അനുരാഗ് കശ്യപിന്റെ സിനിമകള്‍ കണ്ടവര്‍ക്കറിയാം, അദ്ദേഹത്തിന്റെ സിനിമകളിലെ ശക്തരായ സ്ത്രീകള്‍ക്ക് എപ്പോഴും പൊതുവായ ഒരു പേരുണ്ട്. അദ്ദേഹത്തിന്റെ സിനിമകളിലുടനീളം, കരുത്തും അതിജീവനശേഷിയും ശക്തിയും പ്രകടിപ്പിക്കുന്ന ഒരു സ്ത്രീ കഥാപാത്രത്തിന് നല്‍കി വരുന്ന പേരാണ് മഞ്ജരി. അത് യാദൃശ്ചികമല്ലെന്നാണ് അദ്ദേഹത്തിന്റെ വെളിപ്പെടുത്തല്‍.

To advertise here,

വീട്ടമ്മയായ തന്റെ അമ്മ മഞ്ജരിയില്‍ നിന്നാണ് താന്‍ ഈ പേര് സ്വീകരിച്ചതെന്ന് അദ്ദേഹം പറഞ്ഞു. വാരണാസിയില്‍ അച്ഛനോടൊപ്പം താമസിക്കുകയാണ് അമ്മയിപ്പോള്‍. 'എനിക്ക് ശക്തമായ ഒരു സ്ത്രീ കഥാപാത്രം ലഭിക്കുമ്പോഴെല്ലാം അവരെ എല്ലായ്‌പ്പോഴും മഞ്ജരി എന്ന് വിളിക്കാനാണ് തോന്നുന്നത്,' കശ്യപ് പറയുന്നു.

'നായകില്‍ റാണി മുഖര്‍ജിയെ മഞ്ജരി എന്നാണ് വിളിച്ചിരുന്നത്. ഷൂളില്‍ രവീണ ഠണ്ടനെ മഞ്ജരി എന്നാണ് വിളിച്ചിരുന്നത്. മറ്റൊരു പേര് നല്‍കാന്‍ മാത്രം ഭാവന എനിക്കില്ല. അവര്‍ എല്ലാം ഒരുമിച്ച് നിര്‍ത്തുന്നു. അവര്‍ വളരെ സെന്‍സിറ്റീവുമാണ്' അദ്ദേഹം കൂട്ടിച്ചേര്‍ത്തു. സെപ്റ്റംബര്‍ 19-ന് പുറത്തിറങ്ങുന്ന അദ്ദേഹത്തിന്റെ പുതിയ ചിത്രം 'നിഷാഞ്ചി' ഈ പാരമ്പര്യം തുടരുന്നു.

വിശ്വാസ്യതയ്ക്കും കലാപത്തിനും ഇടയില്‍ അകപ്പെടുന്ന ഇരട്ട സഹോദരന്മാരുടെ കഥയാണത്. കഥയിലെ വൈകാരിക ആശ്രയമായ 'അമ്മ' എന്ന കഥാപാത്രത്തെ അവതരിപ്പിക്കുന്നത് നടി മോണിക്ക പന്‍വാര്‍ ആണ്. സിനിമയില്‍ ഈ കഥാപാത്രത്തിന്റെ പേരും മഞ്ജരി എന്നാണ്. ഇതിലൂടെ, തന്റെ കഥപറച്ചിലിന്റെ രീതിയെ നിശ്ശബ്ദമായി സ്വാധീനിച്ച സ്വന്തം അമ്മയ്ക്ക് ഒരു സിനിമാറ്റിക് ആദരവ് കൂടി അദ്ദേഹം നല്‍കുന്നു.

കാഴ്ചയില്‍ ഒരുപോലെയും എന്നാല്‍ മൂല്യങ്ങളില്‍ വിപരീത സ്വഭാവക്കാരുമായ ബബ്ലു, ഡബ്ലു എന്നീ ഇരട്ട സഹോദരന്മാരുടെ കഥയാണ് ചിത്രം പറയുന്നത്. സാഹോദര്യം, വഞ്ചന, പ്രണയം, വീണ്ടെടുപ്പ് എന്നിവയിലൂടെ ചുറ്റിത്തിരിയുന്ന അവരുടെ ജീവിതത്തിലൂടെയാണ് കഥ നീങ്ങുന്നത്‌.

ഐശ്വരി താക്കറെ ഈ വെല്ലുവിളി നിറഞ്ഞ ഇരട്ടവേഷത്തിലൂടെ അരങ്ങേറ്റം കുറിക്കുമ്പോള്‍, വേദിക പിന്റോ, മുഹമ്മദ് സീഷാന്‍ അയ്യൂബ്, കുമുദ് മിശ്ര എന്നിവര്‍ സഹതാരങ്ങളായി എത്തുന്നു.

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbi.page.link/grihalakshmi