‘എന്റെ മകനായതുകൊണ്ട് നിന്റെ ജീവിതം എപ്പോഴും ശ്രദ്ധിക്കപ്പെടും;’ മകനോട് മാധവൻ പറഞ്ഞതിങ്ങനെ

ആദിത്യ ധർ സംവിധാനം ചെയ്ത 'ധുരന്ധർ 2' (Dhurandhar 2) എന്ന ചിത്രത്തിന്റെ വൻ വിജയത്തിന് പിന്നാലെ നടൻ ആർ. മാധവൻ വാർത്തകളിൽ നിറഞ്ഞുനിൽക്കുകയാണ്. ഇതിനിടെ മകൻ വേദാന്തിന് അദ്ദേഹം നൽകിയ ഉപദേശത്തെക്കുറിച്ചുള്ള പഴയൊരു അഭിമുഖം വീണ്ടും ശ്രദ്ധ നേടുന്നുണ്ട്.

ദേശീയ-അന്തർദേശീയ തലത്തിൽ നിരവധി നേട്ടങ്ങൾ കൈവരിച്ച നീന്തൽ താരമാണ് വേദാന്ത് മാധവൻ. 2023-ലെ മലേഷ്യൻ ഇൻവിറ്റേഷണൽ ഏജ് ഗ്രൂപ്പ് ചാമ്പ്യൻഷിപ്പിൽ 5 സ്വർണ്ണ മെഡലുകളും, ഡാനിഷ് ഓപ്പണിലും ജൂനിയർ നാഷണൽ അക്വാട്ടിക് ചാമ്പ്യൻഷിപ്പിലുമായി നിരവധി മെഡലുകളും വേദാന്ത് സ്വന്തമാക്കിയിട്ടുണ്ട്.

തന്റെ മകൻ വളർന്നു വരുന്ന സാഹചര്യത്തിൽ, പ്രശസ്തിക്കൊപ്പം വരുന്ന ഉത്തരവാദിത്തങ്ങളെക്കുറിച്ച് മാധവൻ നൽകിയ ഉപദേശം ഇതാണ്:

"നിനക്ക് നിന്റെ സുഹൃത്തുക്കളെപ്പോലെ അശ്രദ്ധയോടെ നടക്കാൻ കഴിയില്ല. ഷർട്ട് ധരിക്കാതെയോ മറ്റോ ഉള്ള നിന്റെ ഒരു ചിത്രം പോലും ദേശീയ വാർത്തയാകാം. നീ ജനങ്ങളാൽ തിരിച്ചറിയപ്പെടുന്ന വ്യക്തിയും അവർക്കൊരു മാതൃകയുമാണ്. ആ ഉത്തരവാദിത്തം നിനക്കുണ്ട്."

"സാധാരണക്കാർ എന്റെ അടുത്ത് വന്ന് 'നിങ്ങളുടെ സിനിമകൾ ഇഷ്ടമാണ്, പക്ഷേ വേദാന്തിന്റെ കാര്യത്തിൽ ഞങ്ങൾ നിങ്ങളെ ഓർത്ത് അഭിമാനിക്കുന്നു' എന്ന് പറയുമ്പോൾ വലിയ സന്തോഷം തോന്നാറുണ്ട്. പക്ഷേ അവനോട് എനിക്ക് ചില കാര്യങ്ങൾ പറയേണ്ടി വന്നു. ഭാഗ്യവശാലോ നിർഭാഗ്യവശാലോ നീ എന്റെ മകനായതുകൊണ്ട് നിന്റെ ജീവിതം എപ്പോഴും ശ്രദ്ധിക്കപ്പെടും."

'ധുരന്ധർ 2'-ൽ ഇന്റലിജൻസ് ബ്യൂറോ (IB) ഡയറക്ടറായ അജയ് സന്യാൽ എന്ന കഥാപാത്രത്തെയാണ് മാധവൻ അവതരിപ്പിച്ചത്. അദ്ദേഹത്തിന്റെ പ്രകടനം മികച്ച പ്രതികരണങ്ങളാണ് നേടുന്നത്. മാർച്ച് 19 റിലീസായ ചിത്രം, ഹിന്ദി, തെലുങ്ക്, തമിഴ്, കന്നഡ, മലയാളം എന്നീ ഭാഷകളിൽ എത്തിയിരുന്നു. രൺവീർ സിങ്, സഞ്ജയ് ദത്ത്, അർജുൻ രാംപാൽ തുടങ്ങിയവരാണ് പ്രധാന വേഷങ്ങളിൽ എത്തിയത്. ജ്യോതി ദേശ്പാണ്ഡെയും ലോകേഷ് ധറും ചേർന്ന് നിർമ്മിച്ച ഈ ചിത്രം വലിയ വിജയമാണ് കൈവരിച്ചിരിക്കുന്നത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi