സ്ത്രീകളെ വസ്തുവൽക്കരിക്കുന്ന ഗാനങ്ങൾ പാടില്ല; 'ഫെവികോൾ സെ' നിരസിച്ചതിനെക്കുറിച്ച് ശ്രേയ ഘോഷാൽ

സൽമാൻ ഖാൻ ചിത്രമായ 'ദബാംഗ് 2'-ൽ കരീന കപൂർ അഭിനയിച്ച 'ഫെവികോൾ സെ' എന്ന ഗാനം കേൾക്കാത്തവരുണ്ടാകില്ല. സിനിമാപ്രേക്ഷകർക്കിടയിൽ വലിയ ഓളം സൃഷ്ടിച്ച ഐറ്റം സോങ്ങായിരുന്നു അത്. ബോളിവുഡിലെ ഈ സൂപ്പർ ഹിറ്റ് ഗാനം (Fevicol Se) താൻ നിരസിച്ചതിനെക്കുറിച്ച് ഗായിക ശ്രേയ ഘോഷാൽ തുറന്നു പറഞ്ഞിരുന്നു. രാജ് ഷമാനിയുടെ പോഡ്‌കാസ്റ്റിലാണ് ശ്രേയ ഇക്കാര്യങ്ങൾ വെളിപ്പെടുത്തിയത്.

'ഫെവികോൾ സെ' എന്ന ഗാനം സ്ത്രീകളെ അങ്ങേയറ്റം വസ്തുവൽക്കരിക്കുന്ന ഒന്നാണെന്ന് ശ്രേയ പറഞ്ഞു. "ആ സിനിമയിലെ ഒരു പാട്ടിൽ സ്ത്രീകളെ അമിതമായി വസ്തുവൽക്കരിക്കുന്ന വരികളുണ്ടായിരുന്നു. അത് ഒട്ടും പരോക്ഷമായിരുന്നില്ല. 'ചിക്കൻ ബനാ കെ ഖാലെ' (എന്നെ ചിക്കനായി കരുതി കഴിക്കൂ) പോലുള്ള വരികൾ എനിക്ക് പാടാൻ കഴിയില്ല. അത്തരം വരികൾ പാടുമ്പോൾ എനിക്ക് നാണക്കേട് തോന്നും. അതുകൊണ്ട് തന്നെ കൈകൂപ്പി ആ അവസരം ഞാൻ വേണ്ടെന്നു വെച്ചു," ശ്രേയ പറഞ്ഞു.

2025-ൽ ലില്ലി സിങ്ങുമായുള്ള അഭിമുഖത്തിലും ശ്രേയ ഇതേക്കുറിച്ച് സംസാരിച്ചിരുന്നു. ചെറിയ പെൺകുട്ടികൾ അർത്ഥമറിയാതെ ഇത്തരം വരികൾ പാടുന്നത് കാണുമ്പോൾ തനിക്ക് വിഷമം തോന്നാറുണ്ടെന്ന് ശ്രേയ അന്ന് പറഞ്ഞിരുന്നു. "സെക്സിയായിരിക്കുന്നതും സ്ത്രീകളെ വസ്തുവൽക്കരിക്കുന്നതും തമ്മിൽ വലിയ വ്യത്യാസമുണ്ട്. അഞ്ചും ആറും വയസ്സുള്ള പെൺകുട്ടികൾ ഈ വരികൾ പാടുന്നത് കേൾക്കുമ്പോൾ ശരിയല്ലെന്ന് എനിക്ക് തോന്നി. അതുകൊണ്ടാണ് ഇപ്പോൾ പാട്ടുകൾ തിരഞ്ഞെടുക്കുമ്പോൾ ഞാൻ കൂടുതൽ ബോധവതിയാകുന്നത്."

ശ്രേയ തന്നെ പാടിയ 'ചിക്നി ചമേലി' (Chikni Chameli) എന്ന ഗാനത്തെക്കുറിച്ച് അവർ നടത്തിയ പരാമർശങ്ങൾ സോഷ്യൽ മീഡിയയിൽ വിമർശനത്തിന് കാരണമായിരുന്നു. ഇതിനും ശ്രേയ മറുപടി നൽകിയിരുന്നു. "ആ പാട്ട് വെറുമൊരു ഐറ്റം നമ്പർ മാത്രമല്ല, അതിൽ നല്ലൊരു കലാമൂല്യമുണ്ട്. സിനിമയിൽ വന്ന പതിപ്പിനേക്കാൾ മോശം വരികളായിരുന്നു ആദ്യ ഡ്രാഫ്റ്റുകളിൽ ഉണ്ടായിരുന്നത്. അന്ന് ആ വരികളുടെ പൂർണ്ണമായ അർത്ഥം മനസ്സിലാക്കാനുള്ള പക്വത എനിക്കുണ്ടായിരുന്നില്ല. ഞാൻ ആ പാട്ട് ഇന്നും കൺസെർട്ടുകളിൽ പാടാറുണ്ട്. എനിക്കത് തള്ളിക്കളയാനാവില്ല. പക്ഷേ, ഇനി അത്തരത്തിലുള്ള പാട്ടുകൾ റെക്കോർഡ് ചെയ്യില്ല എന്ന് മാത്രമാണ് ഞാൻ ഉദ്ദേശിച്ചത്" ശ്രേയ പ്രതികരിച്ചു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi