‘എന്തുകൊണ്ട് എനിക്ക്?’; മയോസൈറ്റിസ് രോഗനിർണയത്തിന് ശേഷം കടന്നുപോയ കാലത്തെക്കുറിച്ച് സാമന്ത

മയോസൈറ്റിസ് രോഗനിർണയത്തിന് പിന്നാലെ ജീവിതത്തിലുണ്ടായ മാറ്റങ്ങളെക്കുറിച്ച് തുറന്നുപറയുകയാണ് നടി സാമന്ത റൂത്ത് പ്രഭു. രോഗാവസ്ഥ ആത്മവിശ്വാസത്തെ മാത്രമല്ല, തന്റെ വ്യക്തിത്വത്തെക്കുറിച്ചുള്ള കാഴ്ചപ്പാടിനെപ്പോലും ബാധിച്ചിരുന്നുവെന്ന് താരം പറയുന്നു.

ആരോഗ്യപ്രശ്‌നങ്ങൾ നേരിടുമ്പോൾ പുറത്തുള്ള ആത്മവിശ്വാസത്തിനപ്പുറം ചില കാര്യങ്ങൾ പഠിക്കേണ്ടിവരുമെന്ന് സാമന്ത പറഞ്ഞു. “ആത്മവിശ്വാസം വളരെ ശ്രദ്ധയോടെ കെട്ടിപ്പടുക്കുന്നതാണ്. എന്നാൽ ഒരു ആരോഗ്യപ്രശ്‌നം നിങ്ങളെ ബാധിക്കുമ്പോൾ, നിങ്ങൾ എത്ര ആത്മവിശ്വാസത്തോടെ കാണപ്പെടുന്നു എന്നതൊന്നും രോഗത്തിന് പ്രശ്‌നമല്ല. അന്ന് എന്റെ വ്യക്തിത്വം തന്നെ നഷ്ടപ്പെട്ടതായി എനിക്ക് തോന്നി. എനിക്ക് യാതൊരു നിയന്ത്രണവുമില്ലെന്നും തോന്നി,” സാമന്ത പറഞ്ഞു.

എന്നാൽ പിന്നീട് കാര്യങ്ങളെ മറ്റൊരു രീതിയിൽ കാണാൻ പഠിച്ചെന്നും താരം പറയുന്നു. ''അതിനെ ഞാൻ എങ്ങനെ നേരിടുന്നു എന്നതിൽ എനിക്ക് നിയന്ത്രണമുണ്ടെന്ന് തിരിച്ചറിയാൻ കുറച്ച് സമയമെടുത്തു. ആത്മവിശ്വാസം അഭിനയിക്കേണ്ടതില്ലെന്നും മനസ്സിലായി. പകരം പഠിക്കേണ്ട മറ്റ് ചില കാര്യങ്ങളുണ്ടായിരുന്നു. പ്രതിസന്ധി എന്നെ പഠിപ്പിച്ച ചില മൂല്യങ്ങൾ. അതിജീവനശേഷി, വിശ്വാസം, പ്രതീക്ഷ എന്നിവയെല്ലാം രോഗകാലത്ത് കൂടുതൽ പ്രധാനപ്പെട്ടതായി ഞാൻ തിരിച്ചറിഞ്ഞു. രോഗം എന്നെ പഠിപ്പിച്ച ഈ പാഠങ്ങൾ പിന്നീട് എന്റെ ജീവിതത്തിന്റെ വിലമതിക്കാനാകാത്ത ഭാഗമായി. ഇതിലൂടെ കടന്നുപോകേണ്ടിവന്നില്ലായിരുന്നെങ്കിൽ എന്ന് ഞാൻ ആഗ്രഹിക്കുന്നുണ്ട്. പക്ഷേ, ഇതിൽനിന്ന് എന്തെങ്കിലും പഠിക്കാനുണ്ടെന്ന് തിരിച്ചറിയാൻ എനിക്ക് കുറച്ച് സമയമെടുത്തു,” സാമന്ത വ്യക്തമാക്കി.

2022-ലാണ് തനിക്ക് മയോസൈറ്റിസ് എന്ന ഓട്ടോഇമ്യൂൺ രോഗാവസ്ഥയുണ്ടെന്ന് സാമന്ത പരസ്യമായി അറിയിച്ചത്. ആരോഗ്യത്തിൽ ശ്രദ്ധ കേന്ദ്രീകരിക്കുന്നതിനായി അഭിനയത്തിൽനിന്ന് ഇടവേളയെടുക്കുകയും ചികിത്സയും വിശ്രമവും ഉൾപ്പെടെയുള്ള കാര്യങ്ങളിൽ ശ്രദ്ധ നൽകുകയും ചെയ്തു. രോഗനിർണയത്തിന് പിന്നാലെയുള്ള കാലം ശാരീരികമായ വെല്ലുവിളികൾക്കൊപ്പം മാനസികമായും ഏറെ ബുദ്ധിമുട്ടേറിയതായിരുന്നുവെന്നാണ് താരത്തിന്റെ വാക്കുകളിൽനിന്ന് വ്യക്തമാകുന്നത്.

എന്നാൽ ആ കാലഘട്ടത്തെ ജീവിതത്തിലെ തിരിച്ചടിയായി മാത്രം കാണുന്നില്ല സാമന്ത. രോഗാവസ്ഥ നൽകിയ വേദനയ്‌ക്കൊപ്പം തന്നെ, ജീവിതത്തെക്കുറിച്ചുള്ള പുതിയ തിരിച്ചറിവുകളും അത് സമ്മാനിച്ചുവെന്നാണ് താരം പറയുന്നത്. 
ഇന്ന് ജീവിതത്തിലെ മറ്റൊരു അധ്യായത്തിലാണ് സാമന്ത. രാജ് നിദിമൊരുവിനെ വിവാഹം ചെയ്ത താരം ആദ്യ കുഞ്ഞിനെ വരവേൽക്കാനുള്ള കാത്തിരിപ്പിലാണ്. ആരോഗ്യപ്രതിസന്ധിക്ക് ശേഷം അഭിനയത്തിലേക്ക് തിരിച്ചെത്തിയ സാമന്ത, സിനിമയ്ക്കപ്പുറം സംരംഭകയായും സജീവമാണ്. പ്രതിസന്ധികൾ നൽകിയ പാഠങ്ങളുമായി കൂടുതൽ കരുത്തോടെ മുന്നോട്ടുപോകുകയാണ് താരം.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi