വീടിനുള്ളിലാണെങ്കിലും വെയിലേൽക്കാം; സൺസ്‌ക്രീൻ ഒഴിവാക്കിയാൽ ചർമത്തിന് ‘പണികിട്ടും’

പുറത്തിറങ്ങുമ്പോൾ സൺസ്‌ക്രീൻ പുരട്ടാൻ മറക്കാത്തവരാണ് പലരും. എന്നാൽ വീട്ടിനുള്ളിലിരിക്കുമ്പോൾ അതിന്റെ ആവശ്യമുണ്ടോ? വെയിലേൽക്കാത്ത ഇടത്തിരുന്ന് ജോലി ചെയ്യുമ്പോഴും സൺസ്‌ക്രീൻ വേണമെന്നു പറയുന്നതിന് പിന്നിൽ കാരണമുണ്ട്. ജനലിലൂടെ കടന്നെത്തുന്ന അൾട്രാവയലറ്റ് രശ്മികൾ ചർമത്തെ ബാധിച്ചേക്കാം. ചിലരിൽ ഇത് ചർമത്തിലെ അലർജി പോലുള്ള പ്രതികരണങ്ങൾക്കും പിഗ്മെന്റേഷനും കാരണമാകാം.

വീട്ടിലിരുന്ന് ജോലി ചെയ്യുന്ന ഒരാൾക്ക് സൺസ്‌ക്രീൻ ഒഴിവാക്കാമെന്നു തോന്നാം. എന്നാൽ വലിയ ജനലിനരികിലാണ് ഇരിക്കുന്നതെങ്കിൽ ശ്രദ്ധിക്കണം. ജനൽച്ചില്ലുകൾ അൾട്രാവയലറ്റ് രശ്മികളിൽ ചിലതിനെ തടയുമെങ്കിലും എല്ലാ രശ്മികളെയും പൂർണമായി തടയണമെന്നില്ല. അൾട്രാവയലറ്റ് രശ്മികളിൽ യു.വി.ബി. (UVB) ആണ് പ്രധാനമായും സൂര്യാഘാതത്തിന് കാരണമാകുന്നത്. യു.വി.എ. (UVA) രശ്മികൾ ചർമത്തിന്റെ ആഴത്തിലുള്ള പാളികളിലേക്ക് എത്തും. ചർമത്തിന്റെ പ്രായമാകൽ വേഗത്തിലാക്കുന്നതിലും ചില ചർമരോഗങ്ങളുടെ സാധ്യത വർധിപ്പിക്കുന്നതിലും ഇവയ്ക്ക് പങ്കുണ്ട്. സാധാരണ ജനൽച്ചില്ലുകൾ യു.വി.ബി. രശ്മികളിൽ ഭൂരിഭാഗത്തെയും തടയുമെങ്കിലും യു.വി.എ. രശ്മികൾ ഒരു പരിധിവരെ ഉള്ളിലേക്ക് കടന്നെത്താം. ചില്ലിന്റെ തരം അനുസരിച്ച് ഇതിൽ വ്യത്യാസമുണ്ടാകും.

ജനലിനോട് എത്ര അടുത്താണ് ഇരിക്കുന്നത്, നേരിട്ട് വെയിലേൽക്കുന്നുണ്ടോ, ദിവസത്തിലെ ഏത് സമയത്താണ് സൂര്യപ്രകാശം ലഭിക്കുന്നത് തുടങ്ങിയ കാര്യങ്ങളും ചർമത്തിലേക്കെത്തുന്ന രശ്മികളുടെ അളവിനെ സ്വാധീനിക്കും. ദിവസവും മണിക്കൂറുകളോളം ജനലിനരികിലിരുന്ന് ജോലി ചെയ്യുന്നവരും നേരിട്ട് വെയിലേൽക്കുന്നവരും ഇക്കാര്യം ശ്രദ്ധിക്കണം.

ചർമത്തിൽ ചുവന്ന പാടുകളും ചൊറിച്ചിലും ഉണ്ടാകുന്നുണ്ടോ?
സൂര്യപ്രകാശത്തോടുള്ള പ്രതികരണമായി ചിലരിൽ ചർമത്തിൽ ചുവന്ന പാടുകൾ, ചൊറിച്ചിൽ, ചെറിയ തടിപ്പുകൾ എന്നിവ പ്രത്യക്ഷപ്പെടാം. പോളിമോർഫസ് ലൈറ്റ് ഇറപ്ഷൻ (Polymorphous Light Eruption - PMLE) എന്ന അവസ്ഥ ഇത്തരത്തിലൊന്നാണ്. സാധാരണയായി സൺ റാഷ് എന്നും ഇതിനെ വിളിക്കാറുണ്ട്.

സൂര്യപ്രകാശം ഏൽക്കുന്ന ഭാഗങ്ങളിലാണ് പലപ്പോഴും ഇത്തരം പാടുകൾ കാണപ്പെടുന്നത്. ചൊറിച്ചിൽ, ചർമത്തിൽ പരുക്കൻ പാളികൾ രൂപപ്പെടൽ തുടങ്ങിയ ലക്ഷണങ്ങളും ഉണ്ടാകാം. എന്നാൽ എല്ലാ ചർമത്തിലെ ചൊറിച്ചിലും പാടുകളും സൂര്യപ്രകാശം മൂലമാണെന്ന് കരുതരുത്. മറ്റ് പല കാരണങ്ങൾകൊണ്ടും ഇത്തരം പ്രശ്‌നങ്ങളുണ്ടാകാം.

പുതിയതായി ചർമത്തിൽ പാടുകൾ പ്രത്യക്ഷപ്പെടുകയോ ചൊറിച്ചിൽ തുടരുകയോ ചെയ്യുന്നുണ്ടെങ്കിൽ സ്വയം ചികിത്സിച്ച് സമയം കളയാതെ ഡെർമറ്റോളജിസ്റ്റിനെ സമീപിക്കണം. ലക്ഷണങ്ങളുടെ കാരണം തിരിച്ചറിഞ്ഞശേഷം വേണം ചികിത്സ തീരുമാനിക്കാൻ.

ദിവസം മുഴുവൻ നേരിട്ട് സൂര്യപ്രകാശം ഏൽക്കാത്ത ഇടത്ത് കഴിയുന്ന ഒരാൾക്ക് ബീച്ചിൽ പോകുന്നതുപോലെയുള്ള സൂര്യസംരക്ഷണം ആവശ്യമില്ല. എന്നാൽ ജനലിലൂടെ നേരിട്ട് വെയിലേൽക്കുന്നവർക്ക് സ്ഥിതി വ്യത്യസ്തമായേക്കാം. പിഗ്മെന്റേഷൻ, മെലാസ്മ, ചർമത്തിലെ വീക്കം മാറിയശേഷം അവശേഷിക്കുന്ന കറുത്ത പാടുകൾ എന്നിവയുള്ളവർ സൺസ്‌ക്രീൻ ഉപയോഗിക്കുന്നതിൽ കൂടുതൽ ശ്രദ്ധിക്കണം. സൂര്യപ്രകാശത്തോട് അമിതമായി പ്രതികരിക്കുന്ന ചർമമുള്ളവർക്കും ഡോക്ടറുടെ നിർദേശം അനുസരിച്ച് സംരക്ഷണം ഉറപ്പാക്കാം.

അതേസമയം, നേരിട്ട് സൂര്യപ്രകാശം ഏൽക്കാത്ത ഇടത്ത് കഴിയുന്ന എല്ലാവർക്കും വീടിനുള്ളിൽ നിർബന്ധമായും സൺസ്‌ക്രീൻ വേണമെന്നില്ല. വ്യക്തിയുടെ ചർമത്തിന്റെ അവസ്ഥ, ജനലിലൂടെയുള്ള സൂര്യപ്രകാശത്തിന്റെ അളവ്, പുറത്തുപോകുന്ന സമയം തുടങ്ങിയ കാര്യങ്ങൾ കണക്കിലെടുത്താണ് തീരുമാനമെടുക്കേണ്ടത്.

മേഘാവൃതമായ ദിവസങ്ങളിലും ശ്രദ്ധിക്കണം
വെയിലുള്ള ദിവസങ്ങളിൽ മാത്രമാണ് സൂര്യസംരക്ഷണം വേണ്ടതെന്ന ധാരണ ശരിയല്ല. മേഘാവൃതമായ ദിവസങ്ങളിലും അൾട്രാവയലറ്റ് രശ്മികൾ ഭൂമിയിലെത്താം. കുറച്ചുസമയത്തേക്ക് പുറത്തുപോകുന്നതും കാറിനടുത്തേക്ക് നടക്കുന്നതും പെട്ടെന്നുള്ള യാത്രകളുമെല്ലാം സൂര്യപ്രകാശം ഏൽക്കാനുള്ള അവസരങ്ങളാണ്.

ദിവസേന സൺസ്‌ക്രീൻ ഉപയോഗിക്കുന്നത് ഒരു ശീലമാക്കുന്നത് ഇത്തരം അപ്രതീക്ഷിത സാഹചര്യങ്ങളിൽ സംരക്ഷണം ഉറപ്പാക്കാൻ സഹായിക്കും. പ്രത്യേകിച്ച് പിഗ്മെന്റേഷൻ പ്രശ്‌നങ്ങളുള്ളവർക്ക് ഇത് പ്രയോജനകരമാണ്. എന്നാൽ വീട്ടിനുള്ളിൽ കഴിയുന്ന സമയമത്രയും ഇടവിട്ട് സൺസ്‌ക്രീൻ വീണ്ടും പുരട്ടണമെന്നില്ല. എത്രനേരം സൂര്യപ്രകാശം ഏൽക്കുന്നു, ഏത് ഉൽപ്പന്നമാണ് ഉപയോഗിക്കുന്നത് തുടങ്ങിയ കാര്യങ്ങൾ അനുസരിച്ചാണ് വീണ്ടും പുരട്ടേണ്ടതിന്റെ ആവശ്യം തീരുമാനിക്കേണ്ടത്.

ജനലിനരികിലിരുന്ന് ജോലി ചെയ്യുന്നവർ ശ്രദ്ധിക്കാൻ
നേരിട്ട് വെയിലേൽക്കുന്ന ജനലിനരികിലാണ് ഇരിക്കുന്നതെങ്കിൽ ഇരിപ്പിടം മാറ്റാൻ ശ്രമിക്കാം.
ആവശ്യമെങ്കിൽ അൾട്രാവയലറ്റ് രശ്മികളെ തടയാൻ സഹായിക്കുന്ന ജനൽ ഫിലിമുകൾ ഉപയോഗിക്കാം.
പുറത്തുപോകുമ്പോൾ ബ്രോഡ് സ്‌പെക്ട്രം സൺസ്‌ക്രീൻ തിരഞ്ഞെടുക്കാം. ഇത് യു.വി.എ., യു.വി.ബി. രശ്മികളിൽനിന്ന് സംരക്ഷണം നൽകാൻ സഹായിക്കും.
ദീർഘനേരം പുറത്തു കഴിയുമ്പോൾ ഉൽപ്പന്നത്തിന്റെ നിർദേശങ്ങൾ അനുസരിച്ച് സൺസ്‌ക്രീൻ വീണ്ടും പുരട്ടണം.
ചർമത്തിൽ തുടർച്ചയായ ചൊറിച്ചിലോ പാടുകളോ ഉണ്ടെങ്കിൽ ഡോക്ടറുടെ ഉപദേശം തേടണം.
വീട്ടിനുള്ളിൽ കഴിയുന്നതുകൊണ്ടുമാത്രം സൂര്യപ്രകാശത്തിൽനിന്ന് പൂർണ സംരക്ഷണം ലഭിക്കുമെന്ന് കരുതേണ്ട. അതേസമയം, എല്ലാ മുറികളിലും സൺസ്‌ക്രീൻ നിർബന്ധമാക്കേണ്ടതുമില്ല. എവിടെയാണ് ഇരിക്കുന്നത്, എത്രനേരം സൂര്യപ്രകാശം ഏൽക്കുന്നു, ചർമത്തിന്റെ പ്രത്യേകതകൾ എന്തൊക്കെയാണ് എന്നിവ മനസ്സിലാക്കി വേണം സൺസ്ക്രീൻ തിരഞ്ഞെടുക്കാൻ.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi