തെറ്റായ നിർദ്ദേശങ്ങൾ നൽകുന്ന ഇൻഫ്ലുവൻസർമാർക്കെതിരെ നടപടി; ഇനി യോഗ്യത തെളിയിക്കണമെന്ന് ചൈന

സോഷ്യൽ മീഡിയയിൽ ഇൻഫ്ലുവൻസർമാരെ കാണാതെ ഒരു ദിവസവും കടന്നുപോകാത്ത സ്ഥിതിയാണിപ്പോൾ. എന്നാൽ ഇക്കൂട്ടർക്കെതിരെ ചൈന ശക്തമായ നടപടികൾ ആരംഭിച്ചിരിക്കുകയാണിപ്പോൾ. ഈ നടപടി അവിടുത്തെ 'ക്രിയേറ്റർ ഇക്കോണമി'യെ (Creator Economy) മാറ്റിമറിച്ചുകൊണ്ടിരിക്കുകയാണ്. ഔദ്യോഗിക വിവരങ്ങൾ പ്രകാരം, ഓൺലൈനിൽ ഇൻഫ്ലുവൻസർമാർക്ക് എന്തൊക്കെ പറയാം എന്നതിനെക്കുറിച്ച് അധികൃതർ കർശന നിർദ്ദേശങ്ങൾ പുറപ്പെടുവിച്ചതിനെത്തുടർന്ന് കഴിഞ്ഞ ആഴ്ചകളിൽ ആയിരക്കണക്കിന് അക്കൗണ്ടുകൾ സസ്പെൻഡ് ചെയ്യുകയോ നിരീക്ഷണത്തിലാക്കുകയോ ചെയ്തിട്ടുണ്ട്.

പ്രൊഫഷണൽ യോഗ്യതകളില്ലാതെ നിക്ഷേപ ഉപദേശങ്ങൾ, ആരോഗ്യ ടിപ്സുകൾ, ബ്യൂട്ടി ഹാക്കുകൾ തുടങ്ങിയ വിവരങ്ങൾ നൽകുന്ന ക്രിയേറ്റർമാരെയാണ് പ്രധാനമായും ഈ നടപടി ലക്ഷ്യമിടുന്നത്.

സോഷ്യൽ മീഡിയയിൽ ചൈനയുടെ കർശന നിയന്ത്രണം
ഇതൊരു ഒറ്റപ്പെട്ട നടപടിയല്ല, മറിച്ച് ചൈനയുടെ വിപുലമായ ഇന്റർനെറ്റ് നിയന്ത്രണ സംവിധാനത്തിന്റെ ഭാഗമാണ്. ചൈനയിലെ ഓൺലൈൻ ഉള്ളടക്കങ്ങൾ നിരീക്ഷിക്കുന്നതിലും നിയന്ത്രിക്കുന്നതിലും 'സൈബർ സ്പേസ് അഡ്മിനിസ്‌ട്രേഷൻ ഓഫ് ചൈന' (CAC) പ്രധാനപങ്ക് വഹിക്കുന്നുണ്ട്. തെറ്റായ വിവരങ്ങൾ, ദോഷകരമായ ട്രെൻഡുകൾ, സാമൂഹിക ക്രമം തകർക്കുന്ന ഉള്ളടക്കങ്ങൾ എന്നിവ നീക്കം ചെയ്ത് ഡിജിറ്റൽ ഇടം വൃത്തിയാക്കാൻ ലക്ഷ്യമിട്ടുള്ള നിരവധി ക്യാമ്പയിനുകൾ വർഷങ്ങളായി അവർ നടത്തുന്നുണ്ട്.

ചൈനയിലെ സോഷ്യൽ മീഡിയ പ്ലാറ്റ്‌ഫോമുകൾ വളരെ കർശനമായ മാർഗ്ഗനിർദ്ദേശങ്ങൾ പാലിക്കേണ്ടതുണ്ട്. പ്രശ്‌നമുള്ള ഉള്ളടക്കം നീക്കം ചെയ്യുക മാത്രമല്ല, തങ്ങളുടെ പ്ലാറ്റ്‌ഫോമുകളിൽ വരാൻ പോകുന്ന കാര്യങ്ങൾ മുൻകൂട്ടി നിരീക്ഷിക്കാനും നിയന്ത്രിക്കാനും അവർ ബാധ്യസ്ഥരാണ്. സെലിബ്രിറ്റി സംസ്കാരം മുതൽ തെറ്റായ വിവരങ്ങൾ വരെയുള്ളവ തടയാൻ ‘ക്വിംഗ്ലാങ്’ (Qinglang) പോലുള്ള ക്യാമ്പയിനുകൾ മുൻപും നടപ്പിലാക്കിയിട്ടുണ്ട്. 

നിയന്ത്രണവും വിശ്വാസ്യതയും
പല നിയന്ത്രണങ്ങളെയും പോലെ, ഈ നീക്കവും വലിയ ചർച്ചകൾക്ക് വഴിതെളിച്ചിട്ടുണ്ട്. തെറ്റായ വിവരങ്ങൾ അതിവേഗം പ്രചരിക്കുകയും അത് ആളുകളുടെ ജീവിതത്തെ ബാധിക്കുകയും ചെയ്യുന്ന ഈ കാലഘട്ടത്തിൽ ഇത്തരം ഇടപെടലുകൾ അത്യാവശ്യമാണെന്ന് അനുകൂലിക്കുന്നവർ വാദിക്കുന്നു. യോഗ്യതയുള്ളവർ മാത്രം ഉപദേശം നൽകുന്നത് സോഷ്യൽ മീഡിയയെ കൂടുതൽ സുരക്ഷിതവും വിശ്വസനീയവുമാക്കുമെന്നും. എന്നാൽ, ഇത്തരം നിയമങ്ങൾ അഭിപ്രായസ്വാതന്ത്ര്യത്തെ തടയുമെന്നും വൈവിധ്യമാർന്ന ശബ്ദങ്ങളെ ഇല്ലാതാക്കുമെന്നും വിമർശകർ കരുതുന്നു. ‘യോഗ്യത’ എങ്ങനെ നിർവചിക്കപ്പെടുന്നു എന്നും, ഏത് വിവരമാണ് വിശ്വസനീയമെന്ന് തീരുമാനിക്കാനുള്ള അധികാരം ആർക്കാണെന്നതിനെക്കുറിച്ചും ആശങ്കകൾ നിലനിൽക്കുന്നുണ്ട്.

യോഗ്യതയില്ലെങ്കിൽ ഉള്ളടക്കമില്ല
ചൈനയുടെ ഇന്റർനെറ്റ് റെഗുലേറ്ററായ സി.എ.സി (CAC) കൊണ്ടുവന്ന പുതിയ നിയമമനുസരിച്ച്, ആരോഗ്യ സംരക്ഷണം, ധനകാര്യം, നിയമം അല്ലെങ്കിൽ വിദ്യാഭ്യാസം തുടങ്ങിയ പ്രത്യേക വിഷയങ്ങളിൽ സംസാരിക്കുന്ന ഇൻഫ്ലുവൻസർമാർ, തങ്ങൾക്ക് അതിനുള്ള യോഗ്യതയുണ്ടെന്ന് തെളിയിക്കണം.

അതായത്, ബന്ധപ്പെട്ട വിഷയങ്ങളിൽ ബിരുദമോ സർട്ടിഫിക്കറ്റുകളോ പ്രൊഫഷണൽ ലൈസൻസോ അവർക്കുണ്ടായിരിക്കണം. ഈ മാനദണ്ഡങ്ങൾ പാലിച്ചില്ലെങ്കിൽ അവർക്ക് ആ വിഷയങ്ങളിൽ ലൈവ് സ്ട്രീമിംഗ് നടത്താനോ പോസ്റ്റുകൾ ഇടാനോ അനുവാദമുണ്ടാകില്ല.

കൂടാതെ, ഇതിന്റെ ഉത്തരവാദിത്തം ക്രിയേറ്റർമാർക്ക് മാത്രമല്ല. സോഷ്യൽ മീഡിയ പ്ലാറ്റ്‌ഫോമുകളും ഈ യോഗ്യതകൾ പരിശോധിച്ച് ഉറപ്പുവരുത്തണം. നിയമം ലംഘിക്കുന്ന ഉള്ളടക്കം നീക്കം ചെയ്യുന്നതിൽ പരാജയപ്പെട്ടാൽ പ്ലാറ്റ്‌ഫോമുകൾ പിഴയൊടുക്കേണ്ടി വരും.

എന്തുകൊണ്ട് ചൈന ഈ നടപടി സ്വീകരിക്കുന്നു?
തെറ്റായ വിവരങ്ങൾ പ്രചരിക്കുന്നതും അത് സമൂഹത്തിലുണ്ടാക്കുന്ന പ്രത്യാഘാതങ്ങളുമാണ് ഈ നടപടിക്ക് പിന്നിലെ പ്രധാനകാരണം. സ്റ്റോക്ക് മാർക്കറ്റ് നിക്ഷേപം മുതൽ ആരോഗ്യ കാര്യങ്ങൾ വരെ എന്തിനും ഉപദേശം നൽകുന്ന ഇൻഫ്ലുവൻസർമാരുടെ എണ്ണം ചൈനയിൽ വലിയ രീതിയിൽ വർദ്ധിച്ചിട്ടുണ്ട്. ചില ഉള്ളടക്കങ്ങൾ നിരുപദ്രവകരമെന്ന് തോന്നാമെങ്കിലും, കൃത്യമായ അറിവില്ലാതെയുള്ള ഉപദേശങ്ങൾ ഉപയോക്താക്കളെ തെറ്റായ തീരുമാനങ്ങളിലേക്ക് നയിക്കുമെന്നും അത് സാമ്പത്തിക നഷ്ടത്തിനോ ആരോഗ്യ പ്രശ്നങ്ങൾക്കോ കാരണമാകുമെന്നും അധികൃതർ വാദിക്കുന്നു.

ഓൺലൈനിൽ ലഭ്യമാകുന്ന വിവരങ്ങളുടെ ഗുണനിലവാരവും വിശ്വാസ്യതയും മെച്ചപ്പെടുത്തുക എന്നതാണ് ഇതിലൂടെ ലക്ഷ്യമിടുന്നത്. പ്രത്യേകിച്ച്, ഇൻഫ്ലുവൻസർമാരുടെ വാക്കുകൾ കണ്ണടച്ച് വിശ്വസിക്കുന്ന യുവാക്കളെ സംരക്ഷിക്കുക എന്നതും ഈ നീക്കത്തിന്റെ പ്രധാന ലക്ഷ്യമാണ്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi