രണ്ടാം ലോകമഹായുദ്ധത്തിനുശേഷം ആളുകള്‍ ആ മീശവെക്കാതായി

ചരിത്രത്തിലെ പ്രശസ്തരായ ചില ആളുകളുടെ മീശയ്ക്കും അത്ര തന്നെ ആരാധകരുണ്ട്. പേടിപ്പിച്ചും ചിരിപ്പിച്ചും ചിന്തിപ്പിച്ചും കടന്നുപോയ മീശകള്‍. അത്തരം ചില മീശകളെക്കുറിച്ചറിയാം.
ആല്‍ബര്‍ട്ട് ഐന്‍സ്റ്റീന്‍- പറന്നുകിടക്കുന്ന മുടിയും മനോഹരമായ മീശയുമാണ് ഐന്‍സ്റ്റീന്റേത്. മുടിമുറിച്ച് ഭംഗിയായി വെക്കുന്ന ശീലമായിരുന്നു അദ്ദേഹത്തിന്റേത്. മകന്‍ ജനിച്ചശേഷം മുടിചീകുകയും മുറിക്കുകയും ചെയ്യുന്നതൊഴിവാക്കി. ഒരുപാട് വളര്‍ന്നുവരുമ്പോള്‍ ഭാര്യയാണ് അത് വെട്ടിയൊതുക്കിയിരുന്നത്. അതിനൊപ്പം ബുഷ് പോലെ കിടക്കുന്ന മീശയും. വാള്‍റസ് എന്നാണ് ആ മീശയുടെ പേര്. കട്ടിയുള്ള, ഇടതൂര്‍ന്ന്, താഴേക്ക് വളര്‍ന്നുകിടക്കുന്ന മീശയാണത്.  

സാല്‍വഡോര്‍ ഡാലി- പ്രശസ്ത സ്പാനിഷ് ചിത്രകാരനായ ഡാലിയുടെ മീശയും വളരെ പ്രശസ്തമാണ്. നേര്‍ത്ത മീശയാണിത്. അറ്റം വാക്‌സ് പുരട്ടി കൂര്‍പ്പിച്ചുവെച്ചിരിക്കുന്നു. രണ്ടറ്റവും കുത്തനെ മുകളിലേക്കാണ് നില്‍ക്കുന്നത്. ഡാലി മീശയെന്നാണ് ഇതിപ്പോള്‍ അറിയപ്പെടുന്നത്. ഈ മീശയെക്കുറിച്ച് ഡാലി ഒരു പുസ്തകം തന്നെ പ്രസിദ്ധീകരിച്ചിട്ടുണ്ട്. ഒരു മനുഷ്യന്റെ മീശയെക്കുറിച്ചുള്ള ഏകപുസ്തകവും അതാണെന്ന് പറയപ്പെടുന്നു. 

1989-ലാണ് ഡാലി മരിക്കുന്നത്. 2017-ല്‍ ഒരു സ്ത്രീ കോടതിയെ സമീപിച്ചു. തന്റെ അമ്മയും ഡാലിയും തമ്മില്‍ ബന്ധമുണ്ടായിരുന്നുവെന്നും താനവരുടെ മകളാണെന്നുമായിരുന്നു അവരുടെ അവകാശവാദം. ഈ കേസിന്റെ ഭാഗമായി ഡാലിയുടെ മൃതദേഹം പുറത്തെടുക്കേണ്ടി വന്നു. അതിനായി നിയോഗിക്കപ്പെട്ടവര്‍ പറഞ്ഞ കാര്യം ആരെയും അദ്ഭുതപ്പെടുത്തും, അത്രയും വര്‍ഷങ്ങള്‍ക്കുശേഷവും മീശ യാതൊരു കേടുപാടും കൂടാതെ അതേപോലെ തന്നെയിരിപ്പുണ്ടായിരുന്നുവെന്നാണ് അവര്‍ പറഞ്ഞത്.  

ചാര്‍ളി ചാപ്ലിന്‍- ലോകത്തെ കുടുകുടെ ചിരിപ്പിച്ച ചാപ്ലിന്‍. 'ദ ട്രാമ്പ്' എന്ന സിനിമയാണ് ചാപ്ലിനെ പ്രശസ്തനാക്കിയത്. വലിയ കറുത്ത പാന്റും ഷൂസും തൊപ്പിയും ഒപ്പം ആ മീശയുമില്ലാതെ ചാപ്ലിനെ ആരും കണ്ടിട്ടുണ്ടാവില്ല. ടൂത്ത് ബ്രഷ് മീശയെന്നാണ് ചാപ്ലിന്റെ മീശയുടെ പേര്. പില്‍ക്കാലത്ത് ചാപ്ലിന്‍ മീശയെന്നും അറിയപ്പെട്ടു. ബ്രഷിന്റെ ബ്രസിലുകള്‍ പോലെയുള്ളതിനാലാണ് ഈ പേര് വന്നത്. 

19-ാം നൂറ്റാണ്ടില്‍ അമേരിക്കയിലാണിത് പ്രചാരത്തിലായത്. പതുക്കെ ജര്‍മനിയിലേക്കും വ്യാപിച്ചു. 'ദ ട്രാമ്പി'ലാണ് ചാപ്ലിന്‍ ആദ്യമായി ആ മീശയിലെത്തുന്നത്. ഹിറ്റ്‌ലറിനും ടൂത്ത് ബ്രഷ് മീശ തന്നെയായിരുന്നു. ചാപ്ലിന്റെ മീശ ഹിറ്റ്‌ലര്‍ അനുകരിച്ചതാണെന്നും നേരെ തിരിച്ചാണെന്നും വാദങ്ങളുണ്ട്. എന്തായാലും രണ്ടാം ലോകമഹായുദ്ധത്തിന്റെ അവസാനത്തോടെ ഈ മീശ പലരും മനപൂര്‍വം ഒഴിവാക്കി. ഹിറ്റ്‌ലറുമായി ഈ മീശയ്ക്കുള്ള ബന്ധം തന്നെ കാരണം.

ഹള്‍ക്ക് ഹോഗന്‍- പ്രൊഫഷണല്‍ ഗുസ്തിക്കാരനും നടനുമായ ഹള്‍ക്ക് ഹോഗന്‍. ഹള്‍ക്കിനെ കാണുമ്പോള്‍ ആദ്യം ശ്രദ്ധിക്കുക ആ മീശ തന്നെയായിരിക്കും. 'ഹോര്‍സ് ഷൂ' മീശയെന്നാണിത് അറിയപ്പെടുന്നത്. ബൈക്കര്‍ മീശ എന്നും ഇതിനെ വിളിക്കുന്നു.  ഏകദേശം കുതിരലാടത്തിന്റെ ആകൃതിയിലാണ് ഈ മീശ വളര്‍ത്തുന്നത്. അതുകൊണ്ടാണ് ഇങ്ങനൊരു പേര്.