‘കാർ വാങ്ങാൻ വെച്ച ഒന്നരക്കോടി നാനാ പടേകർ കർഷകർക്ക് നൽകി’

ബോളിവുഡ് നടൻ നാന പടേകർ വലിയ ദേഷ്യക്കാരനാണെന്ന് പരക്കെ സംസാരമുണ്ട്. നാനയുടെ കോപം കാരണം നിർമ്മാതാക്കൾക്ക് നഷ്ടം വരെ വന്ന സമയങ്ങളുണ്ടായിട്ടുണ്ടെന്നും പറയപ്പെടുന്നു. എന്നാൽ, ആളുകൾക്ക് അദ്ദേഹത്തെക്കുറിച്ചുള്ളത് തെറ്റായ ധാരണയാണെന്ന് പറയുകയാണ് തിരക്കഥാകൃത്തും സംവിധായകനുമായ രൺബീർ പുഷ്പ്.

കർഷക ആത്മഹത്യകളാൽ ദുരിതത്തിലായ നിരവധി കുടുംബങ്ങളുടെ ദയനീയ അവസ്ഥ കണ്ട് നാന ചെയ്ത ഒരു കാരുണ്യപ്രവർത്തനത്തെപ്പറ്റി പുഷ്പ് ഓർത്തെടുത്തു. അവരുടെ ബുദ്ധിമുട്ടുകൾ കണ്ട അദ്ദേഹം 1.5 കോടി രൂപ വിലയുള്ള കാർ വാങ്ങേണ്ടെന്ന് തീരുമാനിക്കുകയായിരുന്നത്രേ. പകരം, ആ തുക 15,000 രൂപ വീതമുള്ള ഓഹരികളാക്കി ബാധിക്കപ്പെട്ട കുടുംബങ്ങൾക്ക് നൽകുകയും ചെയ്തു. 

"ഒരു ദിവസം അദ്ദേഹം വാർത്ത കാണുമ്പോൾ നിരവധി കർഷകർ ആത്മഹത്യ ചെയ്തതിനെ തുടർന്ന് ദുഃഖത്തിലായ കുടുംബങ്ങളെ കണ്ടു. അടുത്ത ദിവസം അദ്ദേഹം 1.5 കോടി രൂപയുടെ കാർ വാങ്ങേണ്ടതായിരുന്നു, എന്നാൽ പിറ്റേദിവസം അദ്ദേഹം തന്റെ സുഹൃത്തിനെ വിളിച്ച് 15,000 രൂപയുടെ ചെക്കുകൾ തയ്യാറാക്കി എല്ലാ കർഷകരുടെയും കുടുംബങ്ങൾക്ക് വിതരണം ചെയ്യാൻ ആവശ്യപ്പെട്ടു. കർഷകരുടെ കണ്ണുനീർ തുടയ്ക്കുന്നയാൾക്ക് ഒരിക്കലും ആർക്കും ദോഷം ചെയ്യാൻ കഴിയില്ല. അദ്ദേഹം 'നാമം ഫൗണ്ടേഷൻ' രൂപീകരിച്ചു, അതിലൂടെ എണ്ണമറ്റ ഫണ്ടുകൾ ശേഖരിച്ചിട്ടുണ്ട്. അദ്ദേഹം തന്നെ ഒരു ഫാമിലാണ് താമസിക്കുന്നത്"- പുഷ്പ് പറഞ്ഞു.

ശരിയായ കാര്യങ്ങൾക്കുവേണ്ടി മാത്രമാണ് നാനാ കോപിക്കാറുള്ളതെന്നും അദ്ദേഹം വിശദീകരിക്കുന്നു. ഓടിക്കൊണ്ടിരുന്ന കാറിൽ നിന്ന് ഒരാൾ പ്ലാസ്റ്റിക് കുപ്പി റോഡിലേക്ക് വലിച്ചെറിയുന്നത് കണ്ട നടന് കടുത്ത ദേഷ്യം വന്ന ഒരു സംഭവം അദ്ദേഹം ഓർത്തെടുത്തു.

“അദ്ദേഹം കാർ നിർത്തി കുപ്പി എടുത്തു. മുന്നോട്ട് പോയി ട്രാഫിക് സിഗ്നലിൽ ആ കാർ തടഞ്ഞു. ഡ്രൈവറോട് ഗ്ലാസ് താഴ്ത്താൻ ആവശ്യപ്പെട്ടു. നാനാ അദ്ദേഹത്തോട് ചോദിച്ചു, ഭാരതം ആരെങ്കിലും വൃത്തിയായി സൂക്ഷിക്കുമോ? ഗാന്ധിജി പോയി, പക്ഷേ നിങ്ങൾ ഇപ്പോഴും ഈ ഭൂമിയിലുണ്ട്. അതിനാൽ, ഈ രാജ്യത്തെ പൗരൻ എന്ന നിലയിൽ ഇത് വൃത്തിയായി സൂക്ഷിക്കേണ്ടത് നിങ്ങളുടെ കടമയല്ലേ? അതോ ഡസ്റ്റ് ബിൻ ആണെന്ന് കരുതി ഞാൻ ആ കുപ്പി നിങ്ങളുടെ കാറിനുള്ളിലേക്ക് വലിച്ചെറിയണോ?" അദ്ദേഹം പറഞ്ഞു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi