കുഞ്ഞുങ്ങള്‍ മരുന്ന് കഴിക്കാന്‍ മടി കാണിക്കുന്നുണ്ടോ? ശ്രദ്ധിക്കാം ഇക്കാര്യങ്ങള്‍

കുഞ്ഞ് കരഞ്ഞാല്‍, മുഖമൊന്ന് വാടിയാല്‍, ഉത്സാഹമില്ലാതിരുന്നാല്‍, കുറച്ച് കൂടുതല്‍നേരം ഉറങ്ങിയാല്‍ അച്ഛനമ്മമാരുടെ കരള് പിടയും. കുഞ്ഞിനെയുമെടുത്ത് നേരെ ആസ്പത്രിയിലേക്കോടും. ഡോക്ടറുടെ മുന്നിലാണ് മാതാപിതാക്കള്‍ അവരുടെ ആശങ്കകള്‍ മുഴുവന്‍ തുറന്നുവിടുന്നത്. കുഞ്ഞിന്റെ ആരോഗ്യകാര്യത്തിലെ വളരെ സൂക്ഷ്മമായ കാര്യം പോലും മറക്കാതെ പറയും. കുറേ മരുന്നുകളുമായി വീട്ടിലെത്തിക്കഴിഞ്ഞാല്‍ പിന്നെ യുദ്ധമാണ്. കുട്ടിയെ മരുന്ന് കഴിപ്പിക്കാനോടുന്നു. ഭക്ഷണം നിയന്ത്രിക്കുന്നു. അകത്തുനിന്ന് പുറത്തിറക്കാതെ വീട്ടില്‍ തന്നെ പിടിച്ചിരുത്തും. കുട്ടികള്‍ക്ക് ആദ്യഡോസ് മരുന്ന് കൊടുക്കുമ്പോള്‍ തന്നെ അസുഖം മാറണമെന്ന ചിന്തയാണ് എല്ലാ രക്ഷിതാക്കള്‍ക്കും. ക്ഷമ വളരെ കുറവ്. എന്നാല്‍ മരുന്നിന്റെ അളവിലും കൊടുക്കുന്ന രീതിയിലും  പലതും ശ്രദ്ധിക്കാനുണ്ട്. 

മരുന്നുകള്‍ എപ്പോള്‍ കൊടുക്കണം

Also Read

സ്ത്രീകളെ അപമാനിക്കുന്ന പാട്ടാണെന്ന് ഗൗരിയമ്മ; വിശദീകരിച്ചിട്ടും നിലപാട് മാറ്റിയില്ല

അലര്‍ജിയും ആസ്ത്മയും പാരമ്പര്യമാണോ? അറിയാം ലക്ഷണങ്ങളും ചികിത്സയും

അസുഖം ബാധിച്ച കുഞ്ഞിന്റെ ആരോഗ്യസ്ഥിതി ഭേദമാകുന്നതിന് മുമ്പ് തന്നെ ഒരു വിദഗ്ധ ഡോക്ടറെ കാണിച്ച് പരിശോധന നടത്തണം. ഡോക്ടര്‍ നിര്‍ദേശിക്കുന്ന മരുന്നുകള്‍ അപ്പോള്‍ തന്നെ കൊടുത്തുതുടങ്ങാം. ഈ കാര്യത്തില്‍ ഒരു ഫാര്‍മസിസ്റ്റിന്റെ സഹായവും ഉപദേശവും ഉണ്ടായിരിക്കുന്നതും നല്ലതാണ്.

സമയം തെറ്റാതെ കൊടുക്കണോ

ഡോക്ടര്‍ നിര്‍ദേശിക്കുന്ന മരുന്നുകള്‍ കൃത്യമായ അളവില്‍ സമയം തെറ്റാതെ കൊടുക്കേണ്ടത് നിര്‍ബന്ധമാണ്. പ്രത്യേകിച്ചും ആന്റിബയോട്ടിക്കുകള്‍ കൃത്യമായി 8 മണിക്കൂര്‍ ഇടവേളകളില്‍ നല്‍കണം. സമയക്രമം തെറ്റുന്നത് ബാക്ടീരിയകള്‍ പെരുകുന്നതിനും വൈറസുകള്‍ ആന്റിബയോട്ടിക്കുകളോട് ചെറുത്തുനില്‍ക്കുന്നതിനും കാരണമാവും. അതോടെ കുട്ടിക്ക് അസുഖം വീണ്ടും കൂടാന്‍ സാധ്യതയുണ്ട്. ഡോക്ടര്‍മാര്‍ മൂന്നുനേരം കൊടുക്കണമെന്ന് നിര്‍ദേശിക്കുന്ന മരുന്നുകള്‍ മൂന്നുനേരം തന്നെ കൊടുക്കണം. അസുഖത്തിന് താല്‍ക്കാലിക ശമനമാവുന്നതുകൊണ്ട് മരുന്ന് കൊടുക്കാന്‍ മറന്നുപോയാല്‍ അതുസാരമില്ലെന്ന് കരുതരുത്. ചില മരുന്നുകള്‍ അസുഖം കുറയുന്നപക്ഷം കൊടുക്കേണ്ടതില്ലെങ്കില്‍ അക്കാര്യം ഡോക്ടര്‍ പ്രത്യേകം നിര്‍ദേശിക്കും. 

അളവിലെ ഏറ്റക്കുറച്ചിലുകള്‍ പ്രശ്‌നമാണോ

മരുന്നിന്റെ കാല്‍ഭാഗം അല്ലെങ്കില്‍ 5 മില്ലി എന്നൊക്കെ ഡോക്ടര്‍ നിര്‍ദേശിച്ചിട്ടുണ്ടെങ്കില്‍ അത്തരം അളവുകളില്‍ കൂടാനോ കുറയാനോ പാടില്ല. അങ്ങനെ സംഭവിച്ചാല്‍ അസുഖം മാറാതിരിക്കാന്‍ സാധ്യതയുണ്ട്. മരുന്ന് കൊടുക്കുമ്പോള്‍ ചിലപ്പോള്‍ കുഞ്ഞ് തുപ്പിയെന്നുവരാം. അത്തരം സാഹചര്യങ്ങളില്‍ അളവ് മനസ്സിലാക്കാന്‍ കഴിയാതെ വരും. കഴിവതും മരുന്ന് ശരിയായ അളവില്‍ കൃത്യമായി കുഞ്ഞിന്റെ ശരീരത്തിലെത്തുംവിധം വേണം നല്‍കാന്‍. അളവ് കാണിക്കുന്ന മൂടികള്‍ മരുന്നുകടകളില്‍ നിന്ന് വാങ്ങി സൂക്ഷിക്കുന്നത് നല്ലതാണ്. ചില മരുന്നുകള്‍ പൊടിരൂപത്തില്‍ നല്‍കുന്നവയാണ്. അതിലേക്ക് തിളപ്പിച്ചാറ്റിയ വെള്ളം ചേര്‍ത്ത് നന്നായി കുലുക്കിവേണം മരുന്ന് ഉണ്ടാക്കാന്‍. വെള്ളം ചേര്‍ക്കുമ്പോള്‍ അത് അണുവിമുക്തമാണെന്നും അത് മരുന്നുകുപ്പിയില്‍ കാണിച്ചിട്ടുള്ള അളവ് കവിയാതെ ചേര്‍ത്ത് കുലുക്കി ഉപയോഗിക്കേണ്ടതുമാണ്. 

ഡോക്ടര്‍ നിര്‍ദേശിച്ച മരുന്ന് കിട്ടിയില്ലെങ്കില്‍ മറ്റേതെങ്കിലും കമ്പനിയുടേത് കൊടുക്കാമോ
ഡോക്ടര്‍ നിര്‍ദേശിച്ച മരുന്ന് വിപണിയില്‍ ലഭ്യമല്ലെങ്കില്‍ ഫാര്‍മസിസ്റ്റ് നിര്‍ദേശിക്കുന്ന മറ്റ് മരുന്നുകള്‍ പകരമായി നല്‍കരുത്. മറിച്ച് ഡോക്ടറുടെ ഉപദേശം വീണ്ടും തേടി മരുന്ന് മാറ്റിയെഴുതി വാങ്ങണം. കുട്ടികളുടെ സാഹചര്യം, ക്ലിനിക്കല്‍ ഹിസ്റ്ററി, ആരോഗ്യസ്ഥിതി എന്നിവ അടിസ്ഥാനമാക്കിയാണ് ഡോക്ടര്‍ മരുന്ന് കുറിക്കുന്നത്. മരുന്ന് മാറ്റിക്കൊടുത്താല്‍ കുട്ടിയുടെ ആരോഗ്യസ്ഥിതിയെ ബാധിച്ചേക്കാം.

കുഞ്ഞ് മരുന്നു കഴിക്കാന്‍ മടിച്ചാല്‍

കുഞ്ഞുങ്ങള്‍ ഗുളിക കഴിക്കാന്‍ വിമുഖത കാണിക്കുന്നുണ്ടെങ്കില്‍ ഡോക്ടറുടെ നിര്‍ദേശപ്രകാരം ദ്രവരൂപത്തിലുള്ള മരുന്ന് നല്‍കാം. ഗുളിക വിഴുങ്ങാതിരിക്കുമ്പോള്‍ അത് പൊടിച്ച് പഞ്ചസാരവെള്ളത്തിലോ ജ്യൂസിലോ ചേര്‍ത്ത് നല്‍കാറുണ്ട്. ഇത് നല്ലതല്ല. മരുന്നുകള്‍ ഒരുകാരണവശാലും മറ്റ് ഭക്ഷണസാധനങ്ങള്‍ ചേര്‍ത്ത് നല്‍കരുത്. ആവശ്യമെങ്കില്‍ കഞ്ഞിവെള്ളത്തിലോ തിളപ്പിച്ചാറ്റിയ വെള്ളത്തിലോ ഗുളിക പൊടിച്ച് ചേര്‍ത്ത് നല്‍കാവുന്നതാണ്. കുഞ്ഞ് മരുന്ന് തീരെ കഴിക്കുന്നില്ലെങ്കില്‍ ആശുപത്രിയില്‍ കിടത്തിയുള്ള ചികിത്സ ആവശ്യമായി വരും. 

സ്വയം ചികിത്സ നല്ലതാണോ

സ്വയം ചികിത്സ അപകടം വിളിച്ചു വരുത്തും. കുഞ്ഞിന് പനിയോ ചുമയോ വന്നാല്‍ നേരത്തെ അതേ രോഗത്തിന് കുഞ്ഞിന്റെ സഹോദരനോ സഹോദരിക്കോ വാങ്ങിവെച്ച മരുന്നുകളുണ്ടെങ്കില്‍ അത് ഡോക്ടറുടെ നിര്‍ദേശപ്രകാരമല്ലാതെ ഒരു കാരണവശാലും നല്‍കരുത്. ഒരു കുട്ടിക്ക് എഴുതിക്കൊടുത്ത മരുന്ന് മറ്റൊരു കുട്ടിക്ക് നല്‍കാന്‍ പാടില്ല. അതുപോലെ അസുഖവിവരം ധരിപ്പിച്ച് ഫാര്‍മസികളില്‍ നിന്ന് വാങ്ങുന്ന താല്‍ക്കാലികാശ്വാസ മരുന്നുകള്‍ കുട്ടികളില്‍ പരീക്ഷിക്കുന്നത് കൂടുതല്‍ അപകടം ഉണ്ടാക്കും.  

മരുന്ന് ഇടയ്ക്ക് വെച്ച് നിര്‍ത്താമോ

നിര്‍ദേശിക്കുന്ന കാലയളവിലേക്കുള്ള മരുന്നുകള്‍ രോഗം മാറിയാലും ഇല്ലെങ്കിലും കൃത്യമായ സമയക്രമം പാലിച്ചുതന്നെ പൂര്‍ത്തിയാക്കണം. മരുന്ന് ഉപയോഗിക്കാന്‍ വേണ്ടി തുറന്ന് കഴിഞ്ഞാല്‍ അത് ദീര്‍ഘനാളത്തേക്ക് സൂക്ഷിച്ചുവെക്കുന്നത് അപകടകരമാണ്.  ഫ്രിഡ്ജില്‍ സൂക്ഷിച്ചാല്‍ പോലും മരുന്നുകള്‍ വീടുകളില്‍ ദീര്‍ഘനാളത്തേക്ക് ഉപയോഗിക്കാന്‍ എടുക്കരുത്. അത് കുഞ്ഞുങ്ങളില്‍ പുതിയ അസുഖമുണ്ടാക്കുന്നതിന് കാരണമാവും. ആവശ്യം കഴിഞ്ഞ് നശിപ്പിക്കുന്നതാണ് ഉത്തമം. കുട്ടികളുടെ ഭക്ഷണത്തിലും വസ്ത്രത്തിലും പഠനത്തിലും കളികളിലുമൊക്കെ ശ്രദ്ധിക്കുന്ന മാതാപിതാക്കള്‍ ആരോഗ്യകാര്യത്തിലും അതീവശ്രദ്ധ പുലര്‍ത്തണം.