കൃത്യമായി പല്ലുതേച്ചിട്ടും വായ്‌നാറ്റം വിട്ടുമാറുന്നില്ലേ? കാരണമറിഞ്ഞ് ചികിത്സിക്കാം

പലരോടും സംസാരിക്കുന്ന സമയത്ത് വായിലെ ദുര്‍ഗന്ധത്തെപ്പറ്റി ചിന്തിച്ച് ആത്മവിശ്വാസം നഷ്ടപ്പെട്ടിട്ടുണ്ടോ? സ്ഥിരമായി പല്ല് തേച്ചിട്ടും വായിലെ ദുര്‍ഗന്ധം മാറാതിരിക്കുന്നതില്‍ ബുദ്ധിമുട്ടും മാനസികവിഷമവും അനുഭവിക്കുന്നവരാകും ചിലരെങ്കിലും. എന്നാല്‍ ഈ വിട്ടുമാറാത്ത വായ്നാറ്റം ഒരു നാണക്കേട് എന്നതിലുപരി പല്ലുകളുടെയോ മറ്റ് ആരോഗ്യപരമായതോ ആയ പ്രശ്‌നങ്ങളുടെ സൂചനയാകാം. അത് ഉടന്‍ തന്നെ പരിശോധിക്കേണ്ടതുണ്ട്.

ഈ അവസ്ഥയാണ് 'ഹാലിറ്റോസിസ്'. നല്ല ശുചിത്വം പാലിച്ചാലും ഇത് ഉണ്ടാകാന്‍ സാധ്യതയുണ്ടെന്നാണ് ദന്തരോഗവിദഗ്ധര്‍ പറയുന്നത്. വായ്നാറ്റം അഥവാ ഹാലിറ്റോസിസ് എന്നത് മിക്കവാറും എല്ലാവര്‍ക്കും എപ്പോഴെങ്കിലും ഉണ്ടാകുന്ന ഒന്നാണ്. മിക്കവാറും ആളുകളില്‍ പല്ല് തേക്കുന്നതിലൂടെയും ഫ്‌ലോസ് ചെയ്യുന്നതിലൂടെയും വായ കഴുകുന്നതിലൂടെയും ഇത് പരിഹരിക്കപ്പെടുന്നു. മറ്റുചിലരില്‍ അത് പരിഹരിക്കപ്പെടാതെ നിലനില്‍ക്കുന്നു.

എല്ലായ്‌പ്പോഴും ഈ ദുര്‍ഗന്ധം ദന്താരോഗ്യവുമായി ബന്ധപ്പെട്ടതാണെന്ന് കരുതരുത്. തൊണ്ട മുതല്‍ ഹോര്‍മോണുകള്‍ വരെയുള്ള പ്രശ്‌നങ്ങളും കാരണമാകാം. വിട്ടുമാറാത്ത സൈനസ് അണുബാധ അല്ലെങ്കില്‍ തൊണ്ടയിലെ അണുബാധ എന്നിവ ചില സമയങ്ങളില്‍ കാരണമാകാം.

പോസ്റ്റ്-നേസല്‍ ഡ്രിപ്പ്, ടോണ്‍സില്‍ സ്റ്റോണ്‍സ്, അല്ലെങ്കില്‍ സൈനസൈറ്റിസ് എന്നിവ മൂലമുണ്ടാകുന്ന ദുര്‍ഗന്ധം പല്ല് തേക്കുന്നതിലൂടെ ഇല്ലാതാവില്ല. ഗ്യാസ്‌ട്രോ ഈസോഫേഷ്യല്‍ റിഫ്‌ളക്‌സ്‌ എന്ന രോഗം കുടലിലെ ആസിഡുകളുടെ റിഫ്‌ളക്‌സിന് കാരണമാകുക മാത്രമല്ല, പല്ലുകളുടെ തേയ്മാനത്തിനും വായ്നാറ്റത്തിനും കാരണമാകുന്നു.

ഡയബറ്റിക് കീറ്റോ ആസിഡോസിസ് എന്ന രോഗമുള്ളവർക്കും  വായയിലെ ദുർഗന്ധം ഉണ്ടാവും. അതുകൊണ്ടാണ് മൗത്ത് വാഷോ മിന്റുകളോ ഉപയോഗിക്കുന്നത് പലപ്പോഴും മതിയാകാതെ വരുന്നത്.

ഏറ്റവും വ്യാപകമായ കാരണങ്ങളില്‍ ഒന്ന് മോണരോഗ (പെരിയോഡോന്റല്‍ ഗം ഡിസീസ്)മാണ്. മോണയുടെ അടിഭാഗത്ത് പ്ലാക്കും ടാര്‍ട്ടറും അടിഞ്ഞുകൂടുമ്പോള്‍, ബാക്ടീരിയകള്‍ ദുര്‍ഗന്ധമുള്ള സള്‍ഫര്‍ സംയുക്തങ്ങള്‍ ഉണ്ടാക്കുന്നു. സാധാരണ ബ്രഷ് ഉപയോഗിച്ച് ഈ ആഴത്തിലുള്ള ഭാഗങ്ങളില്‍ എത്താന്‍ കഴിയില്ല, അതിനാല്‍ പ്രൊഫഷണല്‍ ക്ലീനിങ് മാത്രമാണ് അവ വൃത്തിയാക്കാനുള്ള ഏക മാര്‍ഗ്ഗം.

ദശലക്ഷക്കണക്കിന് ബാക്ടീരിയകള്‍ നാവിലുമുണ്ട്, പ്രത്യേകിച്ച് അതിന്റെ പരുക്കന്‍ പിന്‍ഭാഗത്ത്. പല്ല് തേക്കുമ്പോള്‍ നാവും ശരിയായി വൃത്തിയാക്കാതിരുന്നാല്‍ ഇത് ഭക്ഷണാവശിഷ്ടങ്ങള്‍, നിര്‍ജ്ജീവ കോശങ്ങള്‍, ബാക്ടീരിയകള്‍ എന്നിവ അടിഞ്ഞുകൂടി ദുര്‍ഗന്ധം പുറപ്പെടുവിക്കാന്‍ അനുവദിക്കുന്നു.

വായ വരളുന്ന അവസ്ഥ (സെറോസ്റ്റോമിയ)യും ദുര്‍ഗന്ധത്തിനു കാരണമാകാം. നിര്‍ജ്ജലീകരണം, സമ്മര്‍ദ്ദം, ചില മരുന്നുകള്‍, വായിലൂടെ ശ്വാസമെടുക്കല്‍ എന്നിവ കാരണം ഉമിനീര്‍ ഉത്പാദനം കുറയുന്നത് വായ വരണ്ടതാക്കാം. ഇത് ദുര്‍ഗന്ധമുണ്ടാക്കുന്ന ബാക്ടീരിയകള്‍ക്ക് പെരുകാന്‍ അവസരം നല്‍കുന്നു. രൂക്ഷഗന്ധമുള്ള ഭക്ഷണങ്ങള്‍ കഴിക്കുന്നതും പുകവലിയും പുകയിലയുടെ ഉപയോഗവും ദുര്‍ഗന്ധത്തിനും മോണയുടെ തകരാറിനും കറ പിടിക്കുന്നതിനും കാരണമാകുന്നു.

ലളിതവും എന്നാല്‍ വളരെ ഫലപ്രദവുമായ ചില ദൈനംദിന ശീലങ്ങള്‍ സ്വീകരിക്കുന്നതിലൂടെ നിങ്ങളുടെ വായ ഫ്രഷായി നിലനിര്‍ത്താനും വായ്നാറ്റം ഇല്ലാതാക്കാനും കഴിയും. കൃത്യമായ ഇടവേളകളിലുള്ള ദന്തപരിശോധന വായിലെ അവസ്ഥ വിലയിരുത്താന്‍ സഹായിക്കുന്നു. ഒരു ദന്തരോഗവിദഗ്ദന് പല്ലിലെ പോടുകള്‍, മോണയിലെ പ്രശ്‌നങ്ങള്‍ അല്ലെങ്കില്‍ ശ്രദ്ധ ആവശ്യമുള്ള മറ്റേതെങ്കിലും ദന്തപ്രശ്‌നങ്ങള്‍ പരിശോധിക്കാന്‍ കഴിയും.

ബ്രഷ് ഉപയോഗിച്ച് എത്താന്‍ കഴിയാത്ത ആഴത്തിലുള്ള വിടവുകള്‍ ദന്ത ഉപകരണങ്ങള്‍ ഉപയോഗിച്ച് മാത്രമേ വൃത്തിയാക്കാന്‍ കഴിയൂ, അതിനാല്‍ ഓരോ 6 മാസത്തിലും പതിവായി ക്ലീനിങ് ചെയ്യണം. ധാരാളം വെള്ളം കുടിക്കുന്നത് പല്ലുകള്‍ക്കിടയില്‍ കുടുങ്ങിയ ഭക്ഷണാവശിഷ്ടങ്ങള്‍ നീക്കം ചെയ്യുകയും ഉമിനീര്‍ ഉത്പാദനം പ്രോത്സാഹിപ്പിക്കുകയും ചെയ്യുന്നു. സംസ്‌കരിച്ച ഭക്ഷണങ്ങള്‍ കുറയ്ക്കുകയും പച്ചക്കറികള്‍ കഴിക്കുകയും പുകവലി കുറയ്ക്കുകയും ചെയ്യുക. ശാരീരിക പരിശോധനയ്ക്ക് ശേഷം ദന്തരോഗവിദഗ്ദന്‍ നിര്‍ദ്ദേശിക്കുന്ന കാര്യങ്ങള്‍ കൃത്യമായി ചെയ്യുക.

(പൊതുവായ വിവരങ്ങൾ മാത്രമാണിവ. ദന്തരോഗവിദഗ്ദന്റെ നിർദേശങ്ങൾ പാലിക്കുക)

കൂടുതല്‍ ഫീച്ചറുകള്‍ വായിക്കാന്‍ ഗൃഹലക്ഷ്മി വാട്സാപ്പ് ഗ്രൂപ്പില്‍ അംഗമാകൂ:https://mbiurl.in/grihalakshmi