‘സിനിമയിൽ താരങ്ങളുടെ പ്രതിഫലം നിശ്ചയിക്കുന്നത് അവരുടെ ലിംഗമല്ല; അതിനൊരു കണക്കുണ്ട് ’

ഇന്ത്യൻ ചലച്ചിത്ര മേഖലയിൽ ദീർഘകാലമായി നിലനിൽക്കുന്ന ചർച്ചാവിഷയമാണ് പ്രതിഫലത്തിലെ വിവേചനം. പുരുഷ-വനിതാ താരങ്ങളുടെ വരുമാനത്തിലെ ഈ വ്യത്യാസത്തെക്കുറിച്ച് പല താരങ്ങളും പലപ്പോഴായി സംസാരിച്ചിട്ടുമുണ്ട്. ഇപ്പോൾ, ഈ വിഷയത്തിൽ തന്റെ നിലപാട് വ്യക്തമാക്കിയിരിക്കുകയാണ് നടൻ സെയ്ഫ് അലി ഖാൻ.

അടുത്തിടെ തന്റെ സഹോദരി സോഹ അലി ഖാന്റെ യൂട്യൂബ് ചാനലിലെ, പോഡ്‌കാസ്റ്റ് എപ്പിസോഡിൽ കുനാൽ ഖേമുവിനൊപ്പം സെയ്ഫ് അലി ഖാൻ പങ്കെടുത്തിരുന്നു. സിനിമാ മേഖലയിൽ ഓരോ താരങ്ങളുടെയും പ്രതിഫലം നിശ്ചയിക്കുന്നത് അവരുടെ ലിംഗമല്ല, മറിച്ച് ബോക്സ് ഓഫീസ് വിജയവും പ്രേക്ഷകരുടെ ആവശ്യവും അനുസരിച്ചാണെന്ന് സെയ്ഫും കുനാലും സൂചിപ്പിച്ചു. ഒരേ പദവിയുള്ള അഭിനേതാക്കൾക്ക് തുല്യ പ്രതിഫലം നൽകണമെന്നും എന്നാൽ തിയേറ്ററുകളിലേക്ക് ആളുകളെ ആകർഷിക്കാനുള്ള ഒരു താരത്തിന്റെ കഴിവിനെ ആശ്രയിച്ചാണ് വ്യവസായത്തിലെ ശമ്പളഘടന നിലനിൽക്കുന്നതെന്നും സെയ്ഫ് പറഞ്ഞു.

"അഭിനേതാക്കൾ ഒരേ പദവിയുള്ളവരാണെങ്കിൽ അവർക്ക് തുല്യ തുക തന്നെ നൽകണം. എന്നാൽ സാമ്പത്തിക കാര്യങ്ങൾ ഒരു പ്രത്യേക രീതിയിലാണ് പ്രവർത്തിക്കുന്നതെന്ന് എനിക്ക് തോന്നുന്നു. നിങ്ങൾ തിയേറ്ററുകളിലെ സീറ്റുകൾ നിറയ്ക്കുന്നുണ്ടെങ്കിൽ, അതിനനുസരിച്ച് നിങ്ങൾക്ക് പ്രതിഫലം ലഭിക്കും. എല്ലാവർക്കും ആ ബന്ധം മനസ്സിലാക്കാവുന്നതേയുള്ളൂ."

ഈ സംവിധാനം ഏതെങ്കിലും ഒരു വിഭാഗത്തെ പിന്തുണയ്ക്കാൻ രൂപകൽപ്പന ചെയ്തതല്ലെന്നും, പകരം ഒരു നടന്റെ/നടിയുടെ വിപണി മൂല്യത്തിന്റെയും ബോക്സ് ഓഫീസ് സ്വാധീനത്തിന്റെയും പ്രതിഫലനമാണെന്നും അദ്ദേഹം വിശദീകരിച്ചു. "നിങ്ങൾ ഒരു പ്രത്യേക ലിംഗത്തിൽപ്പെട്ടവരായതുകൊണ്ട് മാത്രം കൂടുതൽ പണമോ കുറഞ്ഞ പണമോ ലഭിക്കണമെന്നില്ല. തിയേറ്ററുകൾ നിറയ്ക്കുന്നതുകൊണ്ടാണ് ഒരാൾ സൂപ്പർസ്റ്റാർ ആകുന്നത്, ആളുകൾക്ക് വ്യക്തതയുള്ള ഒരു സാമ്പത്തിക വ്യവസ്ഥയാണിത്. അവർക്ക് സ്വന്തം മൂല്യം അറിയാം, അവർ ആ വില ഈടാക്കുന്നു, അവർക്ക് അത് ലഭിക്കുന്നു," സെയ്ഫ് കൂട്ടിച്ചേർത്തു.

സിനിമയിലെ അഭിനേതാക്കളുടെ പ്രതിഫലം നിശ്ചയിക്കുന്നതിന് പിന്നിലെ 'കണക്കുകളെ' കുറിച്ച് കുനാൽ ഖേമു വിശദീകരിച്ചു. ഒരു പ്രൊജക്ടിൽ ഒരു താരത്തിന്റെ മൂല്യം അടിസ്ഥാനമാക്കി വിതരണക്കാർ സിനിമയുടെ ലാഭസാധ്യതകൾ വിലയിരുത്തുന്നുണ്ടെന്ന് അദ്ദേഹം ചൂണ്ടിക്കാട്ടി. "ഇതിനൊരു കണക്കുണ്ട്. സിനിമ വിജയിക്കുമോ ഇല്ലയോ എന്നതല്ല. മുമ്പ്, ഒരു പ്രത്യേക നടൻ സിനിമയിലുണ്ടെങ്കിൽ ഒരു നിശ്ചിത തുകയ്ക്ക് ആ പ്രദേശത്ത് (territory) സിനിമ വിൽക്കാൻ കഴിയുമെന്ന് വിതരണക്കാർക്ക് അറിയാമായിരുന്നു. അത് സിനിമയുടെ മുടക്കുമുതൽ തിരിച്ചുപിടിക്കുന്നതിന്റെ ഭാഗമായി മാറുന്നു," അദ്ദേഹം പറഞ്ഞു.

ഇന്ത്യയിലെ ആദ്യത്തെ ജനാധിപത്യ തിരഞ്ഞെടുപ്പിന്റെ പശ്ചാത്തലത്തിലുള്ള നെറ്റ്ഫ്ലിക്സ് പീരിയഡ് ഡ്രാമയായ 'ഹം ഹിന്ദുസ്ഥാനി' (Hum Hindustani) ആണ് സെയ്ഫിന്റെ അടുത്ത ചിത്രം. രാഹുൽ ധൊലാക്കിയ സംവിധാനം ചെയ്യുന്ന ഈ ചിത്രത്തിൽ പ്രതീക് ഗാന്ധിയും പ്രധാന വേഷത്തിൽ എത്തുന്നു. ഇതിന്റെ റിലീസ് തീയതി പ്രഖ്യാപിച്ചിട്ടില്ല. കൂടാതെ, അക്ഷയ് കുമാറിനൊപ്പം പ്രിയദർശൻ സംവിധാനം ചെയ്യുന്ന 'ഹൈവാൻ' (Haiwaan) എന്ന ചിത്രവും അണിയറയിലുണ്ട്. ചിത്രീകരണം പൂർത്തിയായ ഈ സിനിമയുടെ റിലീസിനായി കാത്തിരിക്കുകയാണ് ആരാധകർ. കഴിഞ്ഞ വർഷം നെറ്റ്ഫ്ലിക്സ് ചിത്രമായ 'ജ്വൽ തീഫ്: ദി ഹെയ്സ്റ്റ് ബിഗിൻസിലും' സെയ്ഫ് അഭിനയിച്ചിരുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi