ബോളിവുഡ് താരങ്ങളായ ദീപിക പദുക്കോണിനും രൺവീർ സിങ്ങിനും ഒരുമാസം മുമ്പാണ് രണ്ടാമത്തെ മകൾ പിറന്നത്. ഇപ്പോഴിതാ, വിജയദശമി ദിനത്തിൽ കുഞ്ഞിന്റെ പേരും കുടുംബചിത്രവും പങ്കുവെച്ചിരിക്കുകയാണ് താരദമ്പതികൾ. ദേവി എന്നാണ് കുഞ്ഞിന് പേരിട്ടിരിക്കുന്നത്. ചിത്രത്തിൽ മൂത്ത മകൾ ദുവയെ കൈകളിലേന്തിയിരിക്കുന്ന രൺവീറിനെയും കുഞ്ഞനുജത്തിയായ ദേവിയെ സ്‌നേഹത്തോടെ ചുംബിക്കുന്ന ദുവയെയുമാണ് കാണാനാകുക. ദേവിയെ കൈകളിലേന്തി നിറഞ്ഞ പുഞ്ചിരിയോടെ നിൽക്കുകയാണ് ദീപിക. കുടുംബത്തിന്റെ ഈ മനോഹര നിമിഷം ആരാധകരുടെ ശ്രദ്ധയും സ്‌നേഹവും നേടിക്കഴിഞ്ഞു. ചിത്രം പങ്കുവെച്ചുകൊണ്ട് ''സ്‌നേഹത്തിന്റെയും സമൃദ്ധിയുടെയും'' എന്ന അർഥം വരുന്ന Of Love & Abundance എന്ന കുറിപ്പിനൊപ്പം ദേവി പദുക്കോൺ സിങ് എന്നും ദീപിക കുറിച്ചു.

സെപ്റ്റംബർ 19-നാണ് ദീപികയ്ക്കും രൺവീറിനും രണ്ടാമത്തെ കുഞ്ഞ് പിറന്നത്. അന്ന് 'സ്വാഗതം, കുഞ്ഞുമകളേ' എന്ന ലളിതമായ കുറിപ്പിലൂടെയാണ് താരദമ്പതികൾ സന്തോഷവാർത്ത പങ്കുവെച്ചത്. ഏപ്രിലിലായിരുന്നു രണ്ടാമത്തെ കുഞ്ഞിനെ വരവേൽക്കാനൊരുങ്ങുന്ന വിവരം ഇരുവരും അറിയിച്ചത്.

2024 സെപ്റ്റംബർ എട്ടിനായിരുന്നു ദീപികയും രൺവീറും ആദ്യത്തെ മകളായ ദുവയ്ക്ക് ജന്മം നൽകിയത്. അന്നും 'സ്വാഗതം, കുഞ്ഞുമകളേ' എന്ന കുറിപ്പോടെയാണ് മകളുടെ ജനനവാർത്ത അറിയിച്ചത്. ഇപ്പോൾ ദേവിയുടെ വരവോടെ കുടുംബത്തിലെ പുതിയ സന്തോഷം ആരാധകരുമായി പങ്കുവെച്ചിരിക്കുകയാണ് താരങ്ങൾ.

2013-ൽ ‘ഗോലിയോം കി രാസ്‌ലീല രാം-ലീല’ എന്ന ചിത്രത്തിന്റെ സെറ്റിൽവെച്ചാണ് ദീപികയും രൺവീറും പരിചയപ്പെടുന്നത്. പിന്നീട് പ്രണയത്തിലായ ഇരുവരും 2018 നവംബർ 14-ന് ഇറ്റലിയിലെ ലേക്ക് കോമോയിൽ വിവാഹിതരായി. കൊങ്കണി, സിന്ധി ആചാരങ്ങൾ അനുസരിച്ച് രണ്ട് ചടങ്ങുകളിലായിട്ടായിരുന്നു വിവാഹം. സിനിമാലോകത്തെ പ്രിയപ്പെട്ട താരദമ്പതികളുടെ കുടുംബത്തിലേക്ക് ദേവി കൂടി എത്തിയതിന്റെ സന്തോഷത്തിലാണ് ആരാധകർ.
കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi