വാരാണസി നഗരത്തിന്റെ 70% വലുപ്പം, 700 അടി നീളവും 400 അടി വീതിയുമുള്ള രാജമൗലിയുടെ കാശി

ബാഹുബലിയെന്ന ഒറ്റ ചിത്രം മതി, മലയാളികൾക്ക് വിഖ്യാത സംവിധായകൻ എസ്.എസ്. രാജമൗലിയെ ഓർക്കാൻ. അദ്ദേഹത്തിന്റെ ഏറ്റവും പുതിയ ചിത്രമായ 'വാരാണസി'യെക്കുറിച്ചുള്ള (Varanasi) കൗതുകകരമായ ചില വിവരങ്ങൾ ഇപ്പോൾ പുറത്തുവന്നിരിക്കുകയാണ്. മഹേഷ് ബാബു, പ്രിയങ്ക ചോപ്ര, പൃഥ്വിരാജ് സുകുമാരൻ എന്നിവർ പ്രധാന വേഷങ്ങളിൽ എത്തുന്ന ഈ ചിത്രം ഇന്ത്യൻ സിനിമയിലെ തന്നെ ഏറ്റവും ചെലവേറിയ സിനിമയാണെന്നാണ് പറയപ്പെടുന്നത്.

യഥാർത്ഥ വാരാണസി നഗരത്തിൽ ഷൂട്ടിങ് നടത്തുക എന്നത് പ്രായോഗികമായി ബുദ്ധിമുട്ടുള്ള കാര്യമായതിനാൽ, രാജമൗലി ഹൈദരാബാദിൽ വാരാണസി നഗരത്തിന്റെ തനി പകർപ്പ് തന്നെ നിർമ്മിച്ചിരിക്കുകയാണ്. ഏകദേശം 700 അടി നീളത്തിലും 400 അടി വീതിയിലുമുള്ള ഈ സെറ്റ് യഥാർത്ഥ നഗരത്തിന്റെ 70% വലിപ്പത്തിലാണ് ഒരുക്കിയിരിക്കുന്നത്.

നഗരത്തിലെ ഇടുങ്ങിയ വഴികളും പുരാതനക്ഷേത്രങ്ങളും ഘട്ടുകളും അതേപടി ഇവിടെ പുനർനിർമ്മിച്ചിട്ടുണ്ട്. വാരാണസിയിലെ ചരിഞ്ഞ നിലയിലുള്ള, പ്രശസ്തമായ രത്നേശ്വർ മഹാദേവ് ക്ഷേത്രം, അതിന്റെ ചരിവും കൃത്യമായ അളവുകളും പാലിച്ച് സെറ്റിൽ നിർമ്മിച്ചിരിക്കുന്നത് അത്ഭുതകരമായ കാഴ്ചയാണ്.

ഒരു സയൻസ് ഫിക്ഷൻ ഗണത്തിൽപ്പെടുന്ന ഈ ചിത്രം ത്രേതായുഗം മുതൽ എ.ഡി 2027 വരെയുള്ള വിവിധ കാലഘട്ടങ്ങളെയാണ് അവതരിപ്പിക്കുന്നത്. Time Travel പ്രമേയമാകുന്ന ചിത്രത്തിൽ കാലത്തിനനുസരിച്ച് വാരാണസി നഗരത്തിന് സംഭവിക്കുന്ന മാറ്റങ്ങൾ കാണിക്കാൻ ഒരേസമയം രണ്ട് രീതിയിലുള്ള സെറ്റുകളാണ് നിർമ്മിച്ചിരിക്കുന്നത്. പഴയ കാലഘട്ടത്തെ കാണിക്കാൻ കെട്ടിടങ്ങൾ 12 അടിയോളം താഴ്ത്തി വെക്കുകയും പിന്നീട് അത് പഴയപടി ആക്കുകയും ചെയ്യുന്ന സങ്കീർണ്ണമായ സാങ്കേതിക വിദ്യയാണ് ഉപയോഗിക്കുന്നത്.

കഴിഞ്ഞ നവംബറിൽ രാമോജി ഫിലിം സിറ്റിയിൽ നടന്ന ചടങ്ങിലാണ് ചിത്രത്തിന്റെ ടൈറ്റിലും ഫസ്റ്റ് ലുക്കും പുറത്തുവിട്ടത്. 2027 ഏപ്രിലിൽ ചിത്രം തീയേറ്ററുകളിൽ എത്തുമെന്നാണ് പ്രതീക്ഷിക്കുന്നത്. രാജമൗലി ചിത്രങ്ങളുടെ പതിവ് ശൈലി പോലെ അതീവ രഹസ്യമായാണ് ഇതിന്റെ ചിത്രീകരണവും നടക്കുന്നത്. എങ്കിലും അന്താരാഷ്ട്ര മാധ്യമങ്ങൾക്ക് സെറ്റിൽ പ്രവേശനം അനുവദിച്ചതിനെത്തുടർന്നാണ് ഇപ്പോൾ കൂടുതൽ വിവരങ്ങൾ പുറത്തുവരുന്നത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi