ദീപാവലിക്ക് മധുരം വാങ്ങുമ്പോൾ ശ്രദ്ധിക്കാം; ഏത് എപ്പോൾ വാങ്ങണം?

ദീപാവലി ആഘോഷങ്ങളിൽ മധുരപലഹാരങ്ങൾക്കും സമ്മാനങ്ങൾക്കും പ്രത്യേക സ്ഥാനമുണ്ട്. സുഹൃത്തുക്കൾക്കും ബന്ധുക്കൾക്കും മിഠായിപ്പെട്ടികൾ നൽകുന്നത് സന്തോഷവും ഐശ്വര്യവും പങ്കുവയ്ക്കുന്നതിന്റെ ഭാഗമാണ്. എന്നാൽ, ഇഷ്ടമുള്ള മിഠായികൾ വാങ്ങുന്നതിനൊപ്പം അവയുടെ ഗുണനിലവാരം, സൂക്ഷിക്കേണ്ട രീതി, കാലാവധി എന്നിവയും ശ്രദ്ധിക്കണം. ആഘോഷത്തിരക്കിനിടെ അമിതമായി വാങ്ങി ഭക്ഷണം പാഴാക്കാതിരിക്കാനും ചില കാര്യങ്ങൾ ഓർത്തുവയ്ക്കാം.

ഏതു മിഠായി എപ്പോൾ വാങ്ങാം?
മിഠായിയിലെ പാലിന്റെ അളവാണ് വാങ്ങേണ്ട സമയം തീരുമാനിക്കുന്നതിൽ പ്രധാനം. സോൻപപ്ഡി, ബേസൻ ലഡ്ഡു, കാജു കത്ലി, ഡ്രൈ ഫ്രൂട്ട് മിഠായികൾ എന്നിവ പായ്ക്കറ്റിലെ കാലാവധിയും സൂക്ഷിക്കേണ്ട നിർദേശങ്ങളും അനുസരിച്ച് നാലോ അഞ്ചോ ദിവസം മുൻപ് വാങ്ങാം.
ഖോയ ഉപയോഗിച്ചുള്ള ബർഫി, പേട തുടങ്ങിയവ ദീപാവലിയോട് അടുത്ത ദിവസങ്ങളിൽ വാങ്ങുന്നതാണ് നല്ലത്. രസഗുള, രസ്മലായ്, സന്ദേശ്, കൽക്കണ്ട്, മിൽക്ക് കേക്ക് തുടങ്ങിയ പാൽ കൂടുതലുള്ള മധുരപലഹാരങ്ങൾ ആഘോഷത്തിന്റെ തലേദിവസമോ അന്നേ ദിവസമോ വാങ്ങാം. എല്ലാ മിഠായികളും ഒരുമിച്ച് വാങ്ങുന്നതിനു പകരം രണ്ടുഘട്ടങ്ങളിലായി വാങ്ങുന്നത് അവയുടെ പുതുമ നിലനിർത്താൻ സഹായിക്കും.

സമ്മാനമായി നൽകാൻ ഏതു മിഠായികൾ തിരഞ്ഞെടുക്കാം?
സമ്മാനമായി നൽകുന്ന മിഠായിപ്പെട്ടികൾ ചിലപ്പോൾ ദിവസങ്ങളോളം തുറക്കാതെ ഇരിക്കാം. അതിനാൽ കൂടുതൽ കാലം കേടുകൂടാതെ സൂക്ഷിക്കാവുന്ന സോൻപപ്ഡി, ബേസൻ ലഡ്ഡു, കാജു കത്ലി, ചിലതരം ഡ്രൈ ഫ്രൂട്ട് ബർഫികൾ എന്നിവ തിരഞ്ഞെടുക്കാം. പായ്ക്കറ്റിൽ അടച്ച നമ്കീനും ഉണക്കപ്പഴങ്ങളും നല്ലൊരു ബദലാണ്. എന്നാൽ, പെട്ടെന്ന് കേടാകാൻ സാധ്യതയുള്ള പാൽമിഠായികൾ ഫ്രിഡ്ജിൽ സൂക്ഷിക്കാൻ സൗകര്യമില്ലാത്തവർക്ക് നൽകുന്നത് ഒഴിവാക്കണം. വാങ്ങുന്ന ഓരോ പായ്ക്കറ്റിലെയും കാലാവധിയും സൂക്ഷിക്കേണ്ട രീതിയും പരിശോധിക്കാനും മറക്കരുത്.

മിഠായി പാഴാകാതിരിക്കാൻ…
ദീപാവലിക്ക് സമ്മാനമായി ലഭിക്കുന്ന മിഠായികൾക്കൊപ്പം വീട്ടിലേക്ക് വാങ്ങുന്നതും കൂടിയാൽ പലതും ബാക്കിവരാം. ഇത് ഒഴിവാക്കാൻ ചില കാര്യങ്ങൾ ശ്രദ്ധിക്കാം.
വീട്ടാവശ്യത്തിനും സമ്മാനങ്ങൾക്കുമായി വാങ്ങേണ്ട മിഠായികളുടെ പട്ടിക പ്രത്യേകം തയ്യാറാക്കുക.
ആദ്യം ഉണക്കമിഠായികളും പായ്ക്കറ്റിലടച്ച പലഹാരങ്ങളും വാങ്ങുക. പുതുമ നിലനിർത്തേണ്ടവ പിന്നീട് വാങ്ങാം.
സുഹൃത്തുക്കളിൽനിന്നും ബന്ധുക്കളിൽനിന്നും സമ്മാനങ്ങൾ ലഭിക്കാനുള്ള സാധ്യത കണക്കിലെടുത്ത് വാങ്ങുന്ന അളവ് കുറയ്ക്കുക.
മിഠായികൾ അധികം വന്നാൽ അവയുടെ സൂക്ഷിപ്പുരീതി പാലിച്ച് അയൽക്കാർക്കും സുഹൃത്തുക്കൾക്കും പങ്കുവയ്ക്കാം.

മറ്റൊരിടത്തേക്ക് മിഠായി കൊണ്ടുപോകുമ്പോൾ…
ദൂരയാത്രകളിൽ ലഡ്ഡു, ഡ്രൈ ഫ്രൂട്ട്‌സ് തുടങ്ങിയവ തിരഞ്ഞെടുക്കുന്നതാണ് കൂടുതൽ സൗകര്യപ്രദം. സിറപ്പിൽ സൂക്ഷിക്കുന്നതും പാൽ കൂടുതലുള്ളതുമായ മിഠായികൾ യാത്രയ്ക്കിടെ കേടാകാൻ സാധ്യതയുണ്ട്. ഫ്രിഡ്ജിൽ സൂക്ഷിക്കേണ്ടവ ഇൻസുലേറ്റഡ് ബാഗിലോ ബോക്‌സിലോ കൊണ്ടുപോകണം. ചൂടുള്ള കാറിനുള്ളിൽ മിഠായികൾ ദീർഘനേരം വയ്ക്കരുത്.

കൊറിയർ വഴി അയയ്ക്കുമ്പോൾ ഉറപ്പുള്ള പെട്ടിയും ആവശ്യത്തിന് പാക്കിങ് സാമഗ്രികളും ഉപയോഗിക്കണം. അവധി ദിവസങ്ങൾക്ക് തൊട്ടുമുൻപ് അയയ്ക്കുന്നത് ഒഴിവാക്കാം. പാർസൽ എത്തുന്ന വിവരം സ്വീകർത്താവിനെ അറിയിക്കുന്നതും നല്ലതാണ്.
മധുരം പങ്കുവയ്ക്കുന്നതാണ് ആഘോഷത്തിന്റെ സന്തോഷം. ആവശ്യത്തിന് മാത്രം വാങ്ങുകയും ശരിയായ രീതിയിൽ സൂക്ഷിക്കുകയും ചെയ്താൽ ഭക്ഷണം പാഴാക്കാതെ ദീപാവലി ആഘോഷിക്കാം.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi