്താണെന്ന് കണ്ടെത്തുകയാണ് വേണ്ടത്," സമീറ പറഞ്ഞു.

2014-ലാണ് സമീറ റെഡ്ഡിയും സംരംഭകനായ അക്ഷയ് വർധെയും വിവാഹിതരായത്. ഹാൻസ് (2015), നൈറ (2019) എന്നിവരാണ് മക്കൾ. ‘വാരണം ആയിരം’, ‘ഒറു നാൾ വരും’, ‘വേട്ടെ’ എന്നീ ചിത്രങ്ങളിൽ സമീറ അഭിനയിച്ചിട്ടുണ്ട്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi