'തൃഷ വളരെ മാന്യതയുള്ള സ്ത്രീയാണ്'-വിവാദങ്ങളിൽ പിന്തുണച്ച് ഖുശ്ബു

തമിഴ് നടനും ടിവികെ നേതാവുമായ വിജയ്‌യും നടി തൃഷ കൃഷ്ണനും ചെന്നൈയിൽ ഒരു വിവാഹസൽക്കാരത്തിൽ ഒരുമിച്ച് പങ്കെടുത്തത് വലിയ ചർച്ചയായിരുന്നു. ഇരുവരും പ്രണയത്തിലാണെന്ന അഭ്യൂഹങ്ങൾ പ്രചരിക്കുന്നതിനിടെയായിരുന്നു ഇത്. ഈ വിഷയത്തിൽ തന്റെ നിലപാട് വ്യക്തമാക്കിയിരിക്കുകയാണ് നടിയും രാഷ്ട്രീയക്കാരിയുമായ (political leader) ഖുശ്ബു സുന്ദർ ഇപ്പോൾ. തൃഷയ്ക്ക് അവർ പിന്തുണ പ്രഖ്യാപിക്കുകയും ചെയ്തു.

തൃഷയുടെ സാന്നിധ്യം സംബന്ധിച്ച ഊഹാപോഹങ്ങളെക്കുറിച്ച് ഒരു അഭിമുഖത്തിൽ ചോദിച്ചപ്പോൾ ഖുശ്ബുവിന്റെ പ്രതികരണം ഇങ്ങനെയായിരുന്നു- "നിർഭാഗ്യവശാൽ, തുമ്മിയാൽ പോലും മറ്റൊരാളെ കുറ്റപ്പെടുത്താൻ ആളുകൾ ആഗ്രഹിക്കുന്ന ഒരു കാലഘട്ടത്തിലാണ് നമ്മൾ ജീവിക്കുന്നത്, എനിക്ക് അവരെ രണ്ടുപേരെയും അറിയാം, പ്രത്യേകിച്ച് തൃഷയുമായി വളരെ അടുത്ത ബന്ധമുണ്ട്. ഞാൻ കണ്ടിട്ടുള്ളതിൽ വെച്ച് ഏറ്റവും മാന്യയായ സ്ത്രീകളിലൊരാളും ഏറ്റവും സൗമ്യമായ വ്യക്തിത്വമുള്ളവളുമാണ് അവൾ."

പാപ്പരാസികളുടെ ശല്യപ്പെടുത്തലുകളെയും സോഷ്യൽ മീഡിയയിലെ ചർച്ചകളെയും കുറിച്ചും അവർ തുടർന്നു പറഞ്ഞു. "എല്ലായിടത്തും പിന്തുടരുന്ന പാപ്പരാസികളെക്കുറിച്ച് ഞാൻ അഭിപ്രായം പറയാൻ ആഗ്രഹിക്കുന്നില്ല. ഇത് മുംബൈയിൽ നമ്മൾ കണ്ടുവന്ന ഒരു സംവിധാനമാണ്, ഇവിടെയല്ല. നിർഭാഗ്യവശാൽ, ഇതിവിടെ തുടങ്ങുകയാണ്. ഇതിനെക്കുറിച്ച് അഭിപ്രായം പറയുന്നവർ തങ്ങളുടെ പ്രശ്നങ്ങളെ നോക്കുന്നതിനേക്കാൾ മറ്റൊരാളുടെ ജീവിതത്തിലേക്ക് നോക്കുന്നതിൽ സന്തോഷം കണ്ടെത്തുന്നവരാണ്. മറ്റൊരാളെക്കുറിച്ച് അഭിപ്രായം പറയുന്നത് അവർ ആസ്വദിക്കുകയോ അതിൽ ക്രൂരമായ സന്തോഷം കണ്ടെത്തുകയോ ചെയ്യുന്നു. അവരിൽ 99.9 ശതമാനം ആളുകൾക്കും ഒരു തരത്തിലുള്ള അംഗീകാരവുമില്ല. അതുകൊണ്ടുതന്നെ, മറ്റാരുടേയും അഭിപ്രായങ്ങൾക്ക് അവരിരുവരും ഉത്തരവാദികളല്ല, അവരോട് പ്രതികരിച്ച് സമയം കളയേണ്ടതില്ല എന്നാണ് ഞാൻ കരുതുന്നത്."-ഖുശ്ബു പറഞ്ഞു.

നേരത്തേ, ഇത് തൃഷയുടേയും വിജയ്‌യുടെയും സ്വകാര്യ ജീവിതമാണെന്നും, അവരുടെ പ്രവർത്തികൾ മറ്റുള്ളവരെ ബാധിക്കാത്തിടത്തോളം കാലം ഇതൊരു വലിയ ചർച്ചാവിഷയമാക്കേണ്ടതില്ലെന്നും ഖുശ്ബു പറഞ്ഞിരുന്നു.  

വിജയ്‌യുടെ ഭാര്യ സംഗീത വിവാഹമോചനത്തിന് അപേക്ഷ നൽകിയതോടെയാണ് വിവാദം തുടങ്ങിയത്. നടിയുമായുള്ള വിജയ്‌യുടെ വിവാഹേതരബന്ധം തങ്ങൾക്കിടയിൽ പ്രശ്നങ്ങളുണ്ടാക്കിയെന്ന് സംഗീത ഹർജിയിൽ പറഞ്ഞിരുന്നു. സംഗീതയും വിജയും 1999 ഓഗസ്റ്റിലാണ് വിവാഹിതരായത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi