ജോണി ഹോട്ട് ഡോഗ്
വിശേഷണങ്ങള് പലതുണ്ട് ഇന്ദോറിന്. 'മധ്യപ്രദേശിന്റെ ഭക്ഷണതലസ്ഥാനം' എന്നതായിരിക്കും ഏറ്റവും അനുയോജ്യം. ഇന്ത്യയിലെ ഏറ്റവും വൃത്തിയുള്ള തെരുവോരഭക്ഷണശാലകള് കാണാന് ഇവിടെയെത്തണം. ആഹാരത്തിന്റെ ഗുണവും മേന്മയും പരിശോധിക്കുന്ന ഫുഡ് സേഫ്റ്റി ആന്ഡ് സ്റ്റാന്ഡേഡ്സ് അതോറിറ്റിയാണ് ഇന്ദോറിന് ഇത്തരമൊരു പദവി നല്കിയിട്ടുള്ളത്. വിന്ധ്യാപര്വതനിരയുടെ വടക്ക്, മാള്വാപീഠഭൂമിയുള്പ്പെടുന്ന മധ്യപ്രദേശിന്റെ ഭാഗമാണിത്. തെക്കുകിഴക്കന് രാജസ്ഥാനിലെ ഒരതിരും ചേര്ന്നുകിടക്കുന്നു. അതുകൊണ്ടുതന്നെ, മധ്യപ്രദേശിലെയും രാജസ്ഥാനിലെയും രുചിക്കൂട്ടുകളാണ് ഇവിടെ കാണാന് കഴിയുക. ആ രുചിഭേദങ്ങള് തേടിയാണ് ഇന്ദോറിലേക്ക് വന്നത്.
ചെറുതായൊരു നഗരപ്രദക്ഷിണം നടത്തി രുചിവഴികളിലേക്ക് തിരിഞ്ഞു. മാള്വാരുചികള് കാഴ്ചകളായും നറുമണമായും കണ്മുന്നിലെത്തുകയാണ്. ഛപ്പന് ദുകാനിലേക്കാണ് ആദ്യം പോയത്. ഹിന്ദിയില് 'ഛപ്പന്' എന്നാല് 'അന്പത്തിയാറ്' എന്നാണ്. 'ദുകാന്' എന്നാല് 'കട'. ഇരുനൂറുമീറ്ററിനുള്ളില് അന്പത്താറ് ഭക്ഷണശാല ഇവിടെ കാണാം. നഗരത്തിലെ പ്രശസ്തമായ ഭക്ഷണത്തെരുവാണിത്.
ആദ്യം കയറിയത് ജോണി ഹോട്ട് ഡോഗിലേക്കാണ്. വിജയ് സിങ്ങിന്റെതാണ് കട. ബണ് നെടുകെ മുറിച്ച്, അതിനിടയില് സോസേജ് ചേര്ത്തുണ്ടാക്കുന്നതാണ് ഹോട്ട് ഡോഗ്. എന്നാല്, ഇവിടെ മസാല ചേര്ത്ത ഓംലെറ്റാണ് ഹോട്ട് ഡോഗില് ചേര്ക്കുന്നത്. ഇന്ദോറിലെത്തിയാല് നിര്ബന്ധമായും കഴിക്കേണ്ട ഒന്നാണ് സാബൂദാനാ കിച്ഡി. ചിപ്സും സുഗന്ധവ്യഞ്ജനങ്ങളും മല്ലിയിലയും നാരങ്ങയും ചേര്ത്താണ് കിച്ഡിയൊരുക്കുന്നത്. ഉരുളക്കിഴങ്ങ് വേവിച്ചുടച്ച് അതിലേക്ക് തേങ്ങാപ്പീരയും കശുവണ്ടിയും ഉണക്കമുന്തിരിയും ചേര്ത്തുരുട്ടി എണ്ണയില് പൊരിച്ചെടുക്കുന്ന ഖൊപ്റാ പട്ടീസിന് ആരാധകരേറെയാണ്. ഗോതമ്പുമാവും നെയ്യും ചേര്ത്ത് ഉരുളകളാക്കി, ഉണ്ണിയപ്പത്തട്ടില് വേവിച്ചെടുക്കുന്ന ദാല് ബാട്ടി രാജസ്ഥാന്, ഉത്തര്പ്രദേശ് എന്നിവിടങ്ങളിലും പ്രശസ്തമാണ്.
സ്നാക് കഴിച്ച് വയറ് നിറഞ്ഞെങ്കില് മധുരം സ്വീറ്റ്സിലേക്ക് പോയി ശികഞ്ചി കുടിക്കാം. പേരുകേട്ട് ഞെട്ടണ്ട. കട്ടിയുള്ള പാലും ഉണങ്ങിയ പഴങ്ങളും ചേര്ത്തുണ്ടാക്കുന്ന പാനീയമാണിത്. കാഴ്ചയ്ക്ക് ലസ്സിപോലെ തോന്നും. ഇനിയുള്ളത് ജലേബയാണ്. സാധാരണ ജിലേബിയുടെ മൂന്നിരട്ടി വലുപ്പമുള്ള ജലേബ ഒന്ന് കഴിച്ചാല് വയറുനിറയും. ഭക്ഷണത്തെയും പാചകത്തെയും ആത്മാര്ഥമായി സ്നേഹിക്കുന്നവരാണ് ഇന്ദോറുകാര്. പാരമ്പര്യമായി കൈമാറിപ്പോരുന്ന പാചകരഹസ്യങ്ങള് ഇവര്ക്കുണ്ട്. തങ്ങളുടെ കൈപ്പുണ്യം മറുനാട്ടുകാര്ക്കായി പങ്കുവയ്ക്കാന് താത്പര്യമാണിവര്ക്ക്.
കൂടുതല് ഫീച്ചറുകള് വായിക്കാന് ഗൃഹലക്ഷ്മി വാട്സാപ്പ് ഗ്രൂപ്പില് അംഗമാകൂ:https://mbi.page.link/grihalakshmi
Content Highlights: Explore Indore`s vibrant street food scene, from Malwa delicacies to unique dishes like Sabudana Khichdi & Johny Hot Dog. A food lover`s paradise!
Published: 01 Jul 2025, 11:58 am IST
Related Topics
Disclaimer: Kindly avoid objectionable, derogatory, unlawful and lewd comments, while responding to reports. Such comments are punishable under cyber laws. Please keep away from personal attacks. The opinions expressed here are the personal opinions of readers and not that of Mathrubhumi.
Most Commented