‘എളുപ്പത്തിൽ ചെയ്ത് ഫലിപ്പിക്കാൻ കഴിയുന്ന കഥാപാത്രമല്ല, രൺവീർ സിങ് അത്ഭുതപ്പെടുത്തി’ - പൃഥ്വിരാജ്

'ധുരന്ധർ' സിനിമയിലെ പ്രകടനം ഉൾപ്പെടെ, വർഷങ്ങളായി നിരവധി കഥാപാത്രങ്ങളിലൂടെ രൺവീർ സിങ് കൈയടി നേടിയിട്ടുണ്ട്. ധുരന്ധറാണ് രൺവീറിന്റെ കരിയർ ബെസ്റ്റ് എന്നു പറയുന്നവരുമുണ്ട്. എന്നാൽ പൃഥ്വിരാജിന്റെ അഭിപ്രായത്തിൽ, മറ്റൊരു കഥാപാത്രം ഇപ്പോഴും ഈ പട്ടികയിൽ മുന്നിലുണ്ട്. കരൺ ജോഹർ സംവിധാനം ചെയ്ത 'റോക്കി ഔർ റാണി കീ പ്രേം കഹാനി'യിലേതാണീ വേഷം.

ധുരന്ധറിലെ രൺവീറിന്റെ പ്രകടനത്തിൽ താൻ ഒരുപോലെ സന്തുഷ്ടനാണെങ്കിലും, റോക്കി ഔർ റാണി കീ പ്രേം കഹാനിയിലെ റോക്കി രൺധാവ എന്ന കഥാപാത്രമാണ് രൺവീറിന്റെ പ്രിയപ്പെട്ട പ്രകടനങ്ങളിൽ ഒന്നെന്ന് പൃഥ്വിരാജ് പറഞ്ഞു.

റോക്കി ഔർ റാണി കീ പ്രേം കഹാനി

‌'ഗലാട്ട പ്ലസി'ന് നൽകിയ അഭിമുഖത്തിൽ, സമീപകാലത്ത് തന്നെ ആകർഷിച്ച ചില പ്രകടനങ്ങളെക്കുറിച്ച് സംസാരിക്കവെയാണ് പൃഥ്വിരാജ് ഇക്കാര്യം പറഞ്ഞത്.

"എന്നെ സംബന്ധിച്ചിടത്തോളം, അദ്ദേഹത്തിന്റെ ഏറ്റവും മികച്ച പ്രകടനങ്ങളിലൊന്ന് റോക്കി ഔർ റാണി കീ പ്രേം കഹാനിയിലെ റോക്കിയാണ്. ഗംഭീരമായിരുന്നു. ആളുകൾ ധുരന്ധറിനെക്കുറിച്ച് സംസാരിക്കുന്നത് എനിക്കറിയാം, ധുരന്ധറിലും അദ്ദേഹം മികച്ചതായിരുന്നു. എന്നാൽ രൺവീർ സിങ് റോക്കി ഔർ റാണി കീ പ്രേം കഹാനിയിൽ അത്ഭുതപ്പെടുത്തിക്കളഞ്ഞു എന്ന് ഞാൻ കരൺ ജോഹറിനോടും പറഞ്ഞിട്ടുണ്ട്. അത് അത്ര എളുപ്പത്തിൽ ചെയ്ത് ഫലിപ്പിക്കാൻ കഴിയുന്ന ഒരു കഥാപാത്രമേയല്ല," പൃഥ്വിരാജ് വ്യക്തമാക്കി.

തികച്ചും വ്യത്യസ്തമായ പശ്ചാത്തലങ്ങളിൽ നിന്നുള്ള രണ്ട് വ്യക്തികൾ പരസ്പരം മനസ്സിലാക്കാനും അംഗീകരിക്കാനും പഠിക്കുന്നതിലൂടെ പ്രണയം കണ്ടെത്തുന്നതിനെക്കുറിച്ചാണ് ചിത്രം പറയുന്നത്. വലിയ പാരമ്പര്യമുള്ള ഒരു കുടുംബത്തിലെ പഞ്ചാബി യുവാവായാണ് രൺവീർ സിങ് എത്തിയത്. ആലിയ ഭട്ടായിരുന്നു നായിക.

വ്യത്യസ്ത ജോണറുകളിൽ വൻ ക്യാൻവാസിലൊരുങ്ങുന്ന ചിത്രങ്ങളുമായി പൃഥ്വിരാജിന് തിരക്കേറിയ നാളുകളാണ് വരാനിരിക്കുന്നത്. നിസാം ബഷീർ സംവിധാനം ചെയ്യുന്ന ത്രില്ലർ ചിത്രം 'ഐ, നോബഡി' (I, Nobody) ആണ് അദ്ദേഹത്തിന്റേതായി അടുത്തതായി പുറത്തിറങ്ങാനിരിക്കുന്നത്. ഇതിന് പിന്നാലെ ആക്ഷൻ ഡ്രാമ ചിത്രമായ 'ഖലീഫ' (Khalifa) എത്തും.

രാഹുൽ സദാശിവൻ സംവിധാനം ചെയ്യുന്ന ഹൊറർ ചിത്രത്തിനായും അദ്ദേഹം ഒരുങ്ങുന്നുണ്ട്. ഇതിനൊക്കെ പുറമെ, മഹേഷ് ബാബുവും പ്രിയങ്ക ചോപ്രയും പ്രധാന വേഷങ്ങളിൽ എത്തുന്ന, എസ്.എസ് രാജമൗലി സംവിധാനം ചെയ്യുന്ന പാൻ-ഇന്ത്യൻ ചിത്രമായ 'വാരണാസി' (Varanasi) യുടെയും ഭാഗമാണ് പൃഥ്വിരാജ്. ചിത്രം 2027 ഏപ്രിലിൽ തിയേറ്ററുകളിൽ എത്തും.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi