മലപ്പുറത്തെ 'ഇരട്ടകളുടെ ഗ്രാമം;' ഒരേ മുഖങ്ങൾ, ജോഡികളായി പോകുന്ന കാഴ്ച വീണ്ടും ശ്രദ്ധനേടുന്നു

കേരളത്തിലെ മലപ്പുറം ജില്ലയിലെ കൊടിഞ്ഞി എന്ന ചെറിയ ഗ്രാമം, ഒറ്റനോട്ടത്തിൽ ശാന്തമായ മറ്റേതൊരു ഗ്രാമത്തെയും പോലെ തോന്നിയേക്കാം. എന്നാൽ ഇവിടെ അല്പസമയം ചിലവഴിച്ചാൽ ഒരേപോലെയുള്ള മുഖങ്ങൾ, ജോഡികളായി നടന്നുപോകുന്നതു കാണാം. അതെ, ഇതാണ് ഇന്ത്യയുടെ സ്വന്തം 'ഇരട്ടകളുടെ ഗ്രാമം.' ഇരട്ടക്കുട്ടികൾ എന്നത് ഇവിടെ ഒരു അത്ഭുതമല്ല മറിച്ച് സാധാരണ കാഴ്ചയാണ്.

ജനസംഖ്യയുടെ ഏകദേശം 20 ശതമാനവും ഇരട്ടക്കുട്ടികളായ കൊടിഞ്ഞി, കാലക്രമേണ ഇന്ത്യയുടെ "ട്വിൻ ടൗൺ" (Twin Town) എന്ന നിലയിൽ ആഗോള ശ്രദ്ധ നേടി. ലോകത്ത് തന്നെ ഏറ്റവും കുറഞ്ഞ ഇരട്ടപ്രസവങ്ങൾ രേഖപ്പെടുത്തുന്ന രാജ്യങ്ങളിലൊന്നായ ഇന്ത്യയിൽ, ഈ ഗ്രാമം തികച്ചും അസാധാരണമായി നിലകൊള്ളുന്നു. ഏകദേശം 2,000 കുടുംബങ്ങളുള്ള ഈ ഗ്രാമത്തിൽ 400 മുതൽ 550 വരെ ജോഡി ഇരട്ടകളുണ്ടെന്നാണ് കണക്കാക്കപ്പെടുന്നത്.

എന്തുകൊണ്ട് കൊടിഞ്ഞി വീണ്ടും വാർത്തകളിൽ?
പ്രമുഖ ഇ-കൊമേഴ്‌സ് കമ്പനിയായ ഫ്ലിപ്പ്കാർട്ട് (Flipkart) പുറത്തിറക്കിയ പുതിയ പരസ്യത്തിലൂടെയാണ് ഈ ഗ്രാമം വീണ്ടും സോഷ്യൽ മീഡിയയിൽ ചർച്ചയാകുന്നത്. കൊടിഞ്ഞിയുടെ പ്രത്യേകതയെ തങ്ങളുടെ ബ്രാൻഡുമായി സമർത്ഥമായി ബന്ധിപ്പിക്കുകയാണ് ഈ കാമ്പയിൻ ചെയ്തത്.

ലോകത്തെ എല്ലാ കാര്യങ്ങളും ജോഡികളായി നിലനിൽക്കുന്ന ഒരു ഇടമായി ഭാവനയിൽ കണ്ടുകൊണ്ട്, ‘ഡബിൾ’ മൂല്യത്തെയും ഓഫറുകളെയും സൂചിപ്പിക്കാൻ കൊടിഞ്ഞിയെ ഒരു രൂപകമായി ഈ പരസ്യം ഉപയോഗിച്ചിരുന്നു. ഇതിലെ ഹാസ്യവും ദൃശ്യാവിഷ്‌കാരവും സോഷ്യൽ മീഡിയയിൽ വലിയ പ്രശംസ പിടിച്ചുപറ്റുകയും ചെയ്തു.

കൊടിഞ്ഞിയിലെ ഇരട്ടപ്രസവത്തിന്റെ നിരക്ക് ഇത്രയും കൂടാനുള്ള കൃത്യമായ കാരണം ഇന്നും വ്യക്തമല്ല. മലിനീകരണം, അസാധാരണമായ രാസവസ്തുക്കൾ, ജീവിതശൈലീ മാറ്റങ്ങൾ എന്നിവയല്ല ഇതിന് കാരണമെന്ന് പഠനങ്ങൾ തെളിയിച്ചിട്ടുണ്ട്. ഓരോ വർഷവും പുതിയ ഇരട്ടക്കുട്ടികൾ ഇവിടെ ജനിച്ചുകൊണ്ടേയിരിക്കുന്നു.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi