ജോലി സമയത്തെ ചൊല്ലിയുള്ള തർക്കത്തെത്തുടർന്ന് ദീപിക പദുകോൺ സന്ദീപ് റെഡ്ഡി വാങ്കയുടെ 'സ്പിരിറ്റ്' എന്ന ചിത്രത്തിൽ നിന്ന് പിന്മാറിയെന്ന വാർത്തകൾക്ക് പിന്നാലെ, നടൻ പ്രകാശ് രാജും ചിത്രത്തിൽ നിന്ന് പുറത്തായതായി പുതിയ റിപ്പോർട്ടുകൾ സൂചിപ്പിക്കുന്നു. ചിത്രത്തിന്റെ അണിയറപ്രവർത്തകരുമായുള്ള സർഗ്ഗാത്മകമായ അഭിപ്രായവ്യത്യാസങ്ങളാണ് ഇതിന് കാരണമായി പറയപ്പെടുന്നത്.

ചിത്രത്തിൽ വളരെ പ്രധാനപ്പെട്ട ഒരു വേഷമായിരുന്നു പ്രകാശ് രാജിന്റേത്. ചിത്രത്തിന്റെ ലോഞ്ച് വീഡിയോയിലെ അദ്ദേഹത്തിന്റെ ശബ്ദം ഇതിനോടകം തന്നെ വലിയ തരംഗം സൃഷ്ടിച്ചിരുന്നു. എന്നാൽ 'ഒടിടി പ്ലേ' നൽകുന്ന റിപ്പോർട്ട് പ്രകാരം പ്രകാശ് രാജിനെ ചിത്രത്തിൽ നിന്ന് ഒഴിവാക്കിയിരിക്കുകയാണ്. നിലവിൽ ഹൈദരാബാദിൽ സിനിമയുടെ ചിത്രീകരണം പുരോഗമിക്കുകയാണ്.

തിരക്കഥയെക്കുറിച്ചും ഒരു പ്രത്യേക രംഗം ചിത്രീകരിക്കുന്നതിനെക്കുറിച്ചും സെറ്റിൽ വെച്ച് പ്രകാശ് രാജും സംവിധായകൻ സന്ദീപ് റെഡ്ഡി വാങ്കയും തമ്മിൽ രൂക്ഷമായ തർക്കമുണ്ടായതായും ഇതേത്തുടർന്ന് നടൻ സിനിമയിൽ നിന്ന് പിന്മാറിയതായും റിപ്പോർട്ടുകൾ പറയുന്നു.

"ചില സന്ദർഭങ്ങളിലെ പ്രകാശ് രാജിന്റെ പെരുമാറ്റം നിർമ്മാതാക്കൾക്ക് തൃപ്തികരമായിരുന്നില്ലെന്നും ഇതാണ് അദ്ദേഹത്തെ ഒഴിവാക്കുക എന്ന കടുത്ത തീരുമാനത്തിലേക്ക് അവരെ എത്തിച്ചതെന്നും പറയപ്പെടുന്നു. നിലവിൽ ഔദ്യോഗിക സ്ഥിരീകരണമൊന്നുമില്ലെങ്കിലും സിനിമാ വൃത്തങ്ങളിൽ ഈ വാർത്ത അതിവേഗം പടരുകയാണ്."

പ്രകാശ് രാജിനെ വെച്ച് ഇതിനോടകം ചിത്രീകരിച്ച ചില രംഗങ്ങൾ ഒഴിവാക്കേണ്ടി വരുമെന്നും ഇത് ഷൂട്ടിംഗ് വൈകാൻ കാരണമായേക്കാമെന്നും റിപ്പോർട്ട് അവകാശപ്പെടുന്നു. എന്നാൽ നിർമ്മാതാക്കളോ നടനോ ഇതുവരെ ഈ വിഷയത്തിൽ പ്രതികരിച്ചിട്ടില്ല.

നേരത്തെ, ദീപിക പദുകോണായിരുന്നു ചിത്രത്തിലെ നായികയാകേണ്ടിയിരുന്നത്. എന്നാൽ സംവിധായകൻ സന്ദീപുമായി ജോലി സമയത്തെ ചൊല്ലിയുണ്ടായ തർക്കത്തെത്തുടർന്ന് ദീപിക പിന്മാറുകയും പകരം തൃപ്തി ദിമ്രി ആ സ്ഥാനത്തേക്ക് എത്തുകയുമായിരുന്നു.

പ്രഭാസ്, തൃപ്തി ദിമ്രി, വിവേക് ഒബ്‌റോയ്, കാഞ്ചന എന്നിവരാണ് ചിത്രത്തിൽ പ്രധാനവേഷത്തിലെത്തുന്നത്. പ്രഭാസ് ഒരു പോലീസ് ഉദ്യോഗസ്ഥനായാണ് എത്തുന്നത്. ജനുവരി 1-ന് പുറത്തിറങ്ങിയ പോസ്റ്ററിൽ മുറിവുകളേറ്റ ശരീരവും മുഷിഞ്ഞ വസ്ത്രങ്ങളുമായി മാസ് ലുക്കിലാണ് പ്രഭാസ് പ്രത്യക്ഷപ്പെട്ടത്. 2027 മാർച്ച് 5-ന് ചിത്രം തിയേറ്ററുകളിൽ എത്തുമെന്ന് ടി-സീരീസ് അറിയിച്ചിട്ടുണ്ട്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi