ധർമേന്ദ്ര / AFP
നടനും സംവിധായകനുമായ സത്യജിത് പുരി അടുത്തിടെ മുതിര്ന്ന നടന് ധര്മേന്ദ്രയെക്കുറിച്ചുള്ള രസകരമായ ഒരു കഥ പങ്കുവെച്ചു. ബോളിവുഡില് അധോലോകം ശക്തമായിരുന്ന കാലത്ത് ആ ഇതിഹാസ താരം അവരെ ധീരമായി നേരിട്ടതിനെക്കുറിച്ചാണ് അദ്ദേഹം എടുത്തുപറഞ്ഞത്. ഫ്രൈഡേ ടോക്കീസിന് നല്കിയ അഭിമുഖത്തിലായിരുന്നു വെളിപ്പെടുത്തല്.
''ആ സമയത്ത് അധോലോകം വളരെ ശക്തമായിരുന്നു. പല താരങ്ങൾക്കും അവരെ ഭയമായിരുന്നു. എന്നാല് ധരംജിയും കുടുംബവും അവരെ ഒരിക്കലും ഭയപ്പെട്ടിരുന്നില്ല. അദ്ദേഹം അവരോട് പറയുമായിരുന്നു, 'നിങ്ങള് വന്നാല്, പഞ്ചാബില് നിന്ന് സഹ്നേവാള് മുഴുവന് വരും. നിങ്ങളുടെ പക്കല് 10 പേരുണ്ടാകും, എന്നാല് എനിക്ക് ഒരു സൈന്യമുണ്ട്. എന്റെ ഒരു വാക്ക് മതി, പഞ്ചാബില് നിന്ന് ട്രക്കുകള് നിറയെ ആളുകള് പോരാടാന് വരും. എന്നോട് കളിക്കാന് നില്ക്കരുത്.' പിന്നീട് അവര് ഒരിക്കലും അദ്ദേഹത്തോട് ഏറ്റുമുട്ടിയിട്ടില്ല.''
മുതിര്ന്ന നടന് സത്യന് പുരിയുടെ മകനായ സത്യജിത് പുരി ഒരു ബാലതാരമായാണ് തന്റെ കരിയര് ആരംഭിച്ചത്. വര്ഷങ്ങളായി, ഗൗരവമേറിയ സിനിമകള് മുതല് വാണിജ്യ സിനിമകള് വരെ വിവിധതരം വേഷങ്ങളില് അദ്ദേഹം അഭിനയിച്ചിട്ടുണ്ട്. അഭിനയത്തിന് പുറമെ സത്യജിത് സിനിമകള് സംവിധാനം ചെയ്യുകയും നിര്മ്മിക്കുകയും ചെയ്തിട്ടുണ്ട്. വര്ഷങ്ങളായി നിരവധി ശ്രദ്ധേയമായ സിനിമകളില് അദ്ദേഹം ധര്മേന്ദ്രയ്ക്കൊപ്പം അഭിനയിച്ചിട്ടുണ്ട്. രാജ്പുത് (1982), ബേത്താബ് (1983), തഖ്ദീര് കാ ബാദ്ഷാ (1982), ബട്വാര, ഇസ്സത്ത്ദാര് (1990) എന്നിവയെല്ലാം ഇവര് ഒരുമിച്ചഭിനയിച്ച സിനിമകളില് ഉള്പ്പെടുന്നു.
89-കാരനായ നടന് ധര്മേന്ദ്ര അവസാനമായി അഭിനയിച്ചത് അമിത് ജോഷിയുടെ റൊമാന്റിക് കോമഡി ചിത്രമായ 'തേരി ബത്തോന് മേ ഐസ ഉല്ഝാ ജിയാ' എന്ന ചിത്രത്തിലാണ്. ഷാഹിദ് കപൂര്, കൃതി സനോന്, ഡിംപിള് കപാഡിയ, രാകേഷ് ബേദി, രാജേഷ് കുമാരി, അനുഭ ഫത്തേപുരിയ എന്നിവര്ക്കൊപ്പമാണ് അദ്ദേഹം ഈ സിനിമയില് അഭിനയിച്ചത്. ആലിയ ഭട്ടും രണ്വീര് സിങ്ങും അഭിനയിച്ച, കരണ് ജോഹറിന്റെ 2023-ലെ റൊമാന്റിക് ഡ്രാമയായ 'റോക്കി ഓര് റാണി കി പ്രേം കഹാനി' എന്ന ചിത്രത്തിലൂടെയും അദ്ദേഹം ഗംഭീരമായ തിരിച്ചുവരവ് നടത്തി.
ജോണി ഗദ്ദാറിന് ശേഷം, പ്രശസ്ത സംവിധായകന് ശ്രീറാം രാഘവനുമായി ധര്മേന്ദ്ര വീണ്ടും ഒന്നിക്കുന്നു. 'ഇക്കീസ്' (2025) എന്ന് പേരിട്ടിരിക്കുന്ന ഈ ചിത്രം ഒരു വാര് ബയോപിക് ആണ്. ഇന്ത്യയിലെ ഏറ്റവും പ്രായം കുറഞ്ഞ പരംവീര് ചക്ര ജേതാവായ സെക്കന്ഡ് ലെഫ്റ്റനന്റ് അരുണ് ഖേതര്പാലിന്റെ ധീരമായ ജീവിതമാണ് ചിത്രം പറയുന്നത്. 1971-ലെ ഇന്ത്യ-പാക് യുദ്ധത്തില് 21-ാം വയസ്സില് വീരമൃത്യു വരിച്ചയാളാണ് അദ്ദേഹം. 2025 ഡിസംബറില് 'ഇക്കീസ്' തിയേറ്ററുകളില് റിലീസ് ചെയ്യാനാണ് പദ്ധതിയിടുന്നത്.
കൂടുതല് ഫീച്ചറുകള് വായിക്കാന് ഗൃഹലക്ഷ്മി വാട്സാപ്പ് ഗ്രൂപ്പില് അംഗമാകൂ:https://mbiurl.in/grihalakshmi
Content Highlights: actor satyajit puri shares a remarkable anecdote about dharmendra`s courage against the mumbai underworld during their acting days. learn how the legendary star asserted his dominance and protected himself.
Published: 28 Oct 2025, 01:55 pm IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented