‘കുട്ടികൾ ഉണ്ടായപ്പോൾ അവർക്കൊപ്പമിരിക്കാൻ ആഗ്രഹിച്ചു, പക്ഷെ സാമ്പത്തികസ്വാതന്ത്ര്യം കൈവിട്ടുപോയി’

ബോളിവുഡ് താരം അർഷാദ് വാർസിയുടെ ഭാര്യയും മുൻ വി.ജെയും (VJ) അവതാരകയുമായിരുന്നു മരിയ ഗൊരേട്ടി. വിവാഹശേഷം കുട്ടികളെ വളർത്താനും കുടുംബത്തിൽ ശ്രദ്ധ കേന്ദ്രീകരിക്കാനും അവർ കരിയറിൽ നിന്ന് ഇടവേള എടുക്കുകയായിരുന്നു. അടുത്തിടെ 'ദി അദിതി ഗോവിത്രികർ ഷോ'യിൽ പങ്കെടുത്തുകൊണ്ട്, മാതൃത്വത്തിന് വേണ്ടി കരിയർ മാറ്റിവെച്ചതിനെ കുറിച്ചും ആ തീരുമാനത്തിന് പിന്നിലെ അനുഭവങ്ങളെ കുറിച്ചും മരിയ തുറന്നുപറഞ്ഞിരുന്നു.

മാതൃത്വവും കരിയറും
തന്റെ തീരുമാനം പൂർണ്ണമനസ്സോടെയാണെങ്കിലും സ്വന്തമായി പണം സമ്പാദിച്ചിരുന്ന കാലവും അന്ന് ലഭിച്ചിരുന്ന അംഗീകാരങ്ങളും ചിലപ്പോഴൊക്കെ ഓർക്കാറുണ്ടെന്ന് മരിയ തുറന്നുസമ്മതിക്കുന്നു.

"തുറന്നുപറഞ്ഞാൽ, സ്വന്തമായി പണം സമ്പാദിച്ചിരുന്ന ആ കാലം ഞാൻ ഇപ്പോഴും മിസ്സ് ചെയ്യുന്നുണ്ട്. എംടിവിയിൽ വി.ജെയായി ജോലി ചെയ്തിരുന്ന സമയത്ത് വലിയ രീതിയിലുള്ള പ്രശംസയും സ്നേഹവും എനിക്ക് ലഭിച്ചിരുന്നു. കുട്ടികൾ ഉണ്ടായപ്പോൾ അവർക്കൊപ്പം വീട്ടിലിരിക്കാനാണ് ഞാൻ ആഗ്രഹിച്ചത്. എന്നാൽ ഇന്ന് കൗമാരക്കാരായ കുട്ടികളുടെ മുറിയിലെ വാതിലിൽ മുട്ടുമ്പോൾ 'ഇതിനാണോ ഞാൻ വീട്ടിലിരുന്നത്' എന്ന് ചിലപ്പോഴൊക്കെ തോന്നിപ്പോകും. എങ്കിലും അതൊരു മനോഹരമായ കാലമായിരുന്നു."

ക്യാമറയ്ക്ക് മുന്നിൽ ഏറെ ആത്മവിശ്വാസമുള്ള ആളായിരുന്നെങ്കിലും, ജീവിതത്തിൽ താനൊരു 'ഇൻട്രോവേർട്ട്' (Introvert) ആയിരുന്നുവെന്ന് ജോലി ഉപേക്ഷിച്ച ശേഷമാണ് തിരിച്ചറിഞ്ഞതെന്നും അവർ കൂട്ടിച്ചേർത്തു.

ഭർത്താവ് അർഷാദ് വാർസിയുടെ സിനിമാകരിയറിലെ പ്രതിസന്ധികളെക്കുറിച്ചും വിജയങ്ങളെക്കുറിച്ചും മരിയ സംസാരിച്ചു. പ്രശസ്തിയെയും പ്രശസ്തിയില്ലാത്ത കാലത്തെയും തികച്ചും യാഥാർത്ഥ്യബോധത്തോടെ കാണാൻ ആ അനുഭവങ്ങൾ സഹായിച്ചതായി അവർ പറയുന്നു.

പ്രണയവും കുടുംബവും
1991-ൽ കോളേജിലെ ഒരു ഡാൻസ് മത്സരത്തിൽ വിധികർത്താവായി അർഷാദ് വാർസി എത്തിയപ്പോഴാണ് മരിയയും അർഷാദും ആദ്യമായി കാണുന്നത്. ആ മത്സരത്തിലെ ഒരു മത്സരാർത്ഥിയായിരുന്നു മരിയ. തുടർന്ന് പ്രണയത്തിലായ ഇരുവരും 1996-ൽ വിവാഹിതരായി. സീക്ക് വാർസി, സേൻ സോയി വാർസി എന്നിങ്ങനെ രണ്ട് മക്കളാണ് ഈ ദമ്പതികൾക്കുള്ളത്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi