ശീതകാലമെത്തുമ്പോൾ, ലോകം ക്രിസ്മസ് ലൈറ്റുകൾ അണിഞ്ഞുതുടങ്ങുമ്പോൾ, സ്കാൻഡിനേവിയക്കാരുടെ വീടുകളിൽ സവിശേഷമായൊരു ഗന്ധം പരക്കും. കത്തുന്ന മെഴുകുതിരികൾക്കും ജിഞ്ചർബ്രെഡ് കുക്കികൾക്കുമൊപ്പം വായുവിൽ നിറയുന്ന കറുവാപ്പട്ടയുടെ സുഗന്ധം.. ഇന്നാട്ടുകാർ പരമ്പരാഗതമായി തയ്യാറാക്കുന്ന ഗ്ലോഗ് പാനീയത്തിൽ നിന്നാണിത്. ക്രിസ്മസ് കാലത്ത് സ്കാൻഡിനേവിയക്കാർ ആസ്വദിക്കുന്ന വൈൻ വിഭവമാണിത്. തണുത്ത അന്തരീക്ഷത്തിന് വീര്യം പകരാൻ അവർ ക്രിസ്മസിനു മുമ്പേ വീടുകളിൽ ഗ്ലോഗ് വിളമ്പിത്തുടങ്ങും.

To advertise here,

വൈൻ ചൂടാക്കി സുഗന്ധവ്യഞ്ജനങ്ങൾ ചേർക്കുന്ന പഴയ യൂറോപ്യൻ പാരമ്പര്യത്തിലാണ് ഗ്ലോഗ് വേരൂന്നിയിരിക്കുന്നത്.

റെഡ് വൈനിൽ കറുവാപ്പട്ട, ഗ്രാമ്പൂ, ഏലക്ക, ഇഞ്ചി, ഓറഞ്ച് തൊലി എന്നിവ ചേർത്ത് ചൂടാക്കിയാണ് ഈ പാനീയമുണ്ടാക്കുക. ഉണക്കമുന്തിരിയും തൊലി കളഞ്ഞ ബദാമും ചേർത്താണ് വിളമ്പുന്നത്. ചെറിയ കപ്പുകളിലോ ചൂട് പ്രതിരോധിക്കുന്ന ഗ്ലാസുകളിലോ ചൂടോടെത്തന്നെയാണ് ഗ്ലോഗ് ആസ്വദിക്കേണ്ടത്. സ്വീഡിഷ് ജിഞ്ചർബ്രെഡ് ബിസ്കറ്റുകൾ, കുങ്കുമപ്പൂവ് ചേർത്ത ബണ്ണുകൾ എന്നിവയും ഇതിനൊപ്പം വിളമ്പും.

പത്തൊൻപതാം നൂറ്റാണ്ടിൽ സ്വീഡനിലാണ് ഈ പാനീയം ക്രിസ്മസ് ആഘോഷങ്ങളുമായി കൂടുതൽ ബന്ധപ്പെട്ടിരുന്നത്. കാലക്രമേണ, ഇത് സ്കാൻഡിനേവിയൻ ക്രിസ്മസ് പാരമ്പര്യങ്ങളുടെ പ്രിയപ്പെട്ട ഭാഗമായി വളർന്നു.

ഇന്ന്, സ്വീഡനിലെയും അയൽരാജ്യങ്ങളിലെയും ക്രിസ്മസ് ഒത്തുചേരലുകളിലും കുടുംബ ആഘോഷങ്ങളിലും ഗ്ലോഗ്  സാധാരണമാണ്. ക്രിസ്മസിന് തൊട്ടുമുമ്പുള്ള ആഴ്ചകളിൽ ഇത് സജീവമായിത്തുടങ്ങും.

ചൂടുള്ള സുഗന്ധവ്യഞ്ജനങ്ങളുടെയും മധുരത്തിന്റെയും മനോഹരമായ സംയോജനമാണ് ഗ്ലോഗിനെ പ്രത്യേകതയുള്ളതാക്കുന്നത്.

ചിലർ ശക്തമായ സ്പിരിറ്റുകൾ ഉപയോഗിച്ച് ഗ്ലോഗിന്റെ വകഭേദങ്ങൾ തയ്യാറാക്കാറുണ്ട്. അതേസമയം ആൽക്കഹോൾ ഇല്ലാത്ത പതിപ്പുകളിൽ വൈനിന് പകരം ഫ്രൂട്ട് ജ്യൂസ് ഉപയോഗിക്കാറുമുണ്ട്. മുന്തിരി ജ്യൂസോ ക്രാൻബെറി ജ്യൂസോ ഉപയോഗിച്ച് ആൽക്കഹോൾ ഇല്ലാത്ത പതിപ്പ് തയ്യാറാക്കാം. ജ്യൂസിലേക്ക് കറുവാപ്പട്ട, ഗ്രാമ്പൂ, ഏലക്ക, ഓറഞ്ചിന്റെ തൊലി, അല്പം ഇഞ്ചി എന്നിവ ചേർത്ത് ചെറുതായി ചൂടാക്കിയെടുക്കുകയാണ് ചെയ്യുക. 

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi