തന്റെ ആദ്യ ഭാര്യ അമൃത സിങ്ങുമായുള്ള വിവാഹത്തെക്കുറിച്ചോ, വിവാഹമോചനത്തെക്കുറിച്ചോ, സംസാരിക്കാൻ സെയ്ഫ് അലി ഖാൻ ഒരിക്കലും മടിച്ചിട്ടില്ല. സെയ്ഫ് അലി ഖാനും അമൃത സിങ്ങും തമ്മിലുള്ള 13 വയസ്സിന്റെ പ്രായ വ്യത്യാസവും, അവരുടെ പ്രണയവും വിവാഹവും ഇന്നും ആരാധകരെ അത്ഭുതപ്പെടുത്തുന്ന ഒന്നാണ്.

സെയ്ഫിന്റെ മാതാവ് ഷർമിള ടാഗോർ, മൻസൂർ അലി ഖാൻ പട്ടൗഡിയെ വിവാഹം കഴിച്ചതിന് ശേഷം ഇസ്ലാം മതം സ്വീകരിച്ചിരുന്നു. എന്നാൽ സെയ്ഫ് തന്റെ ആദ്യ ഭാര്യ അമൃതയെ മതം മാറാൻ ഒരിക്കലും നിർബന്ധിച്ചിരുന്നില്ല.

"ഡിങ്കിയെ (അമൃത) ഒരിക്കലും ഇസ്ലാം മതത്തിലേക്ക് മാറാനോ മതം ആചരിക്കാനോ നിർബന്ധിച്ചിട്ടില്ല. തുടക്കം മുതൽ തന്നെ 'ഓരോരുത്തർക്കും അവരവരുടെ ഇഷ്ടം' എന്നതായിരുന്നു നയം. മക്കളായ സാറയും ഇബ്രാഹിമും വളർന്നുവന്നപ്പോൾ പോലും ഞാൻ ആ തത്വം കർശനമായി പാലിച്ചിരുന്നു," 2010-ൽ 'ദി സിയാസത്ത് ഡെയ്‌ലി'ക്ക് നൽകിയ അഭിമുഖത്തിൽ സെയ്ഫ് പറഞ്ഞു.

അമൃത ഗുരുദ്വാരയിൽ പോകുമ്പോൾ താൻ കുട്ടികളെ നോക്കാറുണ്ടായിരുന്നുവെന്നും സെയ്ഫ് പങ്കുവെച്ചു.

"ഞങ്ങൾ വേർപിരിഞ്ഞപ്പോൾ, അമൃതയുടെ സംരക്ഷണയിലായിരുന്ന സാറയെയും ഇബ്രാഹിമിനെയും കുറിച്ച് എനിക്ക് ആശങ്കയുണ്ടായിരുന്നു. എനിക്ക് അവളിൽ പൂർണ്ണ വിശ്വാസമുണ്ടായിരുന്നു, അവൾ അവരെ മതപരമായി സ്വാധീനിക്കില്ലെന്ന് എനിക്ക് ഉറപ്പായിരുന്നു," വിവാഹമോചനത്തിന് ശേഷം മക്കളുടെ മതപരമായ സ്വത്വത്തെക്കുറിച്ച് തനിക്കുണ്ടായിരുന്ന ആശങ്കയെക്കുറിച്ച് സെയ്ഫ് പറഞ്ഞു.

ഒരു മൗലവിയും സിഖ് പുരോഹിതനും ചേർന്നാണ് വിവാഹച്ചടങ്ങുകൾ നടത്തിയതെന്നും അവരുടെ നിക്കാഹ്‌നാമയിൽ സാക്ഷികളായി ഒപ്പിട്ടത് തങ്ങളാണെന്നും നമ്രത സക്കറിയയുടെ യൂട്യൂബ് ചാനലിൽ പ്രശസ്ത ഡിസൈനർമാരായ അബു ജാനിയും സന്ദീപ് ഖോസ്‌ലയും വെളിപ്പെടുത്തി.

"ഒരു ദിവസം അവർ ഞങ്ങളുടെ അടുത്ത് വന്ന് പറഞ്ഞു, 'ഞങ്ങൾക്ക് ഇപ്പോൾ വിവാഹം കഴിക്കണം!' സെയ്ഫ് തയ്യാറായിരുന്നു, പക്ഷേ ഡിങ്കിക്ക് അപ്പോഴും തീരുമാനമെടുക്കാൻ കഴിഞ്ഞിരുന്നില്ല. അവർ ആറോ എട്ടോ മാസമായി പ്രണയത്തിലായിരുന്നു. ഞങ്ങൾ അവരെ ഒരു സുഹൃത്തിന്റെ അപ്പാർട്ട്മെന്റിൽ കൊണ്ടുപോയി ഒരുക്കി. ഞങ്ങൾ ഒരു മൗലവിയെ വിളിച്ചു വരുത്തി. അവിടെ ഒരു സർദാർജി പണ്ഡിറ്റും ഉണ്ടായിരുന്നു. സമയം കുറവായതിനാൽ കിട്ടിയ വസ്ത്രം ധരിച്ചാണ് അവർ ഒരുങ്ങിയത്. ഭാഗ്യവശാൽ അമ്മയുടെ കുറച്ച് നല്ല ആഭരണങ്ങൾ ഡിങ്കിയുടെ പക്കലുണ്ടായിരുന്നു."

അമൃത സിങ്ങുമായി പിരിഞ്ഞ ശേഷം, 2012- ൽ സെയ്ഫ് അലി ഖാൻ നടി കരീന കപൂറിനെ വിവാഹം കഴിച്ചു.

രാഹുൽ ധൊലാകിയ തിരക്കഥയും സംവിധാനവും നിർവഹിക്കുന്ന നെറ്റ്ഫ്ലിക്സ് ചിത്രമായ 'ഹം ഹിന്ദുസ്ഥാനി'യിലാണ് സെയ്ഫ് അലി ഖാൻ അടുത്തതായി അഭിനയിക്കുന്നത്. ഇന്ത്യയിലെ ആദ്യത്തെ പൊതുതിരഞ്ഞെടുപ്പിന്റെ കഥയാണ് ഈ ചിത്രം പറയുന്നത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi