പൂജയ്ക്കിടെ ചെരിപ്പിട്ട് ക്ഷേത്രത്തിൽ കയറി; അച്ഛൻ ഋഷി കപൂറിൽനിന്നും അടി കിട്ടിയ കഥ ഓർത്തെടുത്ത് രൺബീർ

ദീപാവലി ആഘോഷങ്ങൾ കുടുംബാംഗങ്ങൾക്കൊപ്പമുള്ള ഒത്തുചേരലുകളുടെയും കുട്ടിക്കാലത്തെ രസകരമായ ഓർമകളുടെയും കാലം കൂടിയാണ്. അത്തരത്തിൽ, ദീപാവലിയുമായി ബന്ധപ്പെട്ട തന്റെ കുട്ടിക്കാലത്തെ ഒരു അനുഭവം പങ്കുവച്ചിരിക്കുകയാണ് ബോളിവുഡ് താരം രൺബീർ കപൂർ. അന്തരിച്ച പിതാവും നടനുമായ ഋഷി കപൂറിൽനിന്ന് അടി കിട്ടിയ കഥയാണ് താരം വെളിപ്പെടുത്തിയത്. അമ്മ നീതു കപൂറിനും സഹോദരി റിദ്ധിമ കപൂർ സാഹ്നിക്കുമൊപ്പം 'ദ ഗ്രേറ്റ് ഇന്ത്യൻ കപിൽ ഷോ'യുടെ ആദ്യ എപ്പിസോഡിൽ അതിഥിയായെത്തിയപ്പോഴായിരുന്നു രൺബീറിന്റെ വെളിപ്പെടുത്തൽ. അച്ഛൻ ഏറെ മതവിശ്വാസമുള്ള വ്യക്തിയായിരുന്നെന്നും ആചാരങ്ങളും പാരമ്പര്യങ്ങളും കൃത്യമായി പാലിക്കുന്നതിൽ നിർബന്ധമുള്ളയാളായിരുന്നെന്നും താരം പറഞ്ഞു.

“എനിക്ക് ജീവിതത്തിൽ ഒരിക്കൽ മാത്രമേ നല്ല ശക്തിയിൽ അടി കിട്ടിയിട്ടുള്ളൂ. അത് മുംബൈയിലെ ആർ.കെ.സ്റ്റുഡിയോയിൽ വെച്ചായിരുന്നു. അവിടെ ദീപാവലി പൂജ നടക്കുകയായിരുന്നു. അച്ഛൻ വലിയ ദൈവവിശ്വാസിയായിരുന്നു. അന്ന് എനിക്ക് എട്ടോ ഒൻപതോ വയസ്സുണ്ടാകും. ചെരിപ്പിട്ട് ഞാൻ ക്ഷേത്രത്തിനുള്ളിലേക്ക് കയറി. അപ്പോഴാണ് അച്ഛന്റെ കൈയിൽനിന്ന് തലയിൽ ഒരു അടി കിട്ടിയത്. പുണ്യസ്ഥലത്ത് ചെരിപ്പിട്ട് കയറിയതായിരുന്നു അച്ഛനെ ചൊടിപ്പിച്ചത്”, രൺബീർ പറഞ്ഞു.

2020 ഏപ്രിലിലാണ് അർബുദബാധയെത്തുടർന്ന് ഋഷി കപൂർ അന്തരിച്ചത്. അദ്ദേഹത്തിന്റെ വിയോഗം കപൂർ കുടുംബത്തിനും സിനിമാലോകത്തിനും വലിയ നഷ്ടമായിരുന്നു. പിതാവുമായുള്ള ബന്ധത്തെക്കുറിച്ചും അദ്ദേഹത്തിന്റെ വിയോഗം ജീവിതത്തെ എങ്ങനെ മാറ്റിമറിച്ചുവെന്നതിനെക്കുറിച്ചും രൺബീർ പലപ്പോഴും തുറന്നുപറഞ്ഞിട്ടുണ്ട്.

അഭിനയരംഗത്ത് പുതിയൊരു ഘട്ടത്തിലേക്ക് കടന്നിരിക്കുകയാണ് രൺബീർ കപൂർ ഇപ്പോൾ. നിതേഷ് തിവാരി സംവിധാനം ചെയ്ത മിത്തോളജിക്കൽ ചിത്രം 'രാമായണ: പാർട്ട് 1' വിജയകരമായി പ്രദർശനം തുടരുകയാണ്. ചിത്രത്തിൽ ശ്രീരാമനായി രൺബീർ എത്തുമ്പോൾ സായ് പല്ലവിയാണ് സീതയായി വേഷമിടുന്നത്. യഷ് രാവണനായും രവി ദുബെ ലക്ഷ്മണനായും സണ്ണി ഡിയോൾ ഹനുമാനായും എത്തുന്നു. ശൂർപ്പണഖയായി രാകുൽ പ്രീത് സിങ്ങും ചിത്രത്തിലുണ്ട്. വൻ താരനിരയും ദൃശ്യവിസ്മയങ്ങളും ഉൾക്കൊള്ളുന്ന രണ്ട് ഭാഗങ്ങളുള്ള ചിത്രത്തിന് റിലീസിന് മുൻപുതന്നെ വലിയ പ്രതീക്ഷയാണുണ്ടായിരുന്നത്.

റിലീസ് ചെയ്ത ആദ്യദിവസം തന്നെ ചിത്രം മികച്ച ബോക്‌സ് ഓഫീസ് നേട്ടം സ്വന്തമാക്കി. ആദ്യദിനം ഇന്ത്യയിൽനിന്ന് 64.85 കോടി രൂപ നെറ്റ് കളക്ഷൻ നേടിയെന്നാണ് ആദ്യ കണക്കുകൾ. രണ്ടാംദിനം 48.05 കോടി രൂപ കൂടി നേടിയതോടെ ഇന്ത്യയിലെ നെറ്റ് കളക്ഷൻ 112.90 കോടി രൂപയായി. ഇന്ത്യയിലെ ഗ്രോസ് കളക്ഷൻ 134.80 കോടി രൂപയാണ്. വിദേശത്തുനിന്ന് 86.25 കോടി രൂപയും ചിത്രം നേടിയതായാണ് റിപ്പോർട്ടുകൾ. ഇതോടെ ആദ്യ രണ്ട് ദിവസത്തെ ആഗോള ഗ്രോസ് കളക്ഷൻ ഏകദേശം 221.05 കോടി രൂപയിലെത്തിയെന്നാണ് റിപ്പോർട്ടുകൾ പറയുന്നത്. 
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi