എന്തുകൊണ്ടാണ് വെയിൽ ഉണ്ടായിട്ടും ഇന്ത്യക്കാരിൽ വിറ്റാമിൻ ഡി കുറയുന്നത്?

ധാരാളം വെയിൽ ലഭിക്കുന്ന രാജ്യമാണ് നമ്മുടേത്. എന്നിരുന്നാലും, ഇന്ത്യക്കാരിൽ ഭൂരിഭാഗം ആളുകളിലും വളരെ സാധാരണയായി കാണപ്പെടുന്ന ഒന്നാണ് വിറ്റാമിൻ ഡി-യുടെ (Vitamin D) കുറവ്. പ്രമേഹവും ഉയർന്ന രക്തസമ്മർദ്ദവും പോലെ ആളുകൾ ഇതിനെ ഗൗരവമായി കാണാറില്ല എന്നതാണ് സത്യം. എന്നാൽ, ശരീരത്തിലെ ഓരോ അവയവത്തെയും ബാധിക്കുന്ന ഒന്നാണ് വിറ്റാമിൻ ഡി-യുടെ കുറവ്. അമിതമായ ക്ഷീണം, പേശികളുടെ ബലഹീനത, ഉത്സാഹക്കുറവ് എന്നിവയൊക്കെ ഇതിന്റെ പ്രധാന ലക്ഷണങ്ങളാണ്.

എന്തുകൊണ്ടാണ് വിറ്റാമിൻ ഡി കുറയുന്നത്?

മാറിവരുന്ന ജീവിതശൈലി: നഗരജീവിതം ആളുകളെ കൂടുതൽ സമയവും നാലു ചുവരുകൾക്കുള്ളിലാക്കി മാറ്റിയിരിക്കുന്നു. എയർ കണ്ടീഷൻ ചെയ്ത മുറികളിലെ ജോലിയും അന്തരീക്ഷ മലിനീകരണവും സൂര്യപ്രകാശം നേരിട്ട് ശരീരത്തിൽ പതിക്കാനുള്ള സാധ്യതയെ തടയുന്നു.

സൺസ്‌ക്രീനുകളുടെ ഉപയോഗം: വെയിലേറ്റ് കറുത്തുപോകുമെന്ന ഭയത്താൽ പുറത്തിറങ്ങാത്തതും, ഉയർന്ന അളവിൽ സൺസ്‌ക്രീനുകൾ ഉപയോഗിക്കുന്നതും വിറ്റാമിൻ ഡി ഉത്പാദനത്തിന് ആവശ്യമായ 'യൂവിബി' (UVB) രശ്മികളെ തടയുന്നു.

ചർമ്മത്തിന്റെ നിറം: കാൽസ്യവും വിറ്റാമിൻ ഡി-യും ഉത്പാദിപ്പിക്കാൻ തവിട്ടുനിറമുള്ള ചർമ്മമുള്ളവർക്ക് (Melanin-rich skin) കൂടുതൽ സമയം വെയിൽ കൊള്ളേണ്ടതുണ്ട്. എന്നാൽ രാവിലെയോ വൈകുന്നേരമോ ഉള്ള നടത്തം കൊണ്ട് മാത്രം ആവശ്യത്തിന് വിറ്റാമിൻ ഡി ശരീരത്തിൽ നിർമ്മിക്കപ്പെടണമെന്നില്ല.

വിറ്റാമിൻ ഡി ശരീരത്തിൽ

വിറ്റാമിൻ ഡി കേവലം ഒരു വിറ്റാമിൻ മാത്രമല്ല, അത് ഒരു ഹോർമോൺ പോലെയാണ് പ്രവർത്തിക്കുന്നത്. കാൽസ്യം ആഗിരണം ചെയ്യുന്നതിനും പ്രതിരോധശേഷി വർദ്ധിപ്പിക്കുന്നതിനും തലച്ചോറിന്റെ പ്രവർത്തനങ്ങളെ നിയന്ത്രിക്കുന്നതിനും ഇത് അത്യാവശ്യമാണ്.

വിറ്റാമിൻ ഡി-യുടെ കുറവ് മൂലം കൂടെക്കൂടെയുള്ള മൂഡ് മാറ്റങ്ങൾ (Mood swings), ശ്രദ്ധകേന്ദ്രീകരിക്കാനുള്ള ബുദ്ധിമുട്ട്, പേശികളുടെ ബലക്കുറവ്, ഇടയ്ക്കിടെ ഉണ്ടാകുന്ന അണുബാധകൾ എന്നിവയുണ്ടാകാം. സ്ത്രീകളിലെ ഹോർമോൺ മാറ്റങ്ങളുടെ ഘട്ടങ്ങളിലും, പഠനഭാരം അനുഭവിക്കുന്ന കൗമാരക്കാരിലും ഇതിന്റെ കുറവ് കൂടുതൽ പ്രകടമാണ്. രാവിലെയുണ്ടാകുന്ന കടുത്ത ക്ഷീണം, ആർത്തവസമയത്തെ അസ്വസ്ഥതകൾ എന്നിവ പലപ്പോഴും വിറ്റാമിൻ ഡി കുറവ് മൂലമാകാം.

ലക്ഷണങ്ങൾ തിരിച്ചറിയാം

പെട്ടെന്ന് പ്രകടമാകാതെ വളരെ പതുക്കെയാണ് ഇതിന്റെ ലക്ഷണങ്ങൾ പുറത്തുവരുന്നത്. ആവശ്യത്തിന് ഉറങ്ങിയാലും വിട്ടുമാറാത്ത തളർച്ചയും ക്ഷീണവും, വ്യക്തമായ കാരണങ്ങളില്ലാത്ത പേശിവേദനയും നടുവേദനയും

ഇടയ്ക്കിടെയുള്ള രോഗബാധകൾ, ദേഷ്യം, അസ്വസ്ഥത എന്നിവയുണ്ടാകാം.

ഈ ലക്ഷണങ്ങൾ കണ്ടാൽ ഒരു രക്തപരിശോധനയിലൂടെ വിറ്റാമിൻ ഡി-യുടെ അളവ് നിർണ്ണയിക്കേണ്ടത് അത്യാവശ്യമാണ്.

വിറ്റാമിൻ ഡി-യുടെ കുറവ് ദീർഘകാലം ശ്രദ്ധിക്കാതിരുന്നാൽ അസ്ഥികളുടെ ബലക്ഷയത്തിനും (Osteoporosis), സന്ധിവേദനയ്ക്കും കാരണമാകും. രാവിലെയോ വൈകുന്നേരമോ ഉള്ള വെയിലിനേക്കാൾ വിറ്റാമിൻ ഡി ഉത്പാദനത്തിന് അനുയോജ്യം ഉച്ചസമയത്തുള്ള വെയിലാണ്. പ്രതിദിനം 15-20 മിനിറ്റ് വെയിൽ കൊള്ളുന്നത് നല്ലതാണ്.

വിറ്റാമിൻ ഡി അടങ്ങിയ ഭക്ഷണങ്ങൾ ഭക്ഷണക്രമത്തിൽ ഉൾപ്പെടുത്തുക. ഡോക്ടറുടെ നിർദ്ദേശപ്രകാരം മാത്രം ആവശ്യത്തിന് സപ്ലിമെന്റുകൾ കഴിക്കുക. തുടക്കത്തിൽ തന്നെ ഇത് തിരിച്ചറിഞ്ഞു പരിഹരിച്ചാൽ ശരീരത്തിന്റെ ഊർജ്ജസ്വലത വീണ്ടെടുക്കാനും പ്രതിരോധശേഷി വർദ്ധിപ്പിക്കാനും ആരോഗ്യം ഉറപ്പാക്കാനും സാധിക്കും.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi