ഭക്ഷണം ഒഴിവാക്കുന്നത് തടി കുറയ്ക്കാൻ സഹായിക്കുമോ? റുബീന ദിലൈക് പറയുന്നു

ശരീരഭാരം കുറയ്ക്കുക എന്നത് പലർക്കും വലിയ വെല്ലുവിളി തന്നെയാണ്. എന്നാൽ അത് പലപ്പോഴും മറ്റുപല ആരോഗ്യപ്രശ്നങ്ങളിലേക്കും നയിക്കാറുണ്ട്. കുറച്ച് കഴിക്കുക, ഭക്ഷണം ഒഴിവാക്കുക, കാർബോഹൈഡ്രേറ്റ് കുറയ്ക്കുക എന്നിങ്ങനെ പല മാർഗവും സ്വീകരിക്കുന്നവരുണ്ട്. എന്നാൽ യാഥാർത്ഥ്യം അതല്ല. പെട്ടെന്ന് ഫലം തരുന്ന ഇത്തരം രീതികൾ ദീർഘകാലം മുന്നോട്ട് കൊണ്ടുപോകാൻ പ്രയാസമാണ്, മാത്രമല്ല ഇത് നിങ്ങളെ ശാരീരികമായി തളർത്തുകയും ചെയ്യും. ശരിയായ ഭക്ഷണം കഴിക്കുന്നതിലൂടെയും കൃത്യനിഷ്ഠ പാലിക്കുന്നതിലൂടെയുമാണ് ശാശ്വതമായ മാറ്റം ഉണ്ടാവുന്നത്.

ടെലിവിഷൻ താരം റുബീന ദിലൈക് തന്റെ യുട്യൂബ് വീഡിയോയിലൂടെ പങ്കുവെച്ചതും ഇതേ കാര്യമാണ്. തടി കുറയ്ക്കാൻ വേണ്ടി ഭക്ഷണം ഒഴിവാക്കുന്ന രീതി ഒരു തെറ്റായ പ്രവണതയാണെന്ന് അവർ ചൂണ്ടിക്കാട്ടുന്നു. വേഗത്തിൽ തടി കുറയ്ക്കാം എന്ന് കരുതി താനും ഇത് പരീക്ഷിച്ചിട്ടുണ്ടെന്നും എന്നാൽ ഫലം തിരിച്ചടിയാവുകയായിരുന്നു എന്നും റുബീന തുറന്നുപറഞ്ഞു. "ഭക്ഷണം ഒഴിവാക്കുന്നത് തടികുറയാൻ ആരെയും സഹായിച്ചിട്ടില്ല," അവർ പറയുന്നു.

ഭക്ഷണം കഴിക്കാതെ ഇരിക്കുമ്പോൾ പിന്നീട് കടുത്ത വിശപ്പ് അനുഭവപ്പെടുകയും, രാത്രി വിശപ്പ് കാരണം ഉറങ്ങാൻ കഴിയാതെ ഫ്രിഡ്ജിന് അടുത്തേക്ക് ഓടേണ്ടി വരികയും ചെയ്തിരുന്ന അനുഭവം അവർ പങ്കുവെച്ചു. ഇത് മാനസിക അസ്വസ്ഥതയ്ക്കും ക്ഷീണത്തിനും കാരണമായി. ഭക്ഷണം ഒഴിവാക്കുന്നതിന് പകരം ശരിയായ സമയത്ത് ശരിയായ ഭക്ഷണം കഴിക്കുക എന്നതാണ് പ്രധാനം.

റുബീന തന്റെ വീഡിയോയിൽ വ്യക്തമാക്കുന്ന മറ്റ് ചില കാര്യങ്ങളിവയാണ്;

കാർബോഹൈഡ്രേറ്റ് തടി കൂട്ടും എന്നത് തികച്ചും ഒരു മിഥ്യാ ധാരണയാണ്. ശരിയായ അളവിൽ കഴിച്ചാൽ കാർബോഹൈഡ്രേറ്റ് പ്രശ്നക്കാരനല്ല. സമീകൃതമായ അളവിൽ ആഹാരക്രമം ക്രമീകരിക്കുകയാണ് വേണ്ടത്.

വീട്ടിലുണ്ടാക്കിയ നെയ്യ് മിതമായ അളവിൽ ഉപയോഗിക്കുന്നത് ആരോഗ്യകരമാണെന്ന് റുബീന വിശ്വസിക്കുന്നു. അവർ തന്റെ ദൈനംദിന ഭക്ഷണത്തിൽ നെയ്യ് ഉൾപ്പെടുത്താറുണ്ട്.

പുളിപ്പിച്ച ഭക്ഷണങ്ങൾ (Fermented Foods) വയറിന് നല്ലതാണ്. ഇഡ്ഡലി, ദോശ തുടങ്ങിയ ഭക്ഷണങ്ങൾ ദഹനം എളുപ്പമാക്കാനും ഉന്മേഷം നൽകാനും സഹായിക്കുന്നു.

സസ്യാഹാരത്തിൽ പ്രോട്ടീൻ കുറവാണ് എന്നത് മിഥ്യാധാരണയാണ്. പരിപ്പ് വർഗ്ഗങ്ങൾ, പനീർ, ടോഫു എന്നിങ്ങനെ സസ്യാഹാരത്തിലും ധാരാളം പ്രോട്ടീൻ അടങ്ങിയിട്ടുണ്ട്.

പഴങ്ങളിലെ പഞ്ചസാര
പഴങ്ങൾ കഴിക്കുന്നതോ ജ്യൂസ് കുടിക്കുന്നതോ നല്ലതാണ്. എന്നാൽ പഴങ്ങളിലെ മധുരം അമിതമായാൽ ശരീരത്തിന് ദോഷകരമാണ്.

ശുദ്ധീകരിച്ച എണ്ണയെക്കാൾ (Refined Oil) നല്ലത് വിത്ത് എണ്ണകളാണ്. വെളിച്ചെണ്ണ, കടുക് എണ്ണ, കോൾഡ് പ്രസ്സ്ഡ് ഓയിലുകൾ എന്നിവ ഉപയോഗിക്കാനാണ് താരം ഇഷ്ടപ്പെടുന്നത്. റിഫൈൻഡ് ഓയിലുകൾ അവർ പൂർണ്ണമായും ഒഴിവാക്കുന്നു.

സംസ്കാരം ഭക്ഷണരീതിയെ സ്വാധീനിക്കുന്നു
ഓരോ പ്രദേശത്തെയും ഭൂപ്രകൃതിക്കും സംസ്കാരത്തിനും അനുസരിച്ചുള്ള ഭക്ഷണരീതി പിന്തുടരുന്നത് സ്വാഭാവികമാണ്.

എന്നാൽ ആരോഗ്യകരമായ ഭക്ഷണം വിരസമാണ് എന്ന ചിന്ത തെറ്റാണ്. ക്യാരറ്റ് സാലഡ്, മധുരക്കിഴങ്ങ് ചാട്ട് എന്നിങ്ങനെ ലളിതമായ മാറ്റങ്ങളിലൂടെ ആരോഗ്യകരമായ ഭക്ഷണവും രുചികരമാക്കാം.

കുറച്ച് കഴിക്കുക എന്നതിലല്ല, മറിച്ച് കൃത്യസമയത്ത് ശരിയായ ഭക്ഷണം കഴിച്ച് ശരീരത്തെ ആരോഗ്യത്തോടെ നിലനിർത്തുക എന്നതിലാണ് കാര്യം എന്ന് റുബീന ഓർമ്മിപ്പിക്കുന്നു.

(ശ്രദ്ധിക്കുക: ഈ വിവരങ്ങൾ ഒരു പ്രൊഫഷണൽ മെഡിക്കൽ ഉപദേശമല്ല, ജീവിതശൈലിയിൽ മാറ്റം വരുത്തുന്നതിനു മുമ്പ് ഡോക്ടറുടെ നിർദേശം തേടുക) 

കൂടുതൽ ഫീച്ചറുകൾ വായിക്കാൻ ഗൃഹലക്ഷ്മി വാട്സാപ്പ് ഗ്രൂപ്പിൽ അംഗമാകൂ:https://mbi.page.link/grihalakshmi