ഇറാനിലെ ഏക വിഷ്ണു ക്ഷേത്രം; ഇസ്ലാമിക വിപ്ലവത്തിന് ശേഷം ഹിന്ദുക്കൾ അവിടം വിട്ടുപോയി

ഇറാനിലെ ഹോർമോസ്ഗാൻ പ്രവിശ്യയുടെ തലസ്ഥാനമായ ബന്ദർ അബ്ബാസിലുള്ള ഒരു വിഷ്ണു ക്ഷേത്രം ഇപ്പോൾ വൈറലായിരിക്കുകയാണ്. ക്ഷേത്രത്തിന്റെ വീഡിയോ നടൻ അമിതാഭ് ബച്ചൻ സോഷ്യൽ മീഡിയയിൽ പങ്കുവെച്ചതോടെയാണിത് വലിയ രീതിയിൽ പ്രചരിക്കാൻ തുടങ്ങിയത്. പങ്കുവെച്ച് 24 മണിക്കൂറിനുള്ളിൽ തന്നെ ഈ പോസ്റ്റ് 7,00,000-ത്തിലധികം ആളുകൾ കാണുകയും 30,000-ത്തിലധികം ലൈക്കുകൾ നേടുകയും ചെയ്തിരുന്നു.

"ഇറാനിലെ ബന്ദർ അബ്ബാസിലുള്ള പുരാതന വിഷ്ണു ക്ഷേത്രം. ഖജർ കാലഘട്ടത്തിൽ, 1892-ലാണ് ഇത് നിർമ്മിച്ചത്. നഗരത്തിൽ ജോലി ചെയ്തിരുന്ന ഇന്ത്യയിൽ നിന്നുള്ള ഹിന്ദു വ്യാപാരികൾക്കായിട്ടാണ് ഇത് നിർമ്മിക്കപ്പെട്ടത്... വീഡിയോയിലെ ഗാനം പേർഷ്യൻ ഭാഷയിലാണ്," എന്നായിരുന്നു വീഡിയോയുടെ അടിക്കുറിപ്പ്. ഫസീന കിഷൻ ആലപിച്ച ഈ ഗാനത്തിന്റെ പേര് 'ഇറാനിയൻ ലോർഡ് വിഷ്ണു സോങ്' എന്നാണ്.

ഇന്ത്യക്കാരും ഇറാനികളും തമ്മിലുള്ള സൗഹൃദം
ചരിത്രരേഖകളും യൂട്യൂബിലെ വിവിധ ട്രാവൽ വ്ലോഗുകളും അനുസരിച്ച്, മുഹമ്മദ് ഹസൻ സഅദ്-ഓൾ-മാലെക്കിന്റെ ഭരണകാലത്ത് 1892-ൽ ഹോർമോസ്ഗാൻ പ്രവിശ്യയിലാണ് ഈ ക്ഷേത്രം നിർമ്മിക്കപ്പെട്ടതെന്ന് പറയപ്പെടുന്നു. ആഗോള കപ്പൽ ഗതാഗതത്തിന്റെ പ്രധാന പാതയായ ഹോർമുസ് കടലിടുക്കിന് അഭിമുഖമായാണ് ബന്ദർ അബ്ബാസ് സ്ഥിതി ചെയ്യുന്നത്.

ഇന്തോ-ഇറാനിയൻ വാസ്തുവിദ്യാ ശൈലിയുടെ ഒരു അപൂർവ്വ ശേഖരമാണ് ഇവിടം. ബ്രിട്ടീഷ് ഇന്ത്യ കമ്പനിയിൽ ജോലി ചെയ്തിരുന്ന ഇന്ത്യക്കാർക്ക് 1888-ൽ ഈ ക്ഷേത്രം നിർമ്മിക്കാൻ അനുമതി ലഭിച്ചിരുന്നു എന്ന് ഇറാനിയൻ ചരിത്രകാരനും എഴുത്തുകാരനുമായ മുഹമ്മദ് അലി സദീദ് അൽ-സൽത്താന്റെ ഒരു കുറിപ്പിൽ പരാമർശിക്കുന്നുണ്ടത്രെ.

നാല് വർഷമെടുത്താണ് ഇതിന്റെ നിർമ്മാണം പൂർത്തിയാക്കിയത്. ഈ ക്ഷേത്രം ഇന്ത്യക്കാരും ഇറാനികളും തമ്മിൽ ഒരുകാലത്ത് നിലനിന്നിരുന്ന സൗഹൃദത്തിന്റെ ഓർമ്മപ്പെടുത്തൽ കൂടിയാണ്.

ഇന്തോ-ഇറാനിയൻ വാസ്തുവിദ്യ 
ഇന്ത്യയിലെയോ ഏഷ്യയിലെയോ ഭൂരിഭാഗം ഹിന്ദു ക്ഷേത്രങ്ങളിലെ പരമ്പരാഗത വാസ്തുവിദ്യയല്ല ഈ ക്ഷേത്രത്തിനുള്ളത്. മധ്യഭാഗത്തുള്ള ചതുരാകൃതിയിലുള്ള മുറി, താമരയുടെ കൊത്തുപണികളുള്ള മൂടിയിരിക്കുന്ന മകുടം (Dome). മധ്യത്തിലായി ഭൂമിയുടെയും ആകാശത്തിന്റെയും അച്ചുതണ്ടിനെ പ്രതിനിധീകരിക്കുന്ന ഒരു തണ്ട് (Rod) ഉണ്ട്. ചാന്ത്, പവിഴപ്പുറ്റ് കല്ലുകൾ, മണ്ണ്, കുമ്മായം എന്നിവ ഉപയോഗിച്ചാണ് ഇതിന്റെ നിർമ്മാണം നടത്തിയിരിക്കുന്നത്.

1979-ലെ ഇസ്ലാമിക വിപ്ലവത്തിന് ശേഷം, ഹിന്ദുക്കൾ ഉൾപ്പെടെയുള്ള ധാരാളം ഇന്ത്യൻ നിവാസികൾ ഇറാൻ വിട്ടുപോയി. അതുകൊണ്ടുതന്നെ ഇന്ന് ഈ ക്ഷേത്രം പഴയതുപോലെയല്ല. ശ്രീകോവിലിനുള്ളിൽ ഉണ്ടായിരുന്ന പല ചിത്രങ്ങളും നശിപ്പിക്കപ്പെട്ടിട്ടുണ്ട്.

ചരിത്ര സ്മാരകം
ഇന്നിവിടെ ബുദ്ധന്റെയും വിഷ്ണുഭഗവാന്റെയും വിഗ്രഹങ്ങളും ചിത്രങ്ങളും കാണാം. രാധ അരികിലിരിക്കെ ഓടക്കുഴൽ വായിക്കുന്ന കൃഷ്ണഭഗവാന്റെ ചിത്രവും ഇവിടെയുണ്ട്. പുനരുദ്ധാരണം ആവശ്യമായ ഹിന്ദു ദൈവങ്ങളുടെ പഴയ വിഗ്രഹങ്ങളും കാണാം.

ഈ ക്ഷേത്രം ദേശീയ ചരിത്ര സ്മാരകമായി രജിസ്റ്റർ ചെയ്തിട്ടുണ്ട്. പ്രാദേശികവാസികൾ ഹിന്ദുക്കളെ 'ഗൂർ' അല്ലെങ്കിൽ 'ഗബർ' എന്ന് വിളിച്ചിരുന്നതിനാൽ, നാട്ടുകാർക്കിടയിൽ ഈ ക്ഷേത്രം 'ഗൂരാൻ' എന്നാണ് അറിയപ്പെടുന്നത്.

ഇറാനിലെ രണ്ട് ഹിന്ദു ക്ഷേത്രങ്ങളിൽ ഒന്നാണിത്. മറ്റൊന്ന് സിസ്താൻ-ബലൂചിസ്ഥാൻ പ്രവിശ്യയുടെ തലസ്ഥാനമായ സഹേദാനിലെ ആര്യസമാജ ക്ഷേത്രമാണ്.

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi

Content Highlights: Built in 1892 for Hindu merchants in Bandar Abbas., Features a unique blend of Indian and Iranian architectural styles., Known locally as 'Goran' temple., Registered as a national historical monument in Iran., Contains ancient artifacts including idols of Vishnu and Nataraja.