നസീർസാറിന്റെ സ്വഭാവവിശേഷണം മുഴുവനും കൈവശപ്പെടുത്തിവെച്ച നടിയാണ് ലക്ഷ്മി ഗോപാലസ്വാമി

2002 മധ്യത്തിലാണെന്നാണ് എന്റെ ഓർമ. നിർമാതാവായ പി.കെ.ആർ. പിള്ളയ്ക്കുവേണ്ടി ഞാനും വിനയനും കൂടി ചെയ്ത ‘ഊമപ്പെണ്ണിന് ഉരിയാടാ പയ്യന്റെ’ വൻ വിജയത്തിനുശേഷം അടുത്ത സിനിമചെയ്യാനുള്ള ആലോചനകൾ നടക്കുന്ന സമയം. ഒരു സിനിമ പ്രതീക്ഷിച്ചതിലും വലിയ വിജയം നേടിക്കഴിഞ്ഞാൽ പിള്ളച്ചേട്ടന് അടുത്തപടം ഉടനെ തുടങ്ങണം. പ്രിയദർശനെവെച്ചുചെയ്ത 'ചിത്രം' മെഗാഹിറ്റായി മാറിയപ്പോൾ പിന്നെ മോഹൻലാലിനെവച്ചുമാത്രം തുടരെതുടരെ ചിത്രങ്ങൾ എടുക്കാൻ തുടങ്ങിയ കാലം മുതലേയുള്ള അദ്ദേഹത്തിന്റെ ഒരു ശീലപ്രകൃതമാണത്. ഊമപ്പെണ്ണിന്റെ ഷൂട്ടിങ് സമയത്ത് വിനയൻ മറ്റൊരു സിനിമ കമ്മിറ്റുചെയ്തിരുന്നതുകൊണ്ട് പിള്ളച്ചേട്ടന്റെ പുതിയ പടംചെയ്യാൻ വിനയനായില്ല.
“പിള്ളച്ചേട്ടൻ ഈ സിനിമ മറ്റേതെങ്കിലും സംവിധായകരെക്കൊണ്ട് ചെയ്യിക്ക്. നമുക്ക് അടുത്തപടം ചെയ്യാം.”
വിനയൻ വിനയാന്വിതനായി പിള്ളച്ചേട്ടനെ വിളിച്ചു പറഞ്ഞു.
അങ്ങനെയാണ് സംവിധായകൻ തുളസിദാസിന്റെ ‘പ്രണയമണിത്തൂവലു’മായി പിള്ളച്ചേട്ടൻ വരുന്നത്. ആലുവാ പുഴയോരത്തുള്ള പെരിയാർ ഹോട്ടലിലിരുന്നാണ് ഞാൻ പ്രണയമണിത്തൂവലിന്റെ സ്‌ക്രിപ്റ്റ് എഴുത്തിന് തുടക്കം കുറിച്ചത്.

Content Highlights: Kaloor Dennis shares his experience working with Lakshmi Gopalaswamy.