‘ഫറാ ഖാന്‍ എനിക്ക് ഷുഗര്‍ മമ്മി, അവർ എന്റെ വീട് പണിതുതരുന്നു, സല്‍മാന്‍ ഖാന്‍ എനിക്കായി കോടികള്‍ ചെലവഴിച്ചു’

തന്റെ ഏറ്റവും പുതിയ ഗാനമായ 'സരൂരത്ത്' ന്റെ പ്രചാരണത്തിരക്കിലാണ് നടി രാഖി സാവന്ത്. അടുത്തിടെ ഒരു പോഡ്കാസ്റ്റില്‍, രാഖി സ്വയം ഇന്‍ഡസ്ട്രിയുടെ മകളാണെന്ന് വിശേഷിപ്പിക്കുകയും ഫറാ ഖാനുമായുള്ള തന്റെ ബന്ധത്തെക്കുറിച്ച് തുറന്നു പറയുകയും ചെയ്തു. ഫറ ഖാനെ തന്റെ ഷുഗര്‍ മമ്മി എന്നും ഷാരൂഖ് ഖാനെയും സല്‍മാന്‍ ഖാനെയും തന്റെ ഗോഡ്ഫാദര്‍മാരെന്നും അവര്‍ വിളിച്ചു.

'ഫറാ ഖാന്‍ എന്റെ ഷുഗര്‍ മമ്മിയും ഗോഡ്മദറുമാണ്. ഷാരൂഖ് ഖാനും സല്‍മാന്‍ ഖാനും എന്റെ ഗോഡ്ഫാദര്‍മാരാണ്. എനിക്ക് ആരുമില്ല, ഞാന്‍ ഉപേക്ഷിക്കപ്പെട്ടവളാണ്. ദീപാവലിക്ക് ടിവി, വാഷിങ് മെഷീന്‍, പാത്രങ്ങള്‍, പ്രഷര്‍ കുക്കര്‍ എന്നിവയുള്‍പ്പെടെ നിരവധി സമ്മാനങ്ങള്‍ ഫറാ മാം എനിക്ക് നല്‍കി. അവരെന്റെ വീട് പണിത് തരികയാണ്.' ഫറയുമായുള്ള ബന്ധത്തെക്കുറിച്ച് ചോദിച്ചപ്പോള്‍ രാഖി പറഞ്ഞു.

'മൂന്നര വര്‍ഷത്തിന് ശേഷം ഞാന്‍ വീട്ടില്‍ വന്നപ്പോള്‍, എന്റെ വീട് മുഴുവന്‍ താറുമാറായിരുന്നു. താമസിക്കാന്‍ കൊള്ളാത്ത അവസ്ഥയിലായിരുന്നു. മഴയില്‍ അത് പൂര്‍ണ്ണമായും നശിച്ചുപോയി. അതുകൊണ്ട് ഫറാ മാം പുതിയ ഫ്‌ലോറിങ് ചെയ്ത് വീട് മുഴുവന്‍ പുനര്‍നിര്‍മ്മിച്ച് തരികയാണ്. അത് വലിയൊരു കാരുണ്യമാണ്.' രാഖി കൂട്ടിച്ചേര്‍ത്തു.

തന്റെ കുക്കിങ് വ്‌ലോഗിനായി രാഖി അടുത്തിടെ മുംബൈയിലുള്ള ഫറയുടെ വീട്ടിലെത്തിയിരുന്നു. സ്വന്തമായി ലിഫ്റ്റും നീന്തല്‍ക്കുളവുമുള്ള ഏഴ് കിടപ്പുമുറികളുള്ള ഒരു അപ്പാര്‍ട്ട്‌മെന്റിലാണ് ഫറാ താമസിക്കുന്നതെന്ന് അറിഞ്ഞപ്പോള്‍ വ്‌ലോഗിനിടെ രാഖി അത്ഭുതപ്പെട്ടു. ഫറയുടെ വീടിന് 15 കോടി രൂപയേ വിലയുള്ളൂ എന്നും, ദുബായിലുള്ള തന്റെ വീടിന് 50 കോടി വിലയുണ്ടെന്നും അതിനാല്‍ ഫറയെക്കാള്‍ വിലകൂടിയ വീട് തനിക്കാണെന്നും രാഖി തമാശയായി പറഞ്ഞു.

എന്നാല്‍ തന്റെ വീടിന് അതിലും കൂടുതല്‍ വിലയുണ്ടെന്നും, കെട്ടിടത്തിലെ വാച്ച്മാന്റെ അപ്പാര്‍ട്ട്‌മെന്റിന് മാത്രം 15 കോടി രൂപ വിലവരുമെന്നും ഫറാ മറുപടി നല്‍കി. ആ കെട്ടിടത്തില്‍ തനിക്ക് മൂന്ന് നിലകള്‍ സ്വന്തമായുണ്ടെന്നും അവര്‍ വെളിപ്പെടുത്തി. വ്‌ലോഗിന്റെ ഭാഗമായി ഫറാ രാഖിക്ക് നിരവധി സമ്മാനങ്ങളും നല്‍കി. സല്‍മാനെ 'പാവങ്ങളുടെ രക്ഷകന്‍' എന്ന് വിശേഷിപ്പിച്ച രാഖി, അദ്ദേഹത്തെയും പ്രശംസിച്ചു. തനിക്ക് ജോലിയില്ലാതിരുന്നപ്പോള്‍ ബിഗ് ബോസില്‍ അവസരം നേടാന്‍ സൂപ്പര്‍സ്റ്റാര്‍ സഹായിച്ചുവെന്നും, പണമില്ലാതിരുന്നപ്പോള്‍ അമ്മയുടെ കാന്‍സര്‍ ചികിത്സയ്ക്ക് പിന്തുണച്ചുവെന്നും, തനിക്കായി കോടികള്‍ ചെലവഴിച്ചുവെന്നും അവര്‍ പങ്കുവെച്ചു.

ബോക്സ് ഓഫീസില്‍ വലിയ വിജയം നേടിയ 'മേം ഹൂം നാ' എന്ന സിനിമയില്‍ രാഖി ഫറയ്ക്കും ഷാരൂഖിനുമൊപ്പം പ്രവര്‍ത്തിച്ചിട്ടുണ്ട്. ബിഗ് ബോസിന്റെ ഒന്നാം സീസണില്‍ ആദ്യമായി പങ്കെടുത്ത അവര്‍, ആദ്യ അഞ്ച് ഫൈനലിസ്റ്റുകളില്‍ ഒരാളായിരുന്നു. പിന്നീട് ബിഗ് ബോസ് 14-ല്‍ ഒരു ചലഞ്ചറായും ബിഗ് ബോസ് 15-ല്‍ വൈല്‍ഡ് കാര്‍ഡ് എന്‍ട്രിയായും അവര്‍ പലതവണ ഷോയില്‍ പങ്കെടുത്തിട്ടുണ്ട്.

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi