പ്രമേഹമുള്ളവർക്കും ദീപാവലി മിഠായികൾ ‌ആസ്വദിക്കാം, ഈ കാര്യങ്ങൾ ശ്രദ്ധിച്ചാൽ മതി

ദീപാവലി എന്നോർക്കുമ്പോൾ ആദ്യം മനസ്സിൽ ഓടിയെത്തുക ദീപാവലി മിഠായികളായിരിക്കും. ലഡു, ബർഫി, പേഡ ഗുലാബ് ജാമുൻ, കാജു കട്‌ലി തുടങ്ങിയ രുചികരമായ മധുരങ്ങൾ ആഘോഷങ്ങൾക്ക് മാറ്റുകൂട്ടുന്നു. എന്നാൽ പ്രമേഹമുള്ളവരെ സംബന്ധിച്ചിടത്തോളം ഇത്തരം ആഘോഷവേളകൾ, രക്തത്തിലെ പഞ്ചസാരയുടെ അളവ് ഉയരുമോ എന്ന ആശങ്കയും ഉണ്ടാകാറുണ്ട്.

പ്രമേഹമുണ്ടെന്ന കാരണത്താൽ ദീപാവലി മിഠായികൾ പൂർണ്ണമായി വേണ്ടെന്നുവെക്കേണ്ടതില്ല എന്നതാണ് വസ്തുത. ഭക്ഷണത്തിലെ അളവിലുള്ള നിയന്ത്രണം, കൃത്യമായ പ്ലാനിങ്, മരുന്നുകളുടെ ഉപയോഗം, രക്തത്തിലെ പഞ്ചസാരയുടെ അളവ് പതിവായി പരിശോധിക്കൽ എന്നിവയിലൂടെ പ്രമേഹം നിയന്ത്രിച്ചുകൊണ്ടുതന്നെ ആഘോഷങ്ങളിൽ പങ്കാളികളാകാം.

അളവിൽ ശ്രദ്ധ വേണം
നിങ്ങൾക്ക് പ്രിയപ്പെട്ട മധുരം പൂർണ്ണമായി ഒഴിവാക്കേണ്ടതില്ല, എന്നാൽ എത്രത്തോളം കഴിക്കുന്നു എന്നത് നിർണ്ണായകമാണ്. ലഡു, പേഡ തുടങ്ങിയ ദീപാവലി മിഠായികളിൽ ഉയർന്ന അളവിൽ കാർബോഹൈഡ്രേറ്റ് അടങ്ങിയിരിക്കുന്നതിനാൽ അവ രക്തത്തിലെ ഗ്ലൂക്കോസ് നില പെട്ടെന്ന് ഉയർത്താം. ഒരേ സമയം പലതരം ദീപാവലി മിട്ടായികൾ രുചിച്ചുനോക്കുന്നതിന് പകരം, നിങ്ങൾക്ക് ഏറ്റവും ഇഷ്ടപ്പെട്ട ഒരു ദീപാവലി മിട്ടായിയുടെ ചെറിയൊരു ഭാഗം മാത്രം തിരഞ്ഞെടുക്കുക. പതുക്കെ, ആസ്വദിച്ച് കഴിക്കുന്നത് വഴി കൂടുതൽ കഴിക്കാനുള്ള പ്രേരണ തടയാനാകും.

ഭക്ഷണം ഒഴിവാക്കരുത്
ദീപാവലി മിഠായികൾ കഴിക്കാൻ സ്ഥലം കരുതി വെക്കുന്നതിനായി ഭക്ഷണം ഒഴിവാക്കുന്നത് ചിലരുടെ രീതിയാണ്. എന്നാൽ ഇത് നിങ്ങളുടെ സാധാരണ ഭക്ഷണക്രമത്തെ തകരാറിലാക്കും. പ്രത്യേകിച്ച് പ്രമേഹത്തിനുള്ള മരുന്നുകളോ ഇൻസുലിനോ കഴിക്കുന്നവരിൽ, ഭക്ഷണം ഒഴിവാക്കുന്നത് രക്തത്തിലെ പഞ്ചസാരയുടെ അളവ് പെട്ടെന്ന് താഴുന്ന അവസ്ഥയിലേക്ക് (Hypoglycemia) നയിച്ചേക്കാം. കൂടാതെ, പിന്നീട് കഠിനമായ വിശപ്പ് അനുഭവപ്പെടാനും കൂടുതൽ ആഹാരം കഴിച്ചുപോകാനും ഇത് കാരണമാകും. അതിനാൽ സാധാരണ സമയങ്ങളിൽ തന്നെ ഭക്ഷണം കഴിക്കുക.

ഭക്ഷണം സമീകൃതമാക്കാം
ഭക്ഷണത്തിൽ ദീപാവലി മിഠായികൾക്ക് പുറമേ വറുത്ത പലഹാരങ്ങളുമുണ്ടാകാം. ഇവയെല്ലാം ഒന്നിച്ച് കഴിക്കുന്നത് ശരീരത്തിലെത്തുന്ന ആകെ കാർബോഹൈഡ്രേറ്റിന്റെ അളവ് വലിയ തോതിൽ വർദ്ധിപ്പിക്കും. ഭക്ഷണത്തിൽ പച്ചക്കറികൾ, പയറുവർഗ്ഗങ്ങൾ, പനീർ, മുട്ട അല്ലെങ്കിൽ കൊഴുപ്പ് കുറഞ്ഞ ഇറച്ചി തുടങ്ങിയ പ്രോട്ടീൻ വിഭവങ്ങൾ ഉൾപ്പെടുത്തി സമീകൃതമാക്കുക. ചോറ്, റൊട്ടി, കിഴങ്ങുവർഗ്ഗങ്ങൾ എന്നിവയിലും കാർബോഹൈഡ്രേറ്റ് അടങ്ങിയിട്ടുണ്ടെന്ന് ഓർക്കുക. പ്രോട്ടീനും നാരുകളും അടങ്ങിയ ഭക്ഷണം വയർ നിറഞ്ഞ സംതൃപ്തി നൽകുകയും വറുത്ത പലഹാരങ്ങളും ദീപാവലി മിഠായികളും അമിതമായി കഴിക്കുന്നത് തടയുകയും ചെയ്യും.

മധുരമുള്ള പാനീയങ്ങൾ
പാക്കറ്റ് ജ്യൂസുകൾ, മധുരമുള്ള മറ്റ് പാനീയങ്ങൾ, എന്നിവയും രക്തത്തിലെ ഗ്ലൂക്കോസ് നില പെട്ടെന്ന് ഉയർത്താൻ കാരണമാകും. ഇത്തരം പാനീയങ്ങൾക്ക് പകരം വെള്ളമോ മധുരമില്ലാത്ത പാനീയങ്ങളോ തിരഞ്ഞെടുക്കുക.

ഭക്ഷണശേഷം
ബന്ധുവീടുകൾ സന്ദർശിക്കുന്നതിനും അതിഥികളെ സൽക്കരിക്കുന്നതിനുമിടയിൽ പതിവ് വ്യായാമങ്ങൾ മുടങ്ങാൻ സാധ്യതയേറെയാണ്. എന്നാൽ പ്രമേഹനിയന്ത്രണത്തിന് ശാരീരിക അധ്വാനം വളരെ പ്രധാനമാണ്. ഭക്ഷണത്തിന് ശേഷം ചെറുതായി നടക്കുന്നത് രക്തത്തിലെ ഗ്ലൂക്കോസ് നില നിയന്ത്രിക്കാൻ സഹായിക്കും. കുടുംബാംഗങ്ങളോടൊപ്പം സജീവമായി ഇടപഴകുന്നതും ആഘോഷങ്ങളുടെ തയ്യാറെടുപ്പുകളിൽ പങ്കാളികളാകുന്നതും ശരീരത്തിന് ആവശ്യമായ അധ്വാനം നൽകും. ഇൻസുലിൻ അല്ലെങ്കിൽ മരുന്നുകൾ ഉപയോഗിക്കുന്നവർ ഡോക്ടറുടെ നിർദ്ദേശപ്രകാരമുള്ള രക്തപരിശോധനയും ശാരീരിക പ്രവർത്തനങ്ങളും പിന്തുടരേണ്ടതാണ്.

'ഷുഗർ ഫ്രീ' എപ്പോഴും സുരക്ഷിതമല്ല
'ഷുഗർ ഫ്രീ' എന്ന് എഴുതിയ ദീപാവലി മിഠായികൾ കണ്ട ഉടൻ, അവ എത്ര വേണമെങ്കിലും കഴിക്കാമെന്ന് കരുതരുത്. ലേബലിൽ 'ഷുഗർ ഫ്രീ' എന്ന് ഉണ്ടായിരുന്നാലും, അവ ഉണ്ടാക്കാൻ ഉപയോഗിച്ചിരിക്കുന്ന ചേരുവകൾ അനുസരിച്ച് അതിൽ കാർബോഹൈഡ്രേറ്റ്, കലോറി, കൊഴുപ്പ് എന്നിവ അടങ്ങിയിരിക്കാൻ സാധ്യതയുണ്ട്. ഇത്തരം ഉൽപ്പന്നങ്ങൾ വാങ്ങുന്നതിന് മുൻപ് പോഷകാഹാര വിവരങ്ങൾ (Nutrition Information) കൃത്യമായി പരിശോധിക്കുക.

നിയന്ത്രണവും കൃത്യമായ മുൻകരുതലുകളും ഉണ്ടെങ്കിൽ പ്രമേഹമുള്ളവർക്കും രക്തത്തിലെ പഞ്ചസാരയുടെ അളവ് സുരക്ഷിതമായി നിലനിർത്തിക്കൊണ്ടുതന്നെ സന്തോഷത്തോടെ ദീപാവലി ആഘോഷിക്കാം.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi